ಕೃಷ್ಣ ಎನ್. ಲಮಾಣಿ, ಹೊಸಪೇಟೆ
ವಿಶ್ವಪರಂಪರೆ ತಾಣ ಹಂಪಿಯ ಹೇಮಕೂಟ ಪರ್ವತದ ಮೇಲಿಂದ ಸೂರ್ಯಾಸ್ತಮಾನವನ್ನು ಕಣ್ಣದುಂಬಿಕೊಳ್ಳಲು ದೇಶ-ವಿದೇಶಿ ಪ್ರವಾಸಿಗರು ಮುಗಿಬೀಳುತ್ತಿದ್ದು, ಬೆಟ್ಟದ ಪ್ರದೇಶವೇ ಈಗ ಸೂರ್ಯಸ್ತಮಾನ ವೀಕ್ಷಣೆ ತಾಣವಾಗಿ ಮಾರ್ಪಟ್ಟಿದೆ.
ವಿಜಯನಗರ ಸಾಮ್ರಾಜ್ಯ ಕಾಲದ ಸ್ಮಾರಕಗಳ ವೀಕ್ಷ ಣೆಗೆ ದೇಶ-ವಿದೇಶಿ ಪ್ರವಾಸಿಗರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿದ್ದು, ಈ ಪ್ರವಾಸಿಗರು ಈಗ ಸೂರ್ಯಾಸ್ತಮಾನವನ್ನು ವೀಕ್ಷಿಸಿ ಖುಷಿಪಡುತ್ತಿದ್ದಾರೆ. ಹಂಪಿಗೆ ಆಗಮಿಸುವ ಪ್ರವಾಸಿಗರು ಸ್ಮಾರಕಗಳ ವೀಕ್ಷ ಣೆ ಜತೆಗೆ ಸೂರ್ಯಾಸ್ತಮಾನದ ವೀಕ್ಷ ಣೆಯನ್ನು ಮಾತ್ರ ತಪ್ಪಿಸಿಕೊಳ್ಳುತ್ತಿಲ್ಲ. ಅದರಲ್ಲೂ ರಷ್ಯ, ಇಟಲಿ, ಅಮೆರಿಕ, ಇಂಗ್ಲೆಂಡ್, ಜಪಾನ್, ಸ್ವಿಝರ್ಲ್ಯಾಂಡ್, ಸ್ಪೇನ್, ಇಸ್ರೇಲ್ನಿಂದ ಆಗಮಿಸುವ ಪ್ರವಾಸಿಗರಂತೂ ಸೂರ್ಯಾಸ್ತಮಾನವನ್ನು ವೀಕ್ಷಿಸಲು ಹಾತೋರೆಯುತ್ತಿದ್ದಾರೆ. ಈ ಪ್ರವಾಸಿಗರು ಪ್ರವಾಸಿ ಮಾರ್ಗದರ್ಶಿಗಳಲ್ಲಿ ಸೂರ್ಯಾಸ್ತಮಾನ ವೀಕ್ಷ ಣೆಗೆ ಬೇಡಿಕೆ ಇಡುತ್ತಿದ್ದಾರೆ. ಹಂಪಿಯ ಹೇಮಕೂಟ ಪರ್ವತದ ಬಳಿ ಸೂರ್ಯಾಸ್ತಮಾನ ವೀಕ್ಷಿಸುವ ಪ್ರವಾಸಿಗರು, ರವಿಯ ಜತೆಗೆ ಸೆಲ್ಫಿ ತೆಗೆಸಿಕೊಳ್ಳಲು ಹಾತೋರೆಯುತ್ತಿದ್ದಾರೆ. ಪ್ರವಾಸಿಗರ ಸೆಲ್ಫಿ ಸ್ಟಿಕ್ಗಳೊಂದಿಗೆ ಮೊಬೈಲ್ಗಳಲ್ಲಿ ಸೆಲ್ಫಿ ತೆಗೆಯುವುದು ಸಾಮಾನ್ಯವಾಗಿದೆ.
ಹಂಪಿಯ ಸಾಸಿವೆಕಾಳು ಗಣಪತಿ ಹಾಗೂ ಶ್ರೀ ವಿರೂಪಾಕ್ಷೇಶ್ವರ ದೇಗುಲಗಳ ಮಧ್ಯೆ ಇರುವ ಹೇಮಕೂಟ ಪರ್ವತ ಪ್ರದೇಶದಲ್ಲಿ ದೇಶ-ವಿದೇಶಿ ಪ್ರವಾಸಿಗರು ಸೂರ್ಯಾಸ್ತಮಾನ ವೀಕ್ಷಿಸಲು ಹೆಚ್ಚಿನ ಸಂಖ್ಯೆಯಲ್ಲಿ ಜಮಾಯಿಸುತ್ತಿದ್ದಾರೆ. ಬಂಡೆಗಳ ರಮಣೀಯ ಸೊಬಗಿನ ಸ್ಥಳದಲ್ಲಿ ಕುಳಿತು; ಸೂರ್ಯಾಸ್ತಮಾನದ ಸವಿಯನ್ನು ಸವಿಯುತ್ತಿದ್ದಾರೆ.
ದೇಶದ ನಾನಾ ರಾಜ್ಯಗಳಿಂದ ಹಾಗೂ ಕರ್ನಾಟಕದ ನಾನಾ ಜಿಲ್ಲೆಗಳಿಂದ ಆಗಮಿಸುವ ದೇಶೀ ಪ್ರವಾಸಿಗರು ಕೂಡ ಸೂರ್ಯಾಸ್ತಮಾನವನ್ನು ವೀಕ್ಷಿಸಿ; ಪುಳಕಿತರಾಗುತ್ತಿದ್ದಾರೆ. ದೇಶ-ವಿದೇಶಿಗಳಿಂದ ಆಗಮಿಸುವ ಪ್ರವಾಸಿಗರು ಸೂರ್ಯಾಸ್ತಮಾನವನ್ನು ತಮ್ಮ ಕ್ಯಾಮೆರಾ ಕಣ್ಣಿನಲ್ಲಿ ಸೆರೆಹಿಡಿಯುತ್ತಾರೆ.
ತಂಡೋಪತಂಡ: ಹಂಪಿಯ ಶ್ರೀ ವಿರೂಪಾಕ್ಷೇಶ್ವರ ದೇಗುಲ, ಸಾಸಿವೆಕಾಳು ಗಣಪತಿ ಮಂಟಪ, ಕಡಲೆಕಾಳು ಕಲ್ಲಿನತೇರು, ವಿಜಯ ವಿಠ್ಠಲ್, ಕಮಲ ಮಹಲ್, ಆನೆಲಾಯ, ಮಹಾನವಮಿ ದಿಬ್ಬ, ರಾಣಿಯರ ಸ್ನಾನಗೃಹ ಸೇರಿದಂತೆ ನಾನಾ ಸ್ಮಾರಕಗಳ ಸೊಬಗನ್ನು ಸವಿಯಲು ದಟ್ಟಣೆಯಿರುತ್ತದೆ. ಹೇಮಕೂಟ ಪರ್ವತ ಪ್ರದೇಶದಲ್ಲಿ ಸೂರ್ಯಾಸ್ತಮಾನದ ವೀಕ್ಷ ಣೆಗೆ ತಂಡೋಪತಂಡವಾಗಿ ಆಗಮಿಸುವ ಪ್ರವಾಸಿಗರು, ಒಂದೆಡೆ ಸೇರಿ ಸಂಭ್ರಮಿಸುವುದರ ಜತೆಗೆ, ಸೂರ್ಯಾಸ್ತಮಾನವನ್ನು ವೀಕ್ಷಿಸಿ, ಉಲ್ಲಸಿತರಾಗುತ್ತಿದ್ದಾರೆ. ಕೊನೆ ಗಳಿಗೆಯಲ್ಲಿ ಗೈಡ್ಗಳು ಆಗಮಿಸಿ, ಸೂರ್ಯಸ್ತಮಾನವನ್ನು ಜೋಡಿಸಿಕೊಂಡು ಹಂಪಿಯನ್ನು ವರ್ಣೀಸುತ್ತಾರೆ.
........
ಹಂಪಿಯ ಸ್ಮಾರಕಗಳ ವೀಕ್ಷ ಣೆ ಜತೆಗೆ ಸೂರ್ಯಾಸ್ತಮಾನ ವೀಕ್ಷಿಸುತ್ತಿದ್ದೇವೆ. ಈ ಭಾಗದಲ್ಲಿ ಸೆಲ್ಫಿ ತೆಗೆದುಕೊಳ್ಳುವುದು ಬಲುಇಷ್ಟ. ಹೀಗಾಗಿ ಸ್ಮಾರಕಗಳನ್ನು ನೋಡಿದ ಬಳಿಕವೇ, ಸೂರ್ಯಾಸ್ತಮಾನ ವೀಕ್ಷಿಸಲು ಬರುತ್ತೇವೆ.
-ಲಾರೆನ್, ಎಲಿನಾ ವಿದೇಶಿ ಪ್ರವಾಸಿಗರು
ಹಂಪಿಯಲ್ಲಿ ಸೂರ್ಯಾಸ್ತಮಾನ ಸೊಗಸಾಗಿ ಕಾಣುತ್ತದೆ. ಮೋಡಗಳು ಅಡ್ಡಿಪಡಿಸುವುದಿಲ್ಲ. ಆಗಸದಲ್ಲಿ ಮೋಡ ಮುಸುಕುವುದು, ಕಡಿಮೆ. ಸೂರ್ಯಾಸ್ತಮಾನ ವೀಕ್ಷ ಣೆಗೆ ಹೇಮಕೂಟ ಪರ್ವತ ಪ್ರದೇಶ ಹೇಳಿ ಮಾಡಿಸಿದ ಸ್ಥಳವಾಗಿದೆ.
-ರವಿಕಿರಣ್, ಎನ್. ಮಹೇಶ್, ದೇಶೀ ಪ್ರವಾಸಿಗರು