ಅಧಿಕಾರಿಗಳ ಸಂಧಾನ ಸಕ್ಸಸ್; ಮತದಾನಕ್ಕೆ ತೆರಳಿದ ಮುದ್ಲಾಪುರ ಗ್ರಾಮಸ್ಥರು

ಬಳ್ಳಾರಿ: ಮೂಲಭೂತ ಸೌಕರ್ಯಗಳ ಕೊರತೆ ಹಾಗೂ ಪಟ್ಟಾ , ರೈಲ್ವೆ ಸೇತುವೆ ನಿರ್ಮಾಣ ಸೇರಿದಂತೆ ಇನ್ನಿತರ ಹಲವಾರು ಬೇಡಿಕೆಗಳನ್ನು ಮುಂದಿಟ್ಟುಕೊಂಡು ಮತದಾನ ಬಹಿಷ್ಕಾರ ನಡೆಸಿದ ಬಳ್ಳಾರಿ ಜಿಲ್ಲೆಯ ವಿಜಯನಗರ ಕ್ಷೇತ್ರದ ಮುದ್ಲಾಪುರ ಗ್ರಾಮಸ್ಥರು ಕೊನೆಗೂ ಮನದಾನ ಮಾಡಲು ಒಪ್ಪಿದ್ದಾರೆ.

ಗ್ರಾಮದಲ್ಲಿ ಹಲವಾರು ಸಮಸ್ಯೆಗಳಿದ್ದು ಜನಪ್ರತಿನಿಧಿಗಳು ಪರಿಹಾರ ನೀಡುತ್ತಿಲ್ಲ ಎಂದು ಆರೋಪಿಸಿ ಗ್ರಾಮಸ್ಥರು ಉಪಚುನಾವಣೆಯಲ್ಲಿ ಮತದಾನ ಮಾಡದಿರಲು ನಿರ್ಧಾರ ಮಾಡಿದ್ದರು. ಮತದಾನದ ದಿನದಂದು ಮತಗಟ್ಟೆಗೆ ತೆರಳದೆ ಪ್ರತಿಭಟನೆ ನಡೆಸುವ ಮೂಲಕ ತಮ್ಮ ಆಕ್ರೋಶ ವ್ಯಕ್ತಪಡಿಸಿದರು.

ಮತದಾರ ಪ್ರಭುವಿನ ಕೈಯಲ್ಲಿದೆ 'ಬ್ರಹ್ಮಾಸ್ತ್ರ' : ಅಭ್ಯರ್ಥಿಗಳ ಎದೆಯಲ್ಲಿ ಢವಢವ

ಗ್ರಾಮಸ್ಥರ ಆಕ್ರೋಶ ಹಾಗೂ ಮತದಾನ ಬಹಿಷ್ಕಾರದ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ವಿಜಯನಗರ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಆನಂದ್ ಸಿಂಗ್ ಮನವೋಲಿಕೆಗೆ ಬಂದರೂ ಗ್ರಾಮಸ್ಥರು ಇದಕ್ಕೆ ಜಗ್ಗಲಿಲ್ಲ. ಆನಂದ್ ಸಿಂಗ್ ಭೇಟಿಗೆ ಸ್ಥಳದಲ್ಲಿದ್ದ ಕಾಂಗ್ರೆಸ್ ಕಾರ್ಯಕರ್ತರು ಇದೇ ವೇಳೆ ವಿರೋಧ ವ್ಯಕ್ತಪಡಿಸಿದರು.

ಉಪ ಸಮರ: ಮತದಾನದ ವಿವಿಧ ಚಿತ್ರ ಸಂಪುಟ

ಬಳಿಕ ಸ್ಥಳಕ್ಕೆ ಆಗಮಿಸಿದ ಉಪವಿಭಾಗಾಧಿಕಾರಿ ಹಾಶೀಂ ತನ್ವೀರ್ ಶೇಖ್ ಗ್ರಾಮಸ್ಥರಿಗೆ ಭರವಸೆ ನೀಡಿದ ಮೇರೆಗೆ ಬಹಿಷ್ಕಾರ ವಾಪಸ್ ಪಡೆದುಕೊಂಡರು. ಸುಮಾರು 1300 ಕ್ಕೂ ಹೆಚ್ಚು ಮತಗಳು ಈ ಗ್ರಾಮದಲ್ಲಿದ್ದು ಅಧಿಕಾರಿಗಳ ಸಂಧಾನದ ಬಳಿಕ ಮತದಾನ ಮಾಡಲು ತೆರಳಿದರು. ವಿಜಯನಗರ ವಿಧಾನಸಭಾ ಕ್ಷೇತ್ರದಲ್ಲಿ 11 ಗಂಟೆಯ ವರೆಗೆ 20.03% ಮತದಾನವಾಗಿದೆ.