ಹಂಪಿಯಲ್ಲಿ ವಿದೇಶಿಗರ ಭರ್ಜರಿ ಹೋಳಿ ಸಂಭ್ರಮ

ಹೊಸಪೇಟೆ: ವಿಶ್ವ ವಿಖ್ಯಾತ ಹಂಪಿಯ ವಿರೂಪಾಕ್ಷೇಶ್ವರ ದೇವಸ್ಥಾನ ಮುಂಭಾಗದಲ್ಲಿ ವಿದೇಶಿಗರು ಸ್ಥಳೀಯರೊಂದಿಗೆ ಬೆರೆತು ಹೋಳಿ ಹಬ್ಬವನ್ನು ಗುರುವಾರ ಸಂಭ್ರಮದಿಂದ ಆಚರಿಸಿದರು.

ಪರಸ್ಪರ ಬಣ್ಣ ಎರಚಿಕೊಂಡು ಸಂಭ್ರಮಿಸುತ್ತಿರುವುದನ್ನು ಜನ ಕುತೂಹಲದಿಂದ ವೀಕ್ಷಿಸಿದರು. ತಮಟೆ, ವಾದ್ಯಗಳಿಗೆ ವಿದೇಶಿಗರು ಹೆಜ್ಜೆ ಹಾಕಿದಾಗ ಇತರರು ಸಾಥ್‌ ನೀಡಿದರು. ಹಂಪಿಯಲ್ಲಿ ಬೆಳಗಿನ ಹೊತ್ತು ಆರಂಭವಾದ ಹೋಳಿ ರಂಗು ಮಧ್ಯಾಹ್ನ 2 ಗಂಟೆವರೆಗೂ ಮುಂದುವರಿಯಿತು.

ಒಬ್ಬರ ಮೇಲೊಬ್ಬರು ನಿಂತು ನೃತ್ಯ ಮಾಡಿದ್ದು, ಗಮನ ಸೆಳೆಯಿತು. ವಿದೇಶಿ ಮಹಿಳೆಯರು ಚೂಡಿದಾರ ಧರಿಸಿ ಬಣ್ಣದೋಕುಳಿಯಲ್ಲಿ ಮಿಂದೆದ್ದರು. ಬಳಿಕ ವಿರೂಪಾಕ್ಷೇಶ್ವರ ದೇವಸ್ಥಾನ ಎಡಭಾಗದಲ್ಲಿರುವ ತುಂಗಭದ್ರಾ ನದಿಗೆ ತೆರಳಿ ಸ್ನಾನ ಮಾಡಿದರು.