ಪಿ.ವೀರೇಂದ್ರಗೌಡ, ಸಂಡೂರು
ಸರಕಾರದ ನಾನಾಯೋಜನೆಗಳ ಲಾಭ ಪಡೆಯಲು ಮನುಷ್ಯರಿಗೆ ಆಧಾರ್ ಕಾರ್ಡ್ ಮಾಡಿಸಿದ್ದಾಯಿತು, ಇದೀಗ ಜಾನುವಾರುಗಳ ಸರದಿ. ಹೌದು,ಪಶು ಸಂಗೋಪನೆ ಇಲಾಖೆ ಹಾಲು ಕೊಡುವ ಎಮ್ಮೆ ಮತ್ತು ಆಕಳುಗಳ ಕಿವಿಗಳಿಗೆ ಪಾಲಿಯುರೇತಿನ್ ಟ್ಯಾಗ್ಗಳನ್ನು ಜೋಡಣೆ ಮಾಡುತ್ತಿದೆ. ಇವು ಯಥಾವತ್ ಆಧಾರ್ ಕಾರ್ಡ್ನಂತೆ ಕೆಲಸ ಮಾಡುತ್ತವೆ. ನ್ಯಾಷನಲ್ ಡೈರಿ ಅಭಿವೃದ್ಧಿ ಬೋರ್ಡ್(ಎನ್ಡಿಡಿಬಿ) ಅಭಿವೃದ್ಧಿ ಪಡಿಸಿದ ಇನ್ಫರ್ಮೇಷನ್ ನೆಟ್ವರ್ಕ್ ಎನಿಮಲ್ ಪ್ರೊಡಕ್ಟಿವಿಟಿ ಅ್ಯಂಡ್ ಹೆಲ್ತ್ (ಐಎನ್ಎಪಿಎಚ್) ಸಾಫ್ಟ್ವೇರ್ ನಿಂದ ಅಭಿವೃದ್ಧಿ ಪಡಿಸಲಾದ 12 ಡಿಜಿಟ್ಗಳನ್ನು ಒಳಗೊಂಡ ಯುನಿಕ್ ಇನ್ ಇಂಡಿಯಾ ಎಂಬ ಹೆಸರಿನಲ್ಲಿ ಹಾಲು ಕೊಡುವ ಜಾನುವಾರುಗಳನ್ನು ನೊಂದಣಿ ಮಾಡಲಾಗುತ್ತಿದೆ. ದೇಶಾದ್ಯಂತ ನಡೆಯುತ್ತಿರುವ ಈ ನೋಂದಣಿ ಪ್ರಕ್ರಿಯೆಯಲ್ಲಿ ರಾಜ್ಯದ ಹಾಲು ಕೊಡುವ 16 ಲಕ್ಷ ದ 10 ಸಾವಿರ ಜಾನುವಾರುಗಳ ಪೈಕಿ 1 ಲಕ್ಷ ದ 72 ಸಾವಿರ ಜಾನುವಾರುಗಳನ್ನು ಈಗಾಗಲೇ ನೋಂದಣಿ ಮಾಡಲಾಗಿದೆ. ಜಿಲ್ಲೆಯಲ್ಲಿ 53 ಸಾವಿರದ 320 ಜಾನುವಾರುಗಳ ಪೈಕಿ 4 ಸಾವಿರಕ್ಕೂ ಹೆಚ್ಚು, ತಾಲೂಕಿನ 12 ಸಾವಿರ ಜಾನುವಾರುಗಳ ಪೈಕಿ 1 ಸಾವಿರದ 118 ಜಾನುವಾರುಗಳ ಕಿವಿಗೆ ಟ್ಯಾಗ್ ಅಳವಡಿಸಲಾಗಿದೆ.
ಏನು ಪ್ರಯೋಜನ: 12ಡಿಜಿಟ್ ಯೂನಿಕ್ ಕೋಡ್ಗಳನ್ನು ಸವೆಯದ, ಮುರಿಯದ, ಮಳೆಗೆ ಒದ್ದೆಯಾಗದ, ಆಕಸ್ಮಿಕವಾಗಿ ಜಾನುವಾರು ಕಲ್ಲಿಗೆ ಕಿವಿ ಉಜ್ಜಿಕೊಂಡರೂ ಕೀಳದ, ಒಮ್ಮೆ ಹಾಕಿದಲ್ಲಿ ಬಿಡಿಸಲಾಗದ ವಿಶೇಷ ಪ್ಲಾಸ್ಟಿಕ್ ನಿಂದ ಮಾಡಲಾಗಿದೆ. ಕೋಡ್ ಹೊಂದಿದ ಜಾನುವಾರು ಎಷ್ಟು ವರ್ಷದ್ದು, ಎಷ್ಟು ಕರು ಹಾಕಿದೆ, ಎಷ್ಟು ಗರ್ಭಪಾತಗಳಾಗಿವೆ, ದಿನಕ್ಕೆ ಎಷ್ಟು ಹಾಲು ಕೊಡುತ್ತದೆ, ಮಾಲೀಕರಾರು, ಯಾವ ಊರು ಸೇರಿ ನಾನಾ ಮಹತ್ವದ ಅಂಶಗಳು ಆನ್ಲೈನ್ನಲ್ಲಿ ಫೀಡ್ ಆಗುತ್ತವೆ. ಕಳ್ಳ ಕಾಕರು ಜಾನುವಾರುಗಳನ್ನು ಕದ್ದರೆ ಮಾರಾಟ ಮಾಡುವುದು ಸಾಧ್ಯವಿಲ್ಲ. ಏಕೆಂದರೆ ಯೂನಿಕ್ ಕೋಡ್ ಜಾನುವಾರಿನ ಇತಿಹಾಸವನ್ನೆ ತೆರೆದಿಡುತ್ತದೆ. ಜತೆಗೆ ಪ್ರಾಣಿಗಳ ದಾಳಿ, ಸಿಡಿಲಿಂದ ಸಾವು ಸೇರಿ ಪ್ರಾಕೃತಿಕ ವಿಕೋಪದಿಂದ ಜಾನುವಾರು ಮೃತಪಟ್ಟಲ್ಲಿ ಅದರ ಮೌಲ್ಯ ಅಂದಾಜು ಮಾಡಿ ವಿಮೆ ಅಥವಾ ಪರಿಹಾರ ಧನವನ್ನು ಜಾನುವಾರು ಮಾಲೀಕರಿಗೆ ವಿತರಿಸಲು ಸುಲಭವಾಗಲಿದೆ.
====
ಕಳೆದ ತಿಂಗಳಿನಿಂದ ಹಾಲು ಕೊಡುವ ಜಾನುವಾರುಗಳ ಕಿವಿಗೆ 12 ಡಿಜಿಟ್ನ ಯೂನಿಕ್ ಕೋಡ್ ಹೊಂದಿದ ಪಾಲಿಯುರೇತಿನ್ ಟ್ಯಾಗ್ಗಳನ್ನು ಜೋಡಿಸಲಾಗುತ್ತದೆ. ಅಕ್ಟೋಬರ್ ಅಂತ್ಯದೊಳಗೆ ಟ್ಯಾಗ್ ಅಳವಡಿಗೆಗೆ ಗುರಿ ನಿಗದಿಪಡಿಸಲಾಗಿದೆ. ಕೋಡ್ ಸಹಾಯದಿಂದ ಆನ್ಲೈನ್ನಲ್ಲಿ ಫೀಡ್ ಮಾಡಲಾದಂತೆ ಜಾನುವಾರು ಯಾರಿಗೆ ಸೇರಿದ್ದು, ಎಷ್ಟು ಹಾಲು ಕೊಡುತ್ತದೆ ಎಂಬುದು ಸೇರಿ ಮಹತ್ವದ ಅಂಶಗಳು ತಿಳಿಯುತ್ತದೆ. ಪ್ರಕೃತಿ ವಿಕೋಪದಿಂದ ಜಾನುವಾರು ಸತ್ತಾಗ ನಷ್ಟ ಗುರುತಿಸಲು, ಪರಿಹಾರ, ವಿಮೆಯ ಹಣ ನೀಡಲು ಅನುಕೂಲವಾಗುತ್ತದೆ.
- ಡಾ.ವಲಿಭಾಷಾ, ಎಡಿ, ಪಶುಸಂಗೋಪನೆ ಇಲಾಖೆ, ಸಂಡೂರು.