ಶಶಿಧರ ಮೇಟಿ, ಬಳ್ಳಾರಿ
ಸಂಚಾರಿ ನಿಯಮ ಉಲ್ಲಂಘಿಸುವ ವಾಹನ ಸವಾರರ ಮನೆಗೇ ಇನ್ಮುಂದೆ ದಂಡದ ಚೀಟಿ ಬರಲಿದೆ. ಬೆಂಗಳೂರು, ಮೈಸೂರು ಮಾದರಿಯಲ್ಲಿ ಬಳ್ಳಾರಿ ಪೊಲೀಸ್ ಇಲಾಖೆ ಇದೀಗ ಸಾಫ್ಟ್ವೇರ್ ಸಿದ್ಧಪಡಿಸುತ್ತಿದ್ದು, ತಪ್ಪಿಸಿಕೊಳ್ಳುವ ಚಾನ್ಸೇ ಇಲ್ಲ!
ಸಂಚಾರ ನಿಯಂತ್ರಣಕ್ಕೆ ಪೊಲೀಸರಿದ್ದರೂ, ಅವರ ಕಣ್ತಪ್ಪಿಸಿ ನಿಯಮ ಉಲ್ಲಂಘಿಸುತ್ತಿದ್ದುದು ಸಾಮಾನ್ಯವಾಗಿತ್ತು. ಆದರೆ, ಇದಕ್ಕೆಲ್ಲ ಕಡಿವಾಣ ಹಾಕಲು ಜಿಲ್ಲಾ ಪೊಲೀಸ್ ಇಲಾಖೆ, ಆಟೋಮೆಟಿಕ್ ಟ್ರಾಫಿಕ್ ಚಲನಿಂಗ್ ಸಿಸ್ಟಮ್ ಜಾರಿಗೆ ತರಲು ಮುಂದಾಗಿದೆ.
ಬಳ್ಳಾರಿ ಮಹಾನಗರ ವರ್ಷದಿಂದ ವರ್ಷಕ್ಕೆ ಬೃಹದಾಕಾರವಾಗಿ ಬೆಳೆಯುತ್ತಿದ್ದು, ವಾಹನ ದಟ್ಟಣೆ ದಿನೇ ದಿನೆ ಹೆಚ್ಚುತ್ತಿದೆ. ಪ್ರಮುಖ ರಸ್ತೆ, ವೃತ್ತಗಳಲ್ಲಿ ಸಂಚಾರ ನಿಯಂತ್ರಣಕ್ಕಾಗಿ ಪೊಲೀಸರನ್ನು ನಿಯೋಜಿಸಿದರೂ ಸಿಗ್ನಲ್ ಜಂಪ್ ಸೇರಿ ಸಂಚಾರಿ ನಿಯಮ ಉಲ್ಲಂಘಿಸುವವರ ಸಂಖ್ಯೆ ಕಮ್ಮಿಯಾಗುತ್ತಿಲ್ಲ. ಇಂಥವರಿಗೆ ಬಿಸಿ ಮುಟ್ಟಿಸಲು ಪೊಲೀಸ್ ಇಲಾಖೆ ದಿಟ್ಟ ಹೆಜ್ಜೆ ಇಟ್ಟಿದ್ದು, ನಿಯಮ ಪಾಲಿಸದವರ ಮನೆಗೇ ಇನ್ಮುಂದೆ ದಂಡದ ಚೀಟಿ ತಲುಪಲಿದೆ.
ಮಾತುಕತೆ: ಇಂತಹ ಸಿಸ್ಟಮ್ ಜಾರಿಗೊಳಿಸಲು ಬೆಂಗಳೂರು ಸಾಫ್ಟ್ವೇರ್ ಕಂಪನಿಯೊಂದಿಗೆ ಬಳ್ಳಾರಿ ಪೊಲೀಸ್ ಇಲಾಖೆ ಮಾತುಕತೆ ನಡೆಸಿದೆ. ಇಲ್ಲಿ ಸಿದ್ಧಪಡಿಸುವ ಸಾಫ್ಟ್ವೇರ್ನಲ್ಲಿ ಆರ್ಟಿಓ ಅಪ್ಲಿಕೇಷನ್ ಹಾಗೂ ಬಳ್ಳಾರಿ ಒನ್ ಸೆಂಟರ್ಗೆ ಲಿಂಕ್ ಮಾಡಲಾಗುತ್ತದೆ. ಈ ಮೂಲಕ ಆಟೋ ಮೆಟಿಕ್ ಟ್ರಾಫಿಕ್ ಚಲನಿಂಗ್ ಸಿಸ್ಟಮ್ ಪರಿಣಾಮಕಾರಿಯಾಗಿ ಕೆಲಸ ಮಾಡಲು ಸಾಧ್ಯವಾಗುತ್ತದೆ ಎಂಬುದು ಪೊಲೀಸ್ ಇಲಾಖೆಯ ಅಭಿಪ್ರಾಯ. ಬೆಂಗಳೂರು ಮತ್ತು ಮೈಸೂರಿನಲ್ಲಿ ಸಿದ್ಧಪಡಿಸಿರುವ ಸಾಫ್ಟ್ವೇರ್ ಮಾದರಿಯಂತೆಯೇ ನೂತನ ವ್ಯವಸ್ಥೆ ಕಾರ್ಯ ನಿರ್ವಹಿಸಲಿದೆ.
ಮನೆ ಬಾಗಿಲಿಗೆ ಚೀಟಿ: ಯಾರಾದರೂ ವೃತ್ತಗಳಲ್ಲಿ ಸಿಗ್ನಲ್ ಜಂಪ್ ಮಾಡಿದರೆ, ತ್ರಿಬಲ್ ರೈಡಿಂಗ್ ಹೋದರೆ, ಸಂಚಾರಿ ನಿಯಮ ಉಲ್ಲಂಘಿಸಿದರೆ ದಂಡ ಕಟ್ಟುವಂತೆ ಸೂಚಿಸುವ ಚೀಟಿಯು ವಾಹನ ಸವಾರರ ಮನೆಗೆ ಹೋಗುತ್ತದೆ. ಒಂದು ವೇಳೆ ಕಟ್ಟದಿದ್ದರೆ ಸಾಫ್ಟ್ವೇರ್ನಲ್ಲಿ ನಿಯಮ ಉಲ್ಲಂಘನೆ ಮಾಹಿತಿ ಅಳಸದು. ಬದಲಿಗೆ ಮತ್ತೊಮ್ಮೆ ಉಲ್ಲಂಘನೆಯಾದಾಗ ಹೆಚ್ಚಿನ ದಂಡ ವಿಧಿಸುವ ಸಾಧ್ಯತೆ ಇರುತ್ತದೆ. ಸಾಫ್ಟ್ವೇರ್ಗೆ ಆರ್ಟಿಓ ಅಪ್ಲಿಕೇಷನ್ ಲಿಂಕ್ ಮಾಡಿರುವುದರಿಂದ ವಾಹನದ ನಂಬರ್ ಹೊಡೆದಾಕ್ಷಣ ವಾಹನ ಮಾಲೀಕನ ಸಂಪೂರ್ಣ ಮಾಹಿತಿ ಕ್ಷಣಾರ್ಧದಲ್ಲಿ ಲಭ್ಯವಾಗುತ್ತದೆ.
ಪ್ರಥಮ ಪ್ರಯೋಗ: ದಂಡದ ಮೊತ್ತವನ್ನು ಬಳ್ಳಾರಿ ಒನ್, ಪೊಲೀಸ್ ಠಾಣೆ ಅಥವಾ ಕೋರ್ಟ್ನಲ್ಲಿ ಪಾವತಿಸಬೇಕಾಗುತ್ತದೆ. ಈ ಸಿಸ್ಟಮ್ನಿಂದಾಗಿ ಸಂಚಾರಿ ನಿಯಮಗಳನ್ನು ಉಲ್ಲಂಘನೆ ಮಾಡುವವರ ಮೇಲೆ ನಿಗಾವಹಿಸಬಹುದು. ಜೊತೆಗೆ ಲಂಚದ ಆರೋಪಗಳನ್ನು ದೂರ ಮಾಡಿ, ಸಂಚಾರಿ ನಿಯಮಗಳ ಪಾಲನೆಯಲ್ಲಿ ಪಾರದರ್ಶಕತೆ ತರಬಹುದು ಎಂಬುದು ಇಲಾಖೆಯ ದೂರಾಲೋಚನೆ. ಸದ್ಯ ಬಳ್ಳಾರಿ, ಕೊಪ್ಪಳ ಮತ್ತು ರಾಯಚೂರು ಜಿಲ್ಲೆಗಳನ್ನುಳ್ಳ ಬಳ್ಳಾರಿ ವಲಯದ ಪೈಕಿ ಬಳ್ಳಾರಿಯಲ್ಲಿಯೇ ಮೊದಲ ಬಾರಿಗೆ ಈ ವ್ಯವಸ್ಥೆ ಅಳವಡಿಸುತ್ತಿರುವುದು ವಿಶೇಷ.
ಸಿಸಿ ಕ್ಯಾಮೆರಾ: ಈಗಾಗಲೇ ನಗರದ ಏಳೆಂಟು ಕಡೆ ಸುಮಾರು 40 ಸಿಸಿ ಕ್ಯಾಮೆರಾಗಳು ಕಾರ್ಯನಿರ್ವಹಿಸುತ್ತಿವೆ. ಮುಂದಿನ ದಿನಗಳಲ್ಲಿ ಬಳ್ಳಾರಿ ನಗರಾಭಿವೃದ್ಧಿ ಪ್ರಾಧಿಕಾರದಿಂದ ಐದಾರು ಕಡೆ ಸುಮಾರು 20ಕ್ಕೂ ಹೆಚ್ಚು ಸಿಸಿ ಕ್ಯಾಮೆರಾ ಅಳವಡಿಕೆಯಾಗಲಿವೆ. ಒಟ್ಟಾರೆ ಬಳ್ಳಾರಿ ನಗರದಲ್ಲಿ ಸುಮಾರು 60 ರಿಂದ 70 ಸಿಸಿ ಕ್ಯಾಮೆರಾಗಳನ್ನು ಅಳವಡಿಸುವುದರಿಂದ ವಾಹನಗಳ ಮೇಲೆ ಹೆಚ್ಚಿನ ನಿಗಾವಹಿಸಲು ಸಹಕಾರಿಯಾಗುತ್ತದೆ. ಈ ಸಿಸಿ ಕ್ಯಾಮೆರಾಗಳ ಕಂಟ್ರೋಲ್ ವ್ಯವಸ್ಥೆ ಕಂಟ್ರೋಲ್ ರೂಮ್ನಲ್ಲಿರುತ್ತದೆ.
----
ಸಂಚಾರಿ ನಿಯಮಗಳನ್ನು ಉಲ್ಲಂಘಿಸುವವರ ಮೇಲೆ ದಂಡ ವಿಧಿಸಲು ಅನುಕೂಲವಾಗಲು ಆಟೋಮೆಟಿಕ್ ಟ್ರಾಫಿಕ್ ಚಲನಿಂಗ್ ಸಿಸ್ಟಮ್ ಜಾರಿಗೆ ತರಲು ಸಾಫ್ಟ್ವೇರ್ ಸಿದ್ಧಪಡಿಸಲಾಗುತ್ತದೆ. ಇದರಿಂದಾಗಿ ಸಂಚಾರಿ ಪೊಲೀಸ್ ಠಾಣೆ ಸಿಬ್ಬಂದಿಗಳ ಸಮಯ ಉಳಿತಾಯವಾಗುತ್ತದೆ. ಸಂಚಾರಿ ವ್ಯವಸ್ಥೆಯಲ್ಲೂ ಪಾರದರ್ಶಕತೆ ತರಲು ಅನುಕೂಲವಾಗಲಿದೆ.
-ಆರ್.ಚೇತನ್, ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ, ಬಳ್ಳಾರಿ.