ಭೂಸ್ವಾಧೀನ ಮಸೂದೆಗೆ ಅಂಕಿತ ಹಾಕದಂತೆ ಧರಣಿ

ಹಗರಿಬೊಮ್ಮನಹಳ್ಳಿ : ಸಮ್ಮಿಶ್ರ ಸರಕಾರ ಉದ್ದೇಶಿತ ಭೂಸ್ವಾಧೀನ ಮಸೂದೆಗೆ ರಾಜ್ಯಪಾಲರು ಅಂಕಿತ ಹಾಕದಂತೆ ಒತ್ತಾಯಿಸಿ ಪ್ರಾಂತರೈತಸಂಘದ ತಾಲೂಕು ಪದಾಧಿಕಾರಿಗಳು ತಹಿಸಿಲ್‌ ಕಚೇರಿ ಎದುರು ಇತ್ತೀಚೆಗೆ ಧರಣಿ ನಡೆಸಿದರು.

ಸಂಘದ ಜಿಲ್ಲಾ ಉಪಾಧ್ಯಕ್ಷ ಕೊಟಿಗಿ ಮಲ್ಲಿಕಾರ್ಜುನ ಮಾತನಾಡಿ, ರಾಜ್ಯ ಸರಕಾರ ಜಾರಿಗೊಳಿಸಲು ಉದ್ದೇಶಿತ ಭೂಸ್ವಾದೀನ ಮಸೂದೆ ರೈತ ವಿರೋಧಿಯಾಗಿದೆ. ವಿಧಾನಸಭೆ ಅಧಿವೇಶನದಲ್ಲಿ ಭೂಸ್ವಾಧೀನ ತಿದ್ದುಪಡಿಯ ಮಸೂದೆ ಕುರಿತಂತೆ ಚರ್ಚೆ ನಡೆಸದೆ ರಾಜ್ಯಪಾಲರ ಅಂಕಿತಕ್ಕೆ ಕಳುಹಿಸಲಾಗಿದೆ. ಸರಕಾರ ಸ್ವಾದೀನಪಡಿಸಿಕೊಳ್ಳುವ ರೈತರ ಜಮೀನಿಗೆ ಸರಕಾರದಿಂದ ನ್ಯಾಯಯುತ ಪರಿಹಾರ ಒದಗುವುದಿಲ್ಲ. ಕಾಯಿದೆ ಜಾರಿಯಾದರೆ ರಾಜ್ಯದ 65 ಲಕ್ಷ ರೈತ ಕುಟುಂಬಗಳ ಬದುಕಿನ ಮೇಲೆ ಗದಾಪ್ರಹಾರ ನಡೆಸಿದಂತಾಗಲಿದೆ. ಈ ಹಿನ್ನೆಲೆಯಲ್ಲಿ ಪರಿಸ್ಥಿತಿ ಕೈಮೀರಿ ಹೋಗುವ ಮುನ್ನ ಮಸೂದೆಗೆ ರಾಜ್ಯಪಾಲರು ಅಂಕಿತ ಹಾಕದæೕ ತಡೆಯೊಡ್ಡಬೇಕು ಎಂದು ಆಗ್ರಹಿಸಿದರು.

ಸಿಐಟಿಯು ತಾಲೂಕು ಅಧ್ಯಕ್ಷ ಎಸ್‌.ಜಗನ್ನಾಥ ಮಾತನಾಡಿ, ರಾಜ್ಯದ ರೈತರ ಅಭಿಪ್ರಾಯಪಡೆಯದೆ ತರಾತುರಿಯಿಂದ ರೂಪಿಸಲಾದ ಕಾಯಿದೆಯಿಂದ ರೈತರಿಗೆ ಅಪಾಯ ತಪ್ಪಿದ್ದಲ್ಲ. ಸರಕಾರ ಮತ್ತು ಪ್ರತಿಪಕ್ಷ ಗಳ ನಡುವಿನ ಗದ್ದಲದಲ್ಲೆ ಮಸೂದೆ ಅಂಗೀಕಾರಕ್ಕೆ ರಾಜ್ಯಪಾಲರಿಗೆ ಕಳುಹಿಸಿರುವುದು ಸರಕಾರದ ರೈತ ವಿರೋಧಿ ನೀತಿಗೆ ಸಾಕ್ಷಿಯಾಗಿದೆ. ರಾಜ್ಯಪಾಲರು ಮಸೂದೆ ನಿರಾಕರಿಸಬೇಕು ಎಂದು ಒತ್ತಾಯಿಸಿದರು. ರಾಜ್ಯ ದೇವದಾಸಿ ವಿಮೋಚನೆ ಸಂಘದ ರಾಜ್ಯ ಪ್ರಧಾನ ಕಾರ್ಯದರ್ಶಿ ಬಿ.ಮಾಳಮ್ಮ ಮಾತನಾಡಿದರು. ಪ್ರಾಂತರೈತ ಸಂಘದ ತಾಲೂಕು ಕಾರ್ಯದರ್ಶಿ ಎಚ್‌.ಮಂಜುನಾಥ, ಮುಖಂಡರಾದ ಪಿ.ಚಾಂದ್‌ಬಿ, ಸಿ.ಹನುಮಂತಪ್ಪ, ಜಿ.ಸರೋಜಾ, ಸರ್ದಾರ್‌ ಹುಲಿಗೆಮ್ಮ ಇತರರಿದ್ದರು. ತಹಸೀಲ್ದಾರ್‌ ವಿಜಯಕುಮಾರ್‌ಗೆ ಮನವಿ ಸಲ್ಲಿಸಿದರು.