ಬಾಲಕಿಯ ಉಪವಾಸಕ್ಕೆ ಮಣಿದು ಶೌಚಾಲಯ ನಿರ್ಮಿಸಿದ ಪಂಚಾಯತ್‌

ಬಳ್ಳಾರಿ: ಏಳನೇ ತರಗತಿಯ ವಿದ್ಯಾರ್ಥಿನಿಯೊಬ್ಬಳು ಶೌಚಾಲಯ ನಿರ್ಮಾಣಕ್ಕೆ ಆಗ್ರಹಿಸಿ ಸಿರಗುಪ್ಪ ತಾಲೂಕಿನ ತಲೂರ್‌ ಗ್ರಾಮದಲ್ಲಿ ಎರಡು ದಿನ ಊಟ, ನೀರು ಬಿಟ್ಟು ಪ್ರತಿಭಟನೆ ನಡೆಸಿ, ಶೌಚಾಲಯ ನಿರ್ಮಾಣ ಮಾಡಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾಳೆ.

ಗ್ರಾಮ ಪಂಚಾಯತ್‌ನಲ್ಲಿ ನಡೆದ ಜಾಗೃತಿ ಕಾರ್ಯಕ್ರಮದಲ್ಲಿ ಶೌಚಾಲಯದ ಅಗತ್ಯ, ಮಹತ್ವ ತಿಳಿದ ವಿದ್ಯಾರ್ಥಿನಿ ಎಚ್‌. ಮಹಾಂಕಾಳಿ ಮನೆಯಲ್ಲಿ ಶೌಚಾಲಯ ನಿರ್ಮಿಸಬೇಕು ಎಂದು ಒತ್ತಾಯಿಸಿ ಊಟ, ನೀರು ತ್ಯಜಿಸಿದ್ದಳು. ಈಗ ಈಕೆ ಗ್ರಾಮದಲ್ಲಿ ಮಾದರಿ ಬಾಲಕಿ.

ಈಕೆಯ ಮನೆಗೆ 2015-16ರಲ್ಲಿ ಶೌಚಾಲಯ ಮಂಜೂರಾಗಿತ್ತು. ಆದರೆ ಅದು ಸಿಕ್ಕಿರಲಿಲ್ಲ. ಈ ಬಗ್ಗೆ ಪೋಷಕರು ಬಾಲಕಿಗೆ ತಿಳಿ ಹೇಳಿದರೂ ಆಕೆ ಒಪ್ಪದೆ ಉಪವಾಸ ಮುಂದುವರಿಸಿದ್ದಳು. ಪರೀಕ್ಷೆ ಹತ್ತಿರವಿರುವಾಗ ಉಪವಾಸ ಮಾಡಿದರೆ ಆರೋಗ್ಯ ಕೆಡುವುದಾಗಿ ಹೇಳಿದರೂ ಬಾಲಕಿ ಕೇಳಲಿಲ್ಲ. ವಿಷಯ ಗ್ರಾಮ ಪಂಚಾಯತ್‌ಗೆ ತಿಳಿದ ಬಳಿಕ ಪಂಚಾಯತ್‌ ಸದಸ್ಯರು ಆಕೆಯ ಮನವೊಲಿಸಲು ಮುಂದಾದರೂ ಪ್ರಯೋಜನವಾಲಿಲ್ಲ. ಕೊನೆಗೆ ಅಧಿಕಾರಿಗಳು ಆಕೆಯ ಮನೆಯಲ್ಲಿ ಶೌಚಾಲಯ ನಿರ್ಮಾಣ ಕಾರ್ಯ ಆರಂಭಿಸಿ ಮುಗಿಸಿಬಿಟ್ಟರು.