ನದಿಪ್ರವಾಹ ಇಳಿಮುಖ : ತ್ಯಾಜ್ಯ ವಿಲೇವಾರಿ ಚುರುಕು

ಕಂಪ್ಲಿ : ತುಂಗಭದ್ರಾ ನದಿಯಲ್ಲಿ ನೀರಿನ ಹರಿವು ಶುಕ್ರವಾರ ರಾತ್ರಿಯಿಂದಲೇ ಇಳಿಮುಖವಾಗಿರುವುದರಿಂದ ಕೋಟೆ ಬಳಿ ನದಿಗೆ ಅಡ್ಡಲಾಗಿ ಕಟ್ಟಿರುವ ಸೇತುವೆ ಮೇಲೆ ತ್ಯಾಜ್ಯ ವಿಲೇವಾರಿ ಕಾರ್ಯ ಶನಿವಾರ ಚುರುಕಿನಿಂದ ನಡೆಯಿತು.

ಇಲ್ಲಿನ ಪುರಸಭೆ ಆಡಳಿತ ಮಂಡಳಿ ಸೇತುವೆ ಮೇಲೆ ನೀರಿನ ಜತೆ ಸಾಗಿ ಬಂದ ಕಸವನ್ನು ತೆರವುಗೊಳಿಸುವ ಕಾರ್ಯ ಆರಂಭಿಸಿದೆ. ನದಿ ನೀರಿನ ರಭಸಕ್ಕೆ ಸೇತುವೆ ಎರಡೂ ಬದಿಗೆ ಅಳವಡಿಸಿದ ರಕ್ಷ ಣಾ ಸರಳುಗಳು ಅಲ್ಲಲ್ಲಿ ಕಿತ್ತು ಹೋಗಿವೆ. ಈ ವೇಳೆ ಪುರಸಭೆ ಅಧ್ಯಕ್ಷ ಎಂ.ಸುಧೀರ್‌ ಮಾತನಾಡಿ, ನೀರಿನ ರಭಸಕ್ಕೆ ತೇಲಿ ಬಂದು ಸೇತುವೆಯ ಸರಳುಗಳಿಗೆ ಸಿಕ್ಕಿಕೊಂಡ ಜಲ ಸಸ್ಯ ಮತ್ತು ಕೋಟೆಯಲ್ಲಿ ಸ್ವಚ್ಛತಾ ಕ್ರಮಗಳಾದ ಬ್ಲೀಚಿಂಗ್‌ ಪುಡಿ ಎರಚುವುದು, ಫಾಗಿಂಗ್‌ ಕಾರ್ಯ ನಡೆಸಲಾಗಿದೆ. ಎಲ್ಲ ರೀತಿಯ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಲಾಗಿದೆ ಎಂದರು. ತಹಸೀಲ್ದಾರ್‌ ಎಂ.ರೇಣುಕಾ ಮಾತನಾಡಿ, ಸೇತುವೆ ಮೇಲಿನಿಂದ ಇನ್ನೂ ಎರಡು ದಿನಗಳವರೆಗೆ ಯಾವುದೇ ವಾಹನಗಳ ಸಂಚಾರಕ್ಕೆ ಅನುವು ಮಾಡುವುದಿಲ್ಲ. ಗಂಗಾವತಿ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳು ಸೇತುವೆ ಪರಿಶೀಲಿಸಿ,ವಾಹನ ಸಂಚಾರಕ್ಕೆ ದೃಢೀಕರಣ ಪತ್ರ ಕೇಳಿದ್ದೇವೆ. ಅವರಿಂದ ಉತ್ತರ ಬಂದ ನಂತರ ವಾಹನ ಸಂಚಾರಕ್ಕೆ ಅನುವು ಮಾಡಲಾಗುವುದು. ಕೃಷಿ, ತೋಟಗಾರಿಕೆ, ಕಂದಾಯ ಇಲಾಖೆ ಅಧಿಕಾರಿಗಳು ಜಂಟಿಯಾಗಿ ಬೆಳೆ ಹಾನಿ ಸಮೀಕ್ಷೆ ನಡೆಸಿದ್ದೇವೆ. ನದಿ ನೀರು ಇಳಿಮುಖವಾಗಿದ್ದರಿಂದ ಕೋಟೆಯಲ್ಲಿ ತೆರೆದ ಗಂಜಿ ಕೇಂದ್ರ ಸ್ಥಗಿತಗೊಳಿಸಲಾಗಿದೆ ಎಂದರು. ಉಪ ತಹಸೀಲ್ದಾರ್‌ ಬಿ.ರವೀಂದ್ರಕುಮಾರ್‌, ವಿಎ ಗಿರೀಶ್‌ಬಾಬು, ಪುರಸಭೆ ಸದಸ್ಯರಾದ ಬಿ.ನಾಗರಾಜ, ಗೆಜ್ಜೆಳ್ಳಿ ಬಾಷಾ, ಮುಖಂಡ ಲಡ್ಡು ಹೊನ್ನೂರಲಿ, ಆರೋಗ್ಯ ನಿರೀಕ್ಷ ಕ ಸಿ.ಫಕೃದ್ದೀನ್‌ಸಾಬ್‌, ರಾಧಿಕಾ ಇದ್ದರು.

ಆಗ್ರಹ: ನದಿ ನೀರಿನ ರಭಸಕ್ಕೆ ಸೇತುವೆ ಮೇಲಿನ ಎರಡೂ ಬದಿ ಅಳವಡಿಸಿದ ರಕ್ಷ ಣಾ ಸರಳುಗಳು ಅಲ್ಲಲ್ಲಿ ಕಿತ್ತು ಹೋಗಿವೆ. ಅಲ್ಲದೇ ಸೇತುವೆಯ ಎಕ್ಸ್‌ ಪಾಯಿಂಟ್‌ ಜಾಯಿಂಟ್‌ಗೆ ಅಲ್ಲಲ್ಲಿ ಹಾನಿಯಾಗಿದೆ. ಸೇತುವೆ ಮೇಲಿನಿಂದ ಸಂಚರಿಸುವ ದ್ವಿಚಕ್ರವಾಹನ ಸವಾರರಿಗೆ ಗಾಳಿ ಹೊಡೆತಕ್ಕೆ ಅಪಾಯವಾಗುವ ಸಾಧ್ಯತೆ ಹೆಚ್ಚಾಗಿದ್ದು, ಸಂಬಂಧಿಸಿದ ಅಧಿಕಾರಿಗಳು ಸೇತುವೆ ಪಕ್ಕದ ಸರಳುಗಳನ್ನು ದುರಸ್ತಿಪಡಿಸಬೇಕು ಎಂದು ಕೋಟೆ ಜನರು ಆಗ್ರಹಿಸಿದ್ದಾರೆ.