ಲಂಚಕ್ಕೆ ಬೇಡಿಕೆ: ಸಂಚಾರಿ ಪೇದೆ ಬಂಧನ

ಬಳ್ಳಾರಿ; ಎಲ್ಲ ದಾಖಲೆಗಳಿದ್ದರೂ ಮಹಾರಾಷ್ಟ್ರ ಮೂಲದ ಲಾರಿ ಚಾಲಕನಿಗೆ ಲಂಚದ ಬೇಡಿಕೆ ಇಟ್ಟಿದ್ದ ಇಲ್ಲಿನ ಸಂಚಾರಿ ಪೊಲೀಸ್ ಪೇದೆ ಕೃಷ್ಣ ಅವರನ್ನು ಎಸಿಬಿ ಅಧಿಕಾರಿಗಳು ಗುರುವಾರ ಬಂಧಿಸಿದ್ದಾರೆ.

ಬುಧವಾರ ಸಂಜೆ, ಈ ಲಾರಿಯನ್ನು ಪೇದೆ ಕೃಷ್ಣ ಪರಿಶೀಲಿಸಿದ್ದರು. ಎಲ್ಲ ದಾಖಲೆಗಳಿದ್ದರೂ 8 ಸಾವಿರ ರೂ. ಲಂಚ ಕೊಡುವಂತೆ ಪಟ್ಟುಹಿಡಿದಿದ್ದರು. ಈ ಕುರಿತು ಲಾರಿ ಚಾಲಕ ಪರಮೇಶ್ವರ್ ಅವರು ಎಸಿಬಿಗೆ ದೂರು ನೀಡಿದ್ದರು. ದೂರು ಆಧರಿಸಿ, ಎಸಿಬಿ ಡಿವೈಎಸ್ಪಿ ಅರುಣ್‌ಕುಮಾರ್ ಕೋಳೂರು ನೇತೃತ್ವದ ತಂಡ, ನಿಗದಿತ ಸ್ಥಳದ ಮೇಲೆ ಗುರುವಾರ ದಾಳಿ ನಡೆಸಿತು. ಲಾರಿ ಚಾಲಕನಿಂದ ಲಂಚದ ಹಣ ಸ್ವೀಕರಿಸುತ್ತಿದ್ದಾಗ ಪೇದೆಯನ್ನು ವಶಕ್ಕೆ ಪಡೆಯಿತು. ಬಂಧಿತ ಪೇದೆಯನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.