‘ಮತದಾನದಿಂದ ತಪ್ಪಿಸಿಕೊಳ್ಳಬೇಡಿ’

ಸಿರುಗುಪ್ಪ : ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಮತದಾನ ಪ್ರತಿಯೊಬ್ಬರ ಕರ್ತವ್ಯ.ಯಾವುದೇ ಕಾರಣಕ್ಕೂ ಮೇ12ರಂದು ಮತ ಹಾಕದೇ ಹೊರಗೆ ಉಳಿಯಬಾರದು. ಕರ್ತವ್ಯ ಪಾಲನೆ ಮಾಡಬೇಕು ಎಂದು ಸ್ವೀಪ್‌ ಸಮಿತಿ ಮುಖ್ಯಸ್ಥ ಶಿವಪ್ಪ ಸುಬೇದಾರ್‌ ಹೇಳಿದರು.

ನಗರದ ತಾಲೂಕು ಪಂಚಾಯಿತಿ ಆವರಣದಲ್ಲಿ ಸೋಮವಾರ ಜಾಗೃತಿ ಜಾಥಾಕ್ಕೆ ಚಾಲನೆ ನೀಡಿ ಮಾತನಾಡಿದರು. ದೇಶ ಮತ್ತು ರಾಜ್ಯದ ಅಭಿವೃದ್ಧಿಗೆ ಕಾರ್ಯಾಂಗದ ಪರಿಶ್ರಮ ಅತ್ಯವಶ್ಯ. ಅಂತಹ ಕಾರ್ಯಾಂಗವನ್ನು ಸದೃಢಗೊಳಿಸಲು ತಪ್ಪದೇ ಮತ ಚಲಾಯಿಸಬೇಕು. ಆಮಿಷಗಳಿಗೆ ಮಾರು ಹೋಗಬಾರದು. ಬಿಡಿಗಾಸಿಗೆ ಆಸೆ ಬೀಳದೇ ಮತ ಮೌಲ್ಯವನ್ನು ಅರಿತು ಚಲಾಯಿಸಬೇಕು ಎಂದರು. ಗ್ರಾ.ಪಂ.ವ್ಯಾಪ್ತಿಯ ಪ್ರತಿ ಗ್ರಾಮಗಳಲ್ಲೂ ಮತದಾನ ಜಾಗೃತಿ ಮೂಡಿಸುವ ಜಾಥಾ ನಡೆಸಲಾಗುತ್ತಿದೆ ಎಂದರು. ಸ್ವೀಪ್‌ ಸಮಿತಿ ಸದಸ್ಯ ವಿಜಯರಂಗಾರೆಡ್ಡಿ ಸೇರಿದಂತೆ ಇತರರು ಇದ್ದರು.