ಹಂಪಿ: ಸ್ಮಾರಕಗಳ ವೀಕ್ಷಣೆ ದರ ದಿಢೀರ್ ಹೆಚ್ಚಳ

ಹೊಸಪೇಟೆ; ಹಂಪಿಯ ಸ್ಮಾರಕಗಳ ವೀಕ್ಷಣೆ ದರವನ್ನು ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆ 2016, ಏಪ್ರಿಲ್ 1ರಿಂದ ಅನ್ವಯವಾಗುವಂತೆ ಗಣನೀಯ ಹೆಚ್ಚಳಮಾಡಿದೆ.

ವಿಜಯ ವಿಠ್ಠಲ ದೇವಸ್ಥಾನ, ಕಮಲ ಮಹಲ್ ಹಾಗೂ ಮ್ಯೂಸಿಯಂ ವೀಕ್ಷಣೆಗೆ ದೇಶೀ ಪ್ರವಾಸಿಗರು ತಲಾ ತಲಾ 10 ರೂ. ನೀಡಬೇಕಿತ್ತು. ಆದರೆ, ಈಗ ತಲಾ 30ರೂ. ದರ ಭರಿಸಬೇಕಿದೆ. ಕುರುಗೋಡಿನಿಂದ ತಮ್ಮ ಕುಟುಂಬದವರೊಂದಿಗೆ ಆಗಮಿಸಿದ್ದ ಪ್ರವಾಸಿ ನಿಂಗಜ್ಜ ಪ್ರತಿಕ್ರಿಯಿಸಿ, ‘‘ಒಂದು ಗುಡಿ ನೋಡಾಕ ಇದುವರೆಗೆ 10ರೂ. ಕೊಡೋದು ಕಷ್ಟ ಇರ‌್ಲಿಲ್ಲ. ಈಗ ನೋಡಿದ್ರ 30ರೂ. ಅಂತ ಕೇಳಾಕ ಹತ್ಯಾರ. ಇಲ್ಲಿಗೆ ಬಂದೀವಿ ಅಂದ ಮ್ಯಾಲ ಅನಿವಾರ್ಯವಾಗಿ ವಿರೂಪಾಕ್ಷ ದೇವರ ದರ್ಶನ ತಗಂಡು ಊರಿಗೆ ವಾಪಸ್ ಹೋಗಿಬುಡ್ತೀವಿ’’ ಎಂದರು.

ವಿದೇಶಿ ಪ್ರವಾಸಿಗರು ತಲಾ 250ರೂ. ಬದಲಾಗಿ 750ರೂ. ದರ ನೀಡಬೇಕಿದೆ. ಕೆಲವು ಪ್ರವಾಸಿಗರು, ಸ್ಮಾರಕಗಳ ವೀಕ್ಷಣೆ ದರ ದಿಢೀರ್ ಹೆಚ್ಚಿದ್ದರಿಂದ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಕೆಲವರು, ಸ್ಮಾರಕಗಳ ಹೊರಭಾಗದಲ್ಲೇ ಸುತ್ತತ್ತ ಕಾಲ ಕಳೆದರು. ರಷ್ಯಾ ಪ್ರವಾಸಿಗರಾದ ವಿಕ್ಟೋರಿಯಾ, ಮಾರಿಯಾ ಹಾಗೂ ಎವಿಲಿನಾ, ಸ್ಮಾರಕಗಳನ್ನು ವೀಕ್ಷಿಸದೇ ಮರಳಿದರು.