ಕೊಪ್ಪಳ: ಯಶಸ್ವಿ ಚಿಕಿತ್ಸೆ, 9 ತಿಂಗಳ ಮಗುವಿನ ಗಂಟಲಿಂದ ಕಾಡಿಗೆ ಡಬ್ಬಿ ಹೊರಕ್ಕೆ ತೆಗೆದ ವೈದ್ಯರು

ಕೊಪ್ಪಳ: 9 ತಿಂಗಳ ಗಂಡು ಮಗುವಿನ ಗಂಟಲಿನಲ್ಲಿ ಸಿಲುಕಿದ್ದ ಕಾಡಿಗೆ ಡಬ್ಬಿಯನ್ನು ವೈದ್ಯರು, ಮಂಗಳವಾರ ರಾತ್ರಿ ಶಸ್ತ್ರ ಚಿಕಿತ್ಸೆ ಮೂಲಕ ಯಶಸ್ವಿಯಾಗಿ ಹೊರತೆಗೆದಿದ್ದಾರೆ.

ತಾಲೂಕಿನ ಅಳವಂಡಿ ಗ್ರಾಮದ ಚಂದ್ರಹಾಸ್‌ ಹಾಗೂ ಲಕ್ಷ್ಮವ್ವ ದಂಪತಿಯ 9 ತಿಂಗಳ ಪುತ್ರ ಪವನ್‌, ಕಾಡಿಗೆ ಡಬ್ಬಿ ಹಿಡಿದು ಆಡುತ್ತಿದ್ದ. ಆಕಸ್ಮಿಕವಾಗಿ ಬಾಯಲ್ಲಿಇಟ್ಟುಕೊಂಡಾಗ ಗಂಟಲಿನಲ್ಲಿ ಸಿಲುಕಿದೆ.

ಈ ಡಬ್ಬಿ ಬಾಯಿಯಲ್ಲಿ ಒಳಗೆ ಹೋಗದೇ ಹೊರಗೆ ಬಾರದ್ದರಿಂದ ಆತಂಕಗೊಂಡ ಪಾಲಕರು, ಮಗುವನ್ನು ತಕ್ಷಣ ಇಲ್ಲಿನ ಆಸ್ಪತ್ರೆಗೆ ಕರೆದುಕೊಂಡು ಬಂದರು. ಕಿಮ್ಸ್‌ ವೈದ್ಯ ಡಾ.ಕೆ.ಮಲ್ಲಿಕಾರ್ಜುನ್‌ ಅವರು ಯಶಸ್ವಿ ಚಿಕಿತ್ಸೆ ನಡೆಸಿ, ಗಂಟಲಿನಲ್ಲಿ ಸಿಲುಕಿದ್ದ ಡಬ್ಬಿಯನ್ನು ಹೊರತೆಗೆದಿದ್ದಾರೆ. ಐದಾರು ತಾಸಿನವರೆಗೆ ಮಗು ಸಾಕಷ್ಟು ಸಂಕಷ್ಟ ಅನುಭವಿಸಿದೆ. ಡಬ್ಬಿ ಹೊರ ತೆಗೆಯುತ್ತಿದ್ದಂತೆ ಮಗುವಿನ ಮೊಗದಲ್ಲಿ ನಗು ತೇಲಾಡಿತು ಎಂದು ವೈದ್ಯರು ತಿಳಿಸಿದ್ದಾರೆ.