‘ಮದ್ಯವ್ಯಸನಿಗಳಿಂದ ಅಪರಾಧ ಹೆಚ್ಚಳ’

ಹಗರಿಬೊಮ್ಮನಹಳ್ಳಿ; ಮದ್ಯವ್ಯಸನಿಗಳಿಂದ ಅಪರಾಧದ ಸಂಖ್ಯೆ ಏರಿಕೆಯಾಗುತ್ತಿರುವುದು ಆತಂಕಕಾರಿಯಾಗಿದೆ ಎಂದು ಸಿವಿಲ್‌ ನ್ಯಾಯಾಧೀಶ ವಿಜಯಕುಮಾರ್‌ ಎಸ್‌.ಜಟ್ಲಾ ಹೇಳಿದರು.

ಪಟ್ಟಣದ ಸರಕಾರಿ ಪದವೀ ಪೂರ್ವ ಕಾಲೇಜಿನಲ್ಲಿ ಮಂಗಳವಾರ ನಡೆದ ಅಂತಾ ರಾಷ್ಟ್ರೀಯ ಮಾದಕ ದ್ರವ್ಯ ಸೇವನೆ ವಿರೋಧಿ ದಿನಾಚರಣೆ ಉದ್ಘಾಟಿಸಿ ಮಾತನಾಡಿದರು. ಗ್ರಾಮೀಣ ಪ್ರದೇಶಗಳಲ್ಲಿ ಪರವಾನಗಿ ರಹಿತ ಮದ್ಯ ಮಾರಾಟ ತಡೆಗೆ ಪೊಲೀಸರು ಸೂಕ್ತ ಕ್ರಮ ಕೈಗೊಳ್ಳಬೇಕಿದೆ. ಮದ್ಯದ ಅಮಲಿನಲ್ಲಿ ಶಾಂತಿಭಂಗವಾಗುತ್ತಿರುವುದನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಶಾಂತಿಸಭೆ ನಡೆಸಿ, ದುಶ್ಚಟದ ಪರಿಣಾಮಗಳನ್ನು ಕುರಿತಂತೆ ಜಾಗೃತಿ ಮೂಡಿಸಬೇಕಿದೆ ಎಂದರು. ಡಾ.ಪೂರ್ಣಿಮಾ ಶಶಿಧರ, ಕುಡಿತದ ಅಡ್ಡಪರಿಣಾಮ ಕುರಿತು ಉಪನ್ಯಾಸ ನೀಡಿದರು. ಪಿಎಸ್‌ಐ ಪುಲ್ಲಯ್ಯ ರಾಥೋಡ್‌, ತಾಲೂಕು ವಕೀಲರ ಸಂಘದ ಅಧ್ಯಕ್ಷ ಜಾಣ ಶಿವಾನಂದ, ಗೌರವ ಅಧ್ಯಕ್ಷ ಬಿ.ವಿ.ಶಿವಯೋಗಿ, ಕಾರ್ಯದರ್ಶಿ ಟಿ.ಜಿ.ಎಂ.ಕೊಟ್ರೇಶ್‌, ಉಪಾಧ್ಯಕ್ಷ ಲಿಂಗನಗೌಡ, ಸಂಘದ ಗಂಗಾಧರ, ಪ್ರಾಂಶುಪಾಲ ರಾಮಕೃಷ್ಣ ಇದ್ದರು. ಉಪನ್ಯಾಸಕರಾದ ಬಸವರಾಜ, ಖಾಸೀಂ ಸಾಹೇಬ್‌, ಟಿ.ಹಾಲಪ್ಪ ನಿರ್ವಹಿಸಿದರು.