ವಿಶ್ವ ಪರಂಪರೆ ಪಟ್ಟಿಯಲ್ಲಿರುವ ಹಂಪಿ ಸ್ಮಾರಕದ ಬಳಿ ಬೋರ್‌ವೆಲ್‌

ಹೊಸಪೇಟೆ: ವಿಶ್ವ ಪರಂಪರೆ ತಾಣ ಹಂಪಿ ವ್ಯಾಪ್ತಿಯ ಕಮಲಾಪುರದ ಕೋಟೆ ಆಂಜನೇಯ ದೇವಸ್ಥಾನದ ಬಳಿ, ಯುನೆಸ್ಕೋ ಸೂಚನೆ ಮೀರಿ ಬೋರ್‌ವೆಲ್‌ ಕೊರೆಯಿಸುತ್ತಿದ್ದು, ಪ್ರವಾಸಿಗರು ಹಾಗೂ ಇತಿಹಾಸಪ್ರಿಯರಿಂದ ವಿರೋಧ ವ್ಯಕ್ತವಾಗಿದೆ.

ಹಂಪಿಯ ರಾಣಿ ಸ್ನಾನ ಗೃಹದ ಪಾರ್ಕ್ ಅಭಿವೃದ್ಧಿ ಹಿನ್ನೆಲೆಯಲ್ಲಿ ಬೋರ್‌ವೆಲ್‌, ಪೈಪ್‌ಲೈನ್‌ ಅಳವಡಿಸುವ ಯೋಜನೆಯ ಭಾಗವಾಗಿ ಈ ಬೋರ್‌ವೆಲ್‌ ಕೊರೆಯಿಸಲಾಗುತ್ತಿದೆ. ಹಂಪಿ ಪುರಾತತ್ವ ಇಲಾಖೆ ಹಾಗೂ ಬಳ್ಳಾರಿ ಜಿಲ್ಲಾಧಿಕಾರಿಗಳ ಅನುಮತಿ ಪಡೆದು ಕಮಲಪುರ ಪಟ್ಟಣ ಪಂಚಾಯಿತಿ ಈ ಕಾಮಗಾರಿ ನಿರ್ವಹಿಸುತ್ತಿದೆ.


ಹಂಪಿಯ ಸ್ಮಾರಕಗಳನ್ನು 1980ರಲ್ಲೇ ವಿಶ್ವಪರಂಪರೆ ಪಟ್ಟಿಗೆ ಸೇರ್ಪಡೆಗೊಳಿಸಿದ ಯುನೆಸ್ಕೊ, ಎಲ್ಲಸ್ಮಾರಕಗಳನ್ನು ನೈಜಸ್ವರೂಪದಲ್ಲಿ ಕಾಪಾಡುವ ಜತೆಗೆ ಧಕ್ಕೆಯಾಗದಂತೆ ಎಚ್ಚರಿಕೆ ವಹಿಸುವಂತೆ ಸೂಚಿಸಿದೆ. ಹಂಪಿಯ ಸ್ಮಾರಕಗಳಿರುವ ವಲಯವನ್ನು ಕೋರ್‌ ಹಾಗೂ ಬಫರ್‌ ಝೋನ್‌ ಎಂದು ವಿಂಗಡಿಸಲಾಗಿದೆ. ಕೋರ್‌ ಝೋನ್‌ನಲ್ಲೇ ಯಂತ್ರ ಬಳಸಿ ಬೋರ್‌ವೆಲ್‌ ಕೊರೆಯಿಸುತ್ತಿರುವುದು ಚರ್ಚೆಗೆ ಗ್ರಾಸವಾಗಿದೆ.

ಪುರಾತತ್ವ ಇಲಾಖೆ, ಜಿಲ್ಲಾಧಿಕಾರಿಗಳ ಅನುಮತಿ ಪಡೆದು ಹಂಪಿಯಲ್ಲಿಯಾವುದೇ ರೀತಿಯಲ್ಲಿಸ್ಮಾರಕಗಳಿಗೆ ಧಕ್ಕೆಯಾಗದಂತೆ ಬೋರ್‌ವೆಲ್‌ ಕೊರೆಯಿಸಲಾಗುತ್ತಿದೆ.
- ಪಿ.ಎನ್‌. ಲೋಕೇಶ್‌, ಆಯುಕ್ತರು, ಹಂಪಿ ಅಭಿವೃದ್ಧಿ ಪ್ರಾಧಿಕಾರ

ಹಂಪಿಯಲ್ಲಿ ಯಾವುದೇ ಸ್ಮಾರಕಕ್ಕೆ ಧಕ್ಕೆಯಾಗದಂತೆ ಇಲಾಖೆಗಳು ನೋಡಿಕೊಳ್ಳಬೇಕು. ಐತಿಹಾಸಿಕ ಮಹತ್ವದ ಸ್ಥಳ, ಸ್ಮಾರಕಗಳ ರಕ್ಷಣೆಗೆ ಆದ್ಯತೆ ನೀಡಬೇಕು.
- ವಿಶ್ವನಾಥ ಮಳಗಿ, ಅಧ್ಯಕ್ಷ, ವಿಜಯನಗರ ಸ್ಮಾರಕ ಸಂಸ್ಕೃತಿ ಸಂರಕ್ಷಣಾ ಸೇನೆ, ಕಮಲಾಪುರ