ಎಟಿಎಂ ಗ್ರಾಹಕರಿಗೆ ಪಂಗನಾಮ

ಹೂವಿನಹಡಗಲಿ: ಇಲ್ಲಿನ ಭಾರತೀಯ ಸ್ಟೇಟ್ ಬ್ಯಾಂಕ್ ಗ್ರಾಹಕರ ಖಾತೆಯಲ್ಲಿರುವ ಹಣವನ್ನು ಎಟಿಎಂ ಮೂಲಕ ಅಕ್ರಮವಾಗಿ ಲಪಟಾಯಿಸಿದ ಪ್ರಕರಣಗಳು ಬೆಳಕಿಗೆ ಬಂದಿವೆ.

ಪಟ್ಟಣ ನಿವಾಸಿ, ಸೋಗಿಯಲ್ಲಿ ಬಿಎಸ್‌ಎನ್‌ಎಲ್ ಉದ್ಯೋಗಿಯಾಗಿ ಕರ್ತವ್ಯ ನಿರ್ವಹಿಸುತ್ತಿರುವ ಸೊಪ್ಪಿನ ಮಲ್ಲಪ್ಪ ಇವರ ಖಾತೆಯಲ್ಲಿರುವ 42 ಸಾವಿರ ರೂ.ಗಳನ್ನು ಕೆಲ ದಿನಗಳಿಂದ ನಿರಂತರವಾಗಿ ಡ್ರಾ ಮಾಡಿಕೊಳ್ಳಲಾಗಿದೆ. ಇದೇ ಇಲಾಖೆ ಕರ್ತವ್ಯ ನಿರ್ವಹಿಸಿ ನಿವತ್ತಿಯಾಗಿರುವ ಮರ್ಧಾನ್ ಎಂಬುವರ ಖಾತೆಯಲ್ಲಿದ್ದ 58ಸಾವಿರ ರೂ., ಇತ್ತೀಚೆಗಷ್ಟೆ ಶಿಕ್ಷಕರೊಬ್ಬರ 98ಸಾವಿರ ರೂ.ಗಳನ್ನು ಪೇಟಿಎಂ ಮೂಲಕ ಲಪಟಾಯಿಸಲಾಗಿದೆ. ಮಂಗಳೂರು ಮೂಲದವರೆನ್ನಲಾದ ದುಷ್ಕರ್ಮಿಗಳು ತಾವು ಎಟಿಎಂ ಕಾರ್ಡ್ ನವೀಕರಣ ಮಾಡುವ ಬ್ಯಾಂಕ್ ವ್ಯವಸ್ಥಾಪಕರು ಎಂದು ಕರೆ ಮಾಡಿ ಎಟಿಎಂ ಕಾರ್ಡ್ ಸಂಖ್ಯೆ ಪಡೆದು ವಂಚಿಸಿದ್ದಾರೆ. ಮಲ್ಲಪ್ಪ ಅವರು ತಮ್ಮ ಖಾತೆಯಲ್ಲಿ 42 ಸಾವಿರ ರೂ.ಡ್ರಾ ಆಗುತ್ತಿದ್ದಂತೆ ಬ್ಯಾಂಕಿಗೆ ತೆರಳಿ ದೂರು ಸಲ್ಲಿಸಿದ್ದಾರೆ. ಪಟ್ಟಣದಲ್ಲಿ ಇಂತಹ ಪ್ರಕರಣಗಳು ದಿನೇ ದಿನೇ ಹೆಚ್ಚಾಗುತ್ತಿದ್ದು, ಗ್ರಾಹಕರಲ್ಲಿ ಆತಂಕ ಮೂಡಿದೆ.