ಹಂಪಿಯಲ್ಲಿ ಹೋಳಿ ಸಂಭ್ರಮ

ಹೊಸಪೇಟೆ; ಹಂಪಿಯಲ್ಲಿ ದೇಶ, ವಿದೇಶದ ಪ್ರವಾಸಿಗರು ಸ್ಥಳೀಯರ ಜತೆಗೂಡಿ ಶುಕ್ರವಾರ ಪರಸ್ಪರ ಬಣ್ಣ ಎರಚಿಕೊಂಡು ಹೋಳಿಯನ್ನು ಸಂಭ್ರಮದಿಂದ ಆಚರಿಸಿದರು.

ಸ್ಮಾರಕಗಳ ವೀಕ್ಷಣೆಗೆ ಕಳೆದ ನಾಲ್ಕೈದು ದಿನಗಳಿಂದ ಹಂಪಿಯಲ್ಲಿ ಬೀಡುಬಿಟ್ಟಿದ್ದ ವಿದೇಶಿ ಪ್ರವಾಸಿಗರು ಹೋಳಿ ಬಣ್ಣಗಳಲ್ಲಿ ಮಿಂದೆದ್ದರು. ಸ್ಥಳೀಯ ಮಕ್ಕಳು, ಯುವಕರು ಹಾಗೂ ಸಾರ್ವಜನಿಕರೊಂದಿಗೆ ಬಣ್ಣದೋಕುಳಿಯಾಡಿ ಸಂಭ್ರಮಿಸಿದರು. ಶ್ರೀವಿರೂಪಾಕ್ಷೇಶ್ವರ ದೇಗುಲ ಮುಂಭಾಗ, ರಾಜಬೀದಿ, ನದಿ ಪ್ರದೇಶ, ಎದುರು ಬಸವಣ್ಣ, ಬಸ್ ನಿಲ್ದಾಣ, ಗ್ರಾಮ ಪಂಚಾಯಿತಿ ಕಚೇರಿ, ಕಡಲೆಕಾಳು, ಸಾಸಿವೆ ಕಾಳು ಗಣಪತಿ ಪ್ರದೇಶ ಸೇರಿ ಕಮಲಾಪುರ ಹಾಗೂ ಕಡ್ಡಿರಾಂಪುರದ ಮಾರ್ಗಗಳಲ್ಲಿ ಬಣ್ಣದಾಟವಾಡುತ್ತಿದ್ದ ಪ್ರವಾಸಿಗರ ದಂಡೇ ಕಂಡುಬಂತು. ರಂಗು ರಂಗಿನ ಬಣ್ಣಗಳ ಖರೀದಿ ಜೋರಾಗಿತ್ತು. ಹೋಳಿ ಆಚರಣೆ ಹಿನ್ನೆಲೆಯಲ್ಲಿ ಪೊಲೀಸರು ಬಿಗಿ ಬಂದೋಬಸ್ತ್ ಕೈಗೊಂಡಿದ್ದರು.

‘‘ವಿದೇಶದಲ್ಲಿ ನಾನಾ ಆಚರಣೆ ಮಾಡಲಾಗುತ್ತದೆ. ಆದರೆ, ಭಾರತದಲ್ಲಿ ಬಣ್ಣದ ಆಚರಣೆಗೂ ಒಂದು ವಿಶಿಷ್ಟ ದಿನ ಇರುವುದು ಸಂತಸ ತಂದಿದೆ. ಉತ್ತಮ ಬಣ್ಣ ಹಚ್ಚಿಕೊಳ್ಳುವುದರಿಂದ ದೇಹ ತಂಪಾಗಲಿದೆ. ಬಣ್ಣದಾಟದಿಂದ ಮನುಷ್ಯರಲ್ಲಿನ ಭಿನ್ನಾಭಿಪ್ರಾಯಗಳು ಮರೆಮಾಚುತ್ತವೆ. ಹೊಸ ಸಂಬಂಧ ವದ್ಧಿಸುವ ಚೈತನ್ಯ ಬಣ್ಣಗಳಿಗಿದೆ’’ ಎಂದು ಅರ್ಜೆಂಟೈನಾದ ರಿಶಾ ಹಾಗೂ ಏನಾ ಅವರು ಬಣ್ಣದಾಟದ ಸಂತಸ ಹಂಚಿಕೊಂಡರು.