ನಾಲ್ಕು ಪಾದ, ಮೂರು ಕಾಲಿನ ಮಗು ಜನನ

ಕಂಪ್ಲಿ (ಬಳ್ಳಾರಿ): ಇಲ್ಲಿನ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಸೋಮವಾರ ರಾತ್ರಿ ಮಹಿಳೆಯೊಬ್ಬರು, ನಾಲ್ಕು ಪಾದ, ಮೂರು ಕಾಲುಗಳುಳ್ಳ ಗಂಡು ಮಗುವಿಗೆ ಜನ್ಮನೀಡಿದ್ದಾರೆ.

ಈ ಮಹಿಳೆಗೆ ಇದು ಮೊದಲ ಹೆರಿಗೆಯಾಗಿದೆ. ಮಗು 3.400ಕಿ.ಗ್ರಾಂ. ತೂಕವಿದ್ದು ಆರೋಗ್ಯ ಉತ್ತಮವಾಗಿದೆ. ಮಗುವಿನ ತಲೆ, ಬಾಯಿ, ಕಣ್ಣು, ಕತ್ತು, ಎಡಗಾಲು, ಕೈ ಕಾಲು ಬೆರಳು ಸೇರಿ ಎಲ್ಲ ಅಂಗಾಂಗಗಳು ಸಾಮಾನ್ಯವಾಗಿವೆ. ಆದರೆ, ಬಲಗಾಲು ಮಾತ್ರ ಸೊಟ್ಟಗಿದ್ದು, ಅದರ ಪಕ್ಕದಲ್ಲೇ ಇನ್ನೊಂದು ಕಾಲು ಬೆಳೆದಿದೆ. ಈ ಕಾಲಿಗೆ ಎರಡು ಪಾದಗಳಿವೆ.

ಸಮುದಾಯ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ.ಚಂದ್ರಮೋಹನ್ ಪ್ರತಿಕ್ರಿಯಿಸಿ, ‘‘ಸಾಮಾನ್ಯವಾಗಿ ಸಂಬಂಧ (ಕಳ್ಳುಬಳ್ಳಿ)ದಲ್ಲಿ ಮದುವೆಯಾದರೆ ಇಂತಹ ಮಕ್ಕಳು ಜನಿಸುವ ಸಂಭವ ಹೆಚ್ಚು. ಮಗುವಿನ ಆರೋಗ್ಯ ಉತ್ತಮವಾಗಿದೆ. ಮಗುವಿಗೆ ಚಿಕಿತ್ಸೆ ಕೊಡಿಸಿದರೆ ಸೊಟ್ಟಗಿನ ಕಾಲು ಸರಿಪಡಿಸಬಹುದಾಗಿದೆ. ಈ ಬಗ್ಗೆ ಮೂಳೆ ತಜ್ಞರ ನೆರವು ಪಡೆಯಬೇಕಿದೆ’’ ಎಂದರು.