ಮರಳು: ಸರಳೀಕರಿಸಲು ಆಗ್ರಹಿಸಿ ಧರಣಿ

ಸಿರುಗುಪ್ಪ; ಮರಳು ನೀತಿ ಸರಳೀಕರಿಸಲು ಆಗ್ರಹಿಸಿ ಮಾಜಿ ಶಾಸಕ ಎಂ.ಎಸ್.ಸೋಮಲಿಂಗಪ್ಪ ನೇತೃತ್ವದಲ್ಲಿ ಸೋಮವಾರ ಅನಿರ್ದಿಷ್ಟಾವಧಿ ಧರಣಿ ಆರಂಭವಾಯಿತು.

ಧರಣಿಯಲ್ಲಿ ಮಾತನಾಡಿದ ಮಾಜಿ ಶಾಸಕ, ನೈಸರ್ಗಿಕವಾಗಿ ದೊರೆಯುತ್ತಿರುವ ಮರಳು ತಾಲೂಕಿನ ರೈತರಿಗೆ ಸುಲಭವಾಗಿ ದೊರೆಯುತ್ತಿಲ್ಲ. ಅಭಿವದ್ಧಿ ಕಾಮಗಾರಿ ಕೈಗೊಳ್ಳಲು ಮರಳು ನೀತಿಯನ್ನು ಸರಳೀಕರಿಸಬೇಕು. ತಾಲೂಕಿನಿಂದ ಹೊರ ಭಾಗಕ್ಕೆ ಮರಳು ಹೋಗುವುದನ್ನು ತಡೆಗಟ್ಟಬೇಕು. ಇದೇ ಬೇಡಿಕೆ ಮುಂದಿಟ್ಟು ಚುನಾವಣೆಗೂ ಮುನ್ನ 12 ದಿನಗಳ ನಿರಶನ ನಡೆಸಿದರೂ ಸ್ಪಂದನೆ ದೊರೆತಿಲ್ಲ. ಜನಪ್ರತಿನಿಧಿಗಳು, ಅಧಿಕಾರಿಗಳು ಜನರ ಬೇಡಿಕೆಗೆ ಸ್ಪಂದಿಸುತ್ತಿಲ್ಲ. ತಾಲೂಕಿನಲ್ಲಿ ಜನಸಾಮಾನ್ಯರು ಮರಳು ಸಿಗದೇ ಪರಿತಪಿಸುವಂತಾಗಿದೆ. 300 ರೂ.ಗೆ ಒಂದು ಕ್ಯೂಬಿಕ್ ಮರಳಿನಂತೆ ಮಾರಾಟ ಮಾಡಬೇಕು. ನಾಲ್ಕು ಭಾಗದಲ್ಲಿ ಮರಳು ಯಾರ್ಡ್ ಆರಂಭಿಸಬೇಕು. ಆವರೆಗೂ ಧರಣಿ ಕೈ ಬಿಡುವುದಿಲ್ಲ ಎಂದು ಎಚ್ಚರಿಸಿದರು. ತಾ.ಪಂ.ಸದಸ್ಯ ವೈ.ಶಂಕ್ರಪ್ಪ ಸೇರಿದಂತೆ ಹಳೇಕೋಟೆ ಗ್ರಾ.ಪಂ. ವ್ಯಾಪ್ತಿಯ 5 ಸದಸ್ಯರು ನಿರಶನ ನಡೆಸಿದರು. ಬಿಜೆಪಿ ತಾಲೂಕ ಘಟಕದ ಅಧ್ಯಕ್ಷ ಶಾಂತಮೂರ್ತಿಸ್ವಾಮಿ, ದೊಡ್ಡವೀರನಗೌಡ, ಯುವ ಮೋರ್ಚಾ ತಾಲೂಕ ಅಧ್ಯಕ್ಷ ಬೈರಾಪುರ ವಿರೂಪಾಕ್ಷಗೌಡ, ಸಿದ್ದರಾಮನಗೌಡ, ಮಧುಸೂದನಶೆಟ್ಟಿ, ದಿವಾಕರಗೌಡ, ಕಂಬಳಿ ಮಲ್ಲಿಕಾರ್ಜುನ, ಶೇಖಪ್ಪ ಸೇರಿದಂತೆ ಇತರರಿದ್ದರು.