ನಕಲಿ ಪ್ರಮಾಣ ಪತ್ರ ವಿತರಣೆ ಖಂಡಿಸಿ ಪ್ರತಿಭಟನೆ

ಬಳ್ಳಾರಿ : ಸವರ್ಣೀಯ ಸಮುದಾಯಕ್ಕೆ ಸೇರಿದ ವ್ಯಕ್ತಿಗಳಿಗೆ ಎಸ್ಟಿ ಮೀಸಲು ಪ್ರಮಾಣ ಪತ್ರ ನೀಡಲಾಗಿದ್ದು, ಇದಕ್ಕೆ ಕಾರಣರಾಗಿರುವ ಅಧಿಕಾರಿಗಳ ವಿರುದ್ಧ ಕೂಡಲೇ ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸಿ ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ ಹೋರಾಟ ಸಮಿತಿ ಪದಾಧಿಕಾರಿಗಳು ಜಿಲ್ಲಾಧಿಕಾರಿ ಕಚೇರಿ ಎದುರು ಸೋಮವಾರ ಪ್ರತಿಭಟನೆ ನಡೆಸಿದರು.

ಕುರುಗೋಡು ತಾಲೂಕಿನ ಎಮ್ಮಿಗನೂರಿನ ದೊಡ್ಡಯ ತಂದೆ ಬಸ್ಸಯ್ಯ ಎನ್ನುವವರು ಸವರ್ಣೀಯ ಜಾತಿಗೆ ಸೇರಿದ್ದು, ಇವರಿಗೆ ಎಸ್ಟಿ ಮೀಸಲು ಪ್ರಮಾಣ ಪತ್ರ ನೀಡಲಾಗಿದೆ. ಕುರುಗೋಡು ತಹಸೀಲ್ದಾರ್‌ ಎಂ.ಬಸವರಾಜ ನಕಲಿ ಜಾತಿ ಪ್ರಮಾಣ ಪತ್ರ ವಿತರಿಸಿದ್ದಾರೆ. ಪರಿಶಿಷ್ಟ ಪಂಗಡದಲ್ಲಿ ಸದ್ಯ ಸುಮಾರು 51 ಸುಮುದಾಯಗಳಿದ್ದು, ಅದರಲ್ಲಿ ವಾಲ್ಮೀಕಿ ಜನಾಂಗ ಹೆಚ್ಚಿನ ಪ್ರಮಾಣದಲ್ಲಿದೆ. ಶೇ.7.5ರಷ್ಟು ಮೀಸಲಾತಿಯನ್ನು ರಾಜ್ಯ ಸರಕಾರ ಘೋಷಿಸಿದೆ ಆದರೆ ಇದನ್ನೇ ಜಾರಿ ಮಾಡಲು ಸರಕಾರ ಮೀನಮೇಷ ಮಾಡುತ್ತಿದೆ. ಇದರಿಂದಾಗಿ ವಾಲ್ಮೀಕಿ ಸಮುದಾಯ ಶೈಕ್ಷಣಿಕ, ಸಾಮಾಜಿಕ, ಆರ್ಥಿಕವಾಗಿ ಅತ್ಯಂತ ಹಿಂದುಳಿಯುತ್ತಿದೆ. ಇಂತಹ ಸನ್ನಿವೇಶದ ನಡುವೆ ಪರಿಶಿಷ್ಟ ಪಂಗಡದ ಜಾತಿ ಪ್ರಮಾಣ ಪತ್ರವನ್ನು ಸವರ್ಣೀಯ ಸಮುದಾಯದವರಿಗೆ ನೀಡಿ ಅನ್ಯಾಯ ಮಾಡಲಾಗುತ್ತಿದೆ. ಕೂಡಲೇ ನಕಲಿ ಜಾತಿ ಪ್ರಮಾಣ ಪತ್ರವನ್ನು ರದ್ದುಪಡಿಸಬೇಕು. ತಹಸೀಲ್ದಾರ್‌ ಬಸವರಾಜ ಅವರನ್ನು ಸೇವೆಯಿಂದ ತಕ್ಷಣ ಅಮಾನತು ಮಾಡಬೇಕು ಎಂದು ಆಗ್ರಹಿಸಿದರು. ಮುಖಂಡರಾದ ಬಿ.ರುದ್ರಪ್ಪ, ಎನ್‌.ಸತ್ಯನಾರಾಯಣ, ವಿಜಯಕುಮಾರ ಸಂಗನಕಲ್ಲು, ಬಿ.ಶಿವಲಿಂಗ ನಾಯಕ, ವಿ.ಕೆ.ಬಸ್ಸಪ್ಪ ಸೇರಿದಂತೆ ನಾನಾ ಸಂಘಟನೆಗಳ ಮುಖಂಡರು ಇದ್ದರು.