ಈ ಬಾರಿಯೂ ಗಣಿ ಹಣದ ಸದ್ದು

ಬಳ್ಳಾರಿ ; ಗಣಿ ಜಿಲ್ಲೆಯ ಬಹುತೇಕ ಕ್ಷೇತ್ರಗಳಲ್ಲಿ ಈ ಬಾರಿಯೂ ಕುರುಡು ಕಾಂಚಾಣದ ಸದ್ದು ಜೋರಾಗಿದೆ.

ಕೆಲವು ರಾಜಕೀಯ ಪಕ್ಷಗಳು ಈಗಾಗಲೇ ಮತದಾರರಿಗೆ ಹಣ ತಲುಪಿಸಿದ್ದರೆ, ಇನ್ನೂ ಕೆಲವು ಕಾದು ನೋಡುವ ತಂತ್ರದಲ್ಲಿವೆ. ಶುಕ್ರವಾರ ರಾತ್ರಿಯೊಳಗೆ ಮತದಾರರ ಮನೆ ಬಾಗಿಲಿಗೆ ಹಣ ತಲುಪಿಸಲು ರಹಸ್ಯ ಕಾರ್ಯಾಚರಣೆ ಜಿಲ್ಲಾದ್ಯಂತ ನಡೆದಿದೆ. ಬಳ್ಳಾರಿ ಗ್ರಾಮೀಣ ಕ್ಷೇತ್ರದಲ್ಲಿ ಪಕ್ಷವೊಂದು 500ರೂ. ಹಂಚಿದ್ದರೆ, ನಗರ ಕ್ಷೇತ್ರದಲ್ಲಿ ಮತ್ತೊಂದು ಪಕ್ಷ ಕೆಲವೆಡೆ ಸೀರೆಗಳನ್ನು ವಿತರಿಸುವ ಜತೆಗೆ ಪ್ರತಿ ವೋಟಿಗೆ 500 ರೂ. ನಿಗದಿಮಾಡಿದೆ. ಮಗದೊಂದು ಪಕ್ಷ ಮತದಾರರಿಗೆ ತಲಾ 200 ರೂ. ಹಂಚಿಕೆ ಮಾಡಿದೆ. ಜಿದ್ದಾಜಿದ್ದಿನ ಕಣವಾಗಿರುವ ಹೊಸಪೇಟೆ ವಿಜಯನಗರ ಕ್ಷೇತ್ರದಲ್ಲಿ ಕೆಲವೊಂದು ರಾಜಕೀಯ ಪಕ್ಷಗಳು ತಲಾ 200 ರೂ. ವಿತರಿಸಿವೆ. ಸಿರುಗುಪ್ಪ, ಕಂಪ್ಲಿ ಸೇರಿ ಇತರ ಕ್ಷೇತ್ರಗಳಲ್ಲೂ ಗಣಿ ಹಣದ ಸದ್ದು ಜೋರಾಗಿದೆ. ಮತದಾನಕ್ಕೂ ಮುಂಚೆ ಮತ್ತಷ್ಟು ಹಣದ ಹಂಚಿಕೆ ನಡೆಯಲಿದೆ ಎಂಬ ಮಾತು ಜಿಲ್ಲಾದ್ಯಂತ ಕೇಳಿಬಂದಿದೆ.