ಹಳ್ಳಕ್ಕೆ ಉರುಳಿಬಿದ್ದ ಲಾರಿ: ಪ್ರಯಾಣಿಕರು ಪಾರು

ಸಿರುಗುಪ್ಪ: ತಾಲೂಕಿನ ರಾರಾವಿ ಗ್ರಾಮದ ಬಳಿಯಿರುವ ಯಲ್ಲಮ್ಮನ ಹಳ್ಳ ಮತ್ತು ಲಕ್ಷ ್ಮಮ್ಮನ ಹಳ್ಳ, ಭಾನುವಾರ ರಾತ್ರಿ ಸುರಿದ ಮಳೆಯಿಂದ ತುಂಬಿಬಂದು, ನೆಲಮಟ್ಟದ ಸೇತುವೆ ಮುಳುಗಿದ್ದರಿಂದ, ಸರಕು ತುಂಬಿಕೊಂಡು ಹೊರಟಿದ್ದ ಲಾರಿಗಳು ಉರುಳಿಬಿದ್ದ ಘಟನೆ ಸೋಮವಾರ ಬೆಳಗ್ಗೆ ನಡೆದಿದೆ.

ಖಾಸಗಿ ಬಸ್‌ ಚಾಲಕರೊಬ್ಬರು ಹಳ್ಳದ ನೀರಲ್ಲಿ ವಾಹನ ದಾಟಿಸಲು ಹೋಗಿ ನೀರಲ್ಲಿ ವಾಹನ ಸಿಲುಕಿದೆ. ಇದನ್ನು ಗಮನಿಸಿದ ಪ್ರತ್ಯಕ್ಷದರ್ಶಿಗಳು ಹಾಗೂ ಗ್ರಾಮಸ್ಥರು ನೆರವಿಗೆ ಧಾವಿಸಿ ಪ್ರಯಾಣಿಕರನ್ನು ರಕ್ಷಿಸಿದ ಘಟನೆ ನಡೆದಿದೆ. ಸಿರುಗುಪ್ಪದಿಂದ ನೆರೆಯ ಸೀಮಾಂಧ್ರದ ಆದೋನಿಗೆ ಸಂಪರ್ಕ ಕಲ್ಪಿಸುವ ಲಕ್ಷ ್ಮಮ್ಮ ದೇವಸ್ಥಾನ ಇರುವ ಹಿರೇಹಳ್ಳ ತುಂಬಿ ಬಂದಿದ್ದರಿಂದ ಸಂಪರ್ಕ ಕಡಿತಗೊಂಡಿದೆ. ವಿಷಯ ತಿಳಿಯುತ್ತಿದ್ದಂತೆ ಸಿರುಗುಪ್ಪ ಠಾಣೆ ಸಿಪಿಐ ಮೌನೇಶ ಮಾಲಿಪಾಟೀಲ್‌, ಪಿಎಸ್‌ಐ ಹೊಸಕೇರಪ್ಪ ಹಾಗೂ ಸಿಬ್ಬಂದಿ ಘಟನಾ ಸ್ಥಳಕ್ಕೆ ಭೇಟಿ ನೀಡಿ, ಮುಂಜಾಗೃತೆ ಕ್ರಮ ಕೈಗೊಂಡರು. ನಂತರ ಸ್ಥಳಕ್ಕೆ ತಹಸೀಲ್ದಾರ್‌ ದಯಾನಂದ ಪಾಟೀಲ್‌ ಭೇಟಿ ನೀಡಿ ಪರಿಶೀಲಿಸಿದರು.