ಭಗವಂತನ ಕೃಪೆ ಇದ್ದರೆ ನಾವು ಸರಕಾರ ರಚಿಸುತ್ತೇವೆ: ಬಿಜೆಪಿ ಶಾಸಕ ಸೋಮಶೇಖರ್‌ ರೆಡ್ಡಿ

ಬಳ್ಳಾರಿ: ಭಗವಂತನ ಕೃಪೆ ಇದ್ದರೆ ನಾವು ಸರಕಾರ ರಚನೆ ಮಾಡುತ್ತೇವೆ. ದೇವರು ಏನು ಮಾಡ್ತಾರೋ ನೋಡೋಣ. ಅತೃಪ್ತರು ಒಗ್ಗಟ್ಟಾಗಿ ನಿರ್ಧಾರ ತೆಗೆದುಕೊಳ್ಳಲಿ ಎಂದು ಬಳ್ಳಾರಿ ನಗರ ಬಿಜೆಪಿ ಶಾಸಕ ಸೋಮ ಶೇಖರ್ ರೆಡ್ಡಿ ಹೇಳಿದ್ದಾರೆ.

ಬಳ್ಳಾರಿಯಲ್ಲಿ ಗ್ರಾಮ ಲೆಕ್ಕಾಧಿಕಾರಿಗಳ ಪ್ರತಿಭಟನೆ ಬೆಂಬಲಿಸಿ ಮಾತನಾಡುವ ಸಂದರ್ಭದಲ್ಲಿ,‌ ನಮ್ಮ ಸರಕಾರ ಇದ್ದರೆ, ನಾವು ಇದನ್ನೇಲ್ಲಾ ತಡೆಯುತ್ತೇವೆ. ನೌಕರ ಪರ ನಿಲ್ಲುತ್ತೇವೆ, ದೇವರ ದಯೆ ಇದ್ದರೆ ನಾವು ಸರಕಾರ ರಚನೆ ಮಾಡುತ್ತೇವೆ ಎಂದರು.

ಅತೃಪ್ತರೆಲ್ಲರೂ ಒಗ್ಗಟ್ಟಾಗಿ ನಿರ್ಧಾರ ತೆಗೆದುಕೊಳ್ಳಲಿ. ಅವರು ಯಾರು ನಮ್ಮನ್ನು ಸಂಪರ್ಕ ಮಾಡಿಲ್ಲ. ಒಂದು ವೇಳೆ ಎಲ್ಲರೂ ಒಗ್ಗಟ್ಟಾಗಿ ಬಂದರೆ ಮುಂದಿನ ನಡೆ ಬಗ್ಗೆ ತೀರ್ಮಾನ ಕೈಗೊಳ್ಳಬಹುದು ಎಂದರು.

ಬಿಜೆಪಿ ನಾಯಕರು ಯಾರೂ ಇದವರೆಗೂ ಕಾಂಗ್ರೆಸ್‌ ಶಾಸಕರ ಜತೆ ಮಾತುಕತೆ ನಡೆಸಿಲ್ಲ. ಆಪರೇಷನ್‌ ಕಮಲ ಮಾಡಲಾಗುತ್ತದೆ ಎಂಬುದು ಶುದ್ಧ ಸುಳ್ಳು. ಈಗ ಬಿಜೆಪಿ ಕಾದು ನೋಡುವ ತಂತ್ರಕ್ಕೆ ಮೊರೆ ಹೋಗಿದೆ ಎಂದು ಸೋಮಶೇಖರ್‌ ತಿಳಿಸಿದರು.