ಮನೆ ಮೇಲೆ ಎಸಿಬಿ ದಾಳಿ

ಬಳ್ಳಾರಿ: ಅಕ್ರಮ ಆಸ್ತಿ ಗಳಿಕೆ ಆರೋಪ ಹಿನ್ನೆಲೆಯಲ್ಲಿ ಇಲ್ಲಿನ ಸಿದ್ಧಾರ್ಥ ಕಾಲೊನಿಯಲ್ಲಿರುವ ನೀರಾವರಿ ಇಲಾಖೆಯ ಎಇಇ ಆದೆಪ್ಪ ಅವರ ಮನೆ ಮೇಲೆ ಶುಕ್ರವಾರ ಎಸಿಬಿ ತಂಡದ ಅಧಿಕಾರಿಗಳು ದಾಳಿ ನಡೆಸಿ, ದಾಖಲೆಗಳನ್ನು ಪರಿಶೀಲಿಸಿದರು.

ಎಸಿಬಿ ಎಸ್ಪಿ ಪ್ರಸನ್ನ ಬಿ.ದೇಸಾಯಿ ನೇತೃತ್ವದ ಈ ತಂಡದಲ್ಲಿ ಡಿವೈಎಸ್ಪಿ ಕೆ.ಅರುಣಕುಮಾರ, ಪೊಲೀಸ್ ಇನ್‌ಸ್ಪೆಕ್ಟರ್ ಕೆ.ಪಿ.ರವಿಕುಮಾರ, ಅಧಿಕಾರಿ ದಿವಾಕರ ಸೇರಿ ಬಳ್ಳಾರಿ ಹಾಗೂ ಕೊಪ್ಪಳ ಜಿಲ್ಲೆಗಳ ಸಿಬ್ಬಂದಿ ಇದ್ದರು. ಬೆಳಗ್ಗೆ 7.30ರ ಸುಮಾರಿಗೆ ಎಇಇ ಆದೆಪ್ಪ ಅವರ ಮನೆ ಪ್ರವೇಶಿಸಿದ ಅಧಿಕಾರಿಗಳು, ಸಂಜೆಯವರೆಗೂ ತಪಾಸಣೆ ನಡೆಸಿದರು. ಚಿನ್ನಾಭರಣ, ನಗದು ಸೇರಿ ಸ್ಥಿರಾಸ್ತಿ ಮತ್ತು ಚರಾಸ್ತಿ ಕುರಿತ ಮೂಲ ದಾಖಲೆಗಳನ್ನು ಪರಿಶೀಲಿಸಿದರು.

ಆದೆಪ್ಪ ಅವರ ಪುತ್ರಿ, ಮನೆಗೆಲಸದ ಮಹಿಳೆ ಸೇರಿ ಇತರರನ್ನು ಈ ತಂಡ ರಹಸ್ಯವಾಗಿ ವಿಚಾರಣೆ ನಡೆಸಿತು. ಆದೆಪ್ಪ ಅವರು, ರಾಯಚೂರು, ಸಿರುಗುಪ್ಪ ಹಾಗೂ ಬಳ್ಳಾರಿಯಲ್ಲಿ ಎಇಇ ಆಗಿ ಕಾರ್ಯನಿರ್ವಹಿಸಿದ್ದಾರೆ.