ಬಳ್ಳಾರಿ: ನದಿಗೆ ತೆರಳಿದ್ದ ವ್ಯಕ್ತಿ ಮೊಸಳೆಗೆ ಬಲಿ

ಸಿರುಗುಪ್ಪ (ಬಳ್ಳಾರಿ): ತಾಲೂಕಿನ ವಿನಾಯಕ ನಗರ ಕ್ಯಾಂಪ್‌ ಸಮೀಪದ ತುಂಗಭದ್ರಾ ನದಿಯ ಹರಿಗೋಲು ಘಾಟ್‌ಗೆ ಮಂಗಳವಾರ ಸ್ನಾನಕ್ಕೆ ತೆರಳಿದ್ದ ವ್ಯಕ್ತಿಯೊಬ್ಬರು, ಮೊಸಳೆಗೆ ಬಲಿಯಾಗಿದ್ದಾರೆ.

ನಗರದ 25ನೇ ವಾರ್ಡ್‌ ನಿವಾಸಿ ರೆಹಮತ್‌ ಅಲಿ (35) ಮೃತರು. ಅವರು ತನ್ನಿಬ್ಬರು ಮಕ್ಕಳೊಂದಿಗೆ ನದಿಗೆ ತೆರಳಿದ್ದರು. ಮಕ್ಕಳನ್ನು ತೆಪ್ಪದಲ್ಲಿ ಕುಳ್ಳರಿಸಿಕೊಂಡು ನದಿಯ ಮತ್ತೊಂದು ದಂಡೆ ತಲುಪಿದ್ದರು.

ನಂತರ ನದಿಯಲ್ಲಿ ಈಜಾಡಲು ಮುಂದಾದಾಗ ದಿಢೀರ್‌ ಕಾಣಿಸಿಕೊಂಡ ಮೊಸಳೆ, ರೆಹಮತ್‌ ಅಲಿ ಅವರ ಕಾಲನ್ನು ಹಿಡಿದು ಎಳೆದಿದೆ. ಸಮೀಪದಲ್ಲಿದ್ದ ಮೀನುಗಾರರು, ಸಂಜೆ ವೇಳೆ ಶವ ಹೊರತೆಗೆದರು. ಇಲ್ಲಿನ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.