ನರೇಗಾ ಯೋಜನೆಯಡಿ ಕೂಲಿ ದಿನಗಳನ್ನು ಹೆಚ್ಚಿಸುವಂತೆ ಪ್ರಧಾನಿಗೆ ಪತ್ರ

ಸಂಡೂರು : ನರೇಗಾ ಯೋಜನೆಯಡಿ ಕೆಲಸ ನಿರ್ವಹಿಸಿದ ಕಾರ್ಮಿಕರಿಗೆ ಕೂಲಿ ಪಾವತಿ ಮಾಡಬೇಕು, ಕೆಲಸದ ದಿನಗಳಲ್ಲಿ100 ರಿಂದ 200 ದಿನಗಳಿಗೆ ಹೆಚ್ಚಿಸಬೇಕು ಎಂದು ಆಗ್ರಹಿಸಿ ತಾಲೂಕಿನ ತೋರಣಗಲ್ಲುಹೋಬಳಿಯ ಗ್ರಾಮೀಣ ಕೂಲಿಕಾರರ ಸಂಘದ ಸದಸ್ಯರು ಪ್ರಧಾನಿ ನರೇಂದ್ರ ಮೋದಿಯವರಿಗೆ ಭಾನುವಾರ ಪತ್ರ ರವಾನಿಸಿದರು.

ಗ್ರಾಮೀಣ ಕೂಲಿಕಾರರ ಸಂಘದ ಸಂಚಾಲಕಿ ಅಕ್ಕಮಹಾದೇವಿ ಮಾತನಾಡಿ, ತಾಲೂಕಿನ ಹಲವೆಡೆ ಮಳೆಯಿಲ್ಲದೇ ಬರ ಆವರಿಸಿದೆ. ಜನಕ್ಕೆ ಕೆಲಸವಿಲ್ಲ. ನರೇಗಾ ಅಡಿ ಮಾಡಿದ ಕೆಲಸಕ್ಕೆ ಕೂಡಲೇ ಕೂಲಿ ಪಾವತಿ ಮಾಡಬೇಕು. ಸರಕಾರ ವರ್ಷಕ್ಕೆ ಒಂದು ಕುಟುಂಬಕ್ಕೆ ಕೇವಲ 100 ದಿನಗಳ ಕೆಲಸ ನೀಡುತ್ತಿರುವುದು ಸಾಕಾಗುತ್ತಿಲ್ಲವಾದ್ದರಿಂದ ಕೆಲಸದ ದಿನಗಳನ್ನು 200 ದಿನಗಳಿಗೆ ಹೆಚ್ಚಿಸಬೇಕು ಎಂದು ಒತ್ತಾಯಿಸಿ ಪ್ರಧಾನಿಯವರಿಗೆ ಪತ್ರ ರವಾನಿಸುತ್ತಿದ್ದೇವೆ ಎಂದರು.

ಸಂಘದ ಸದಸ್ಯರಾದ ಲಕ್ಷ್ಮಕ್ಕ, ಹಂಪಕ್ಕ, ಸುಜಾತಾ, ತಿಪ್ಪಮ್ಮ, ಗೌರಮ್ಮ, ಯಲ್ಲಮ್ಮ, ಈರಮ್ಮ, ಹುಲಿಗೆಮ್ಮ, ಮಲಿಯಮ್ಮ, ದೇವಣ್ಣ, ತಿಪ್ಪಯ್ಯ ಇತರರಿದ್ದರು.