ಶಶಿಧರ ಮೇಟಿ, ಬಳ್ಳಾರಿ
ಮೂವತ್ತು ವರ್ಷಗಳ ಇತಿಹಾಸದಲ್ಲೇ, ವಿಶ್ವದ ನಾನಾ ಮೂಲೆಯ ಹೆಚ್ಚಿನ ಕಲಾವಿದರು ಪಾಲ್ಗೊಳ್ಳಲು ವೇದಿಕೆ ಕಲ್ಪಿಸಿದ್ದು ಈ ಬಾರಿಯ ಹಂಪಿ ಉತ್ಸವದ ವಿಶೇಷ.
ಕಳೆದ ವರ್ಷಕ್ಕಿಂತ 140 ಕಾರ್ಯಕ್ರಮಗಳು ಹೆಚ್ಚಳವಾಗಿದ್ದು ಸೇರಿ ವಿಶೇಷ ರೀತಿಯಲ್ಲಿ ಉತ್ಸವವನ್ನು ನಿಭಾಯಿಸಿದ್ದು, ಹೊಸ ಮನ್ನಣೆ ಒದಗಿಸಿದೆ. ತುಂಗಾ ಆರತಿ, ಪ್ಯಾರಾಪ್ಲೇನ್, ವಿಶ್ವಸುಂದರಿಯರ ಕ್ಯಾಟ್ವಾಕ್, ವಿದೇಶಿ ರಾಯಭಾರಿಗಳ ಆಗಮನ ಇತ್ಯಾದಿ ಉತ್ಸವದ ಕಳೆ ಹೆಚ್ಚಿಸಿತು. ಈ ಬಾರಿ ಹಂಪಿ ಉತ್ಸವ ದೇಶ-ವಿದೇಶ ಮತ್ತು ಸ್ಥಳೀಯರು ಸೇರಿ 405 ಕಾರ್ಯಕ್ರಮಗಳ ಮೂಲಕ ಸುಮಾರು 4200ಕ್ಕೂ ಹೆಚ್ಚು ಕಲಾವಿದರಿಗೆ ವೇದಿಕೆ ಕಲ್ಪಿಸಿಕೊಟ್ಟಿತು. ಇದು ಹಂಪಿಯ 30 ವರ್ಷಗಳ ಇತಿಹಾಸದಲ್ಲೇ ಅತಿಹೆಚ್ಚು ಎನ್ನಲಾಗುತ್ತಿದೆ. ಕಳೆದ ಬಾರಿ 267 ಸಾಂಸ್ಕೃತಿಕ ಕಾರ್ಯಕ್ರಮ ಆಯೋಜನೆಗೊಂಡಿದ್ದು, ಈ ಬಾರಿ ಸಂಖ್ಯೆ ದ್ವಿಗುಣವಾಗಿತ್ತು.
ಮೆರುಗು: ಕಳೆದ ವರ್ಷ ಸುಮಾರು 11 ನಾನಾ ದೇಶದ ಕಲಾ ತಂಡಗಳು ಆಗಮಿಸಿ ಇಲ್ಲಿನ ಜನರಿಗೆ ಅಲ್ಲಿನ ಕಲೆಯ ರಸದೌತಣ ನೀಡಿದ್ದವು. ಈ ಬಾರಿ ಟರ್ಕಿ, ಯುಎಸ್ಎ, ಈಜಿಪ್ಟ್, ಅರ್ಜೆಂಟೇನಿಯಾ, ಕೆನಡಾ, ರಷ್ಯಾ, ಲಿತುಯಾನಿಯಾ ಸೇರಿ ವಿದೇಶದ 8 ತಂಡಗಳು ಮಾತ್ರ ಈ ಬಾರಿ ಹಂಪಿ ಉತ್ಸವಕ್ಕೆ ಆಗಮಿಸಿದ್ದವು.
ಈ ಹಿಂದೆ ವಿಜಯನಗರ ಕಾಲದಲ್ಲಿ ವಿದೇಶ ರಾಯಭಾರಿಗಳು ಆಗಮಿಸುತ್ತಿದ್ದುದನ್ನು ಮೆಲುಕು ಹಾಕಲು, ಪ್ಯಾಲಿಸ್ತೇನಿಯಾ, ಮಲೇಷ್ಯಾ, ಈಜಿಪ್ಟ್ ದೇಶದ ರಾಯಭಾರಿಗಳನ್ನು ಆಹ್ವಾನಿಸಿ ಹಂಪಿ ಉತ್ಸವಕ್ಕೆ ಮೆರುಗು ತರಲಾಗಿದೆ. ಗ್ರೇಟ್ ಬ್ರಿಟನ್ ರಷ್ಯಾ ಫೆಡರೇಶನ್ ಸೇರಿ 13 ದೇಶಗಳ ವಿಶ್ವಸುಂದರಿಯರು ಆಗಮಿಸಿರುವುದು ಈ ಬಾರಿ ವಿದೇಶದ ತಂಡಗಳು ಕಡಿಮೆ ಎಂಬ ಭಾವನೆ ಹೋಗಲಾಡಿಸಿದೆ.
ಆದ್ಯತೆ: ಸ್ಥಳೀಯ ಕಲಾವಿದರೊಂದಿಗೆ ಹೊರರಾಜ್ಯಗಳ ತಂಡಗಳ ಸಂಖ್ಯೆ ಕಳೆದ ಉತ್ಸವಕ್ಕಿಂತ ಈ ಬಾರಿ ಹೆಚ್ಚಾಗಿದೆ. ಕಳೆದ ಉತ್ಸವದಲ್ಲಿ ಹೊರರಾಜ್ಯದ 28 ತಂಡಗಳು ಆಗಮಿಸಿದ್ದರೆ, ಈ ವರ್ಷ ಮುಂಬಯಿ, ಹೊಸದಿಲ್ಲಿ, ಚೆನ್ನೈ, ಹೈದರಾಬಾದ್, ಕನ್ಯಾಕುಮಾರಿ, ಜೈಪುರ್, ಪುಣೆ ಸೇರಿ ಹೊರ ರಾಜ್ಯದ ಸುಮಾರು 35 ಕಲಾತಂಡಗಳು ಹಂಪಿ ಉತ್ಸವದಲ್ಲಿ ತಮ್ಮ ಕಲಾ ಪ್ರದರ್ಶನ ನೀಡಿ, ಜನರಿಗೆ ರಸದೌತಣ ಉಣಬಡಿಸಿದವು.
ತುಂಗಾ ಆರತಿ: ಹಂಪಿಯ ಅನತಿ ದೂರದಲ್ಲಿರುವ ತುಂಗಭದ್ರಾ ಜಲಾಶಯದ ನೀರಿನ ಸಂಗ್ರಹ, ಕಳೆದ ವರ್ಷಕ್ಕಿಂತ ಈ ವರ್ಷ ಸುಧಾರಣೆಯಾಗಿದ್ದರಿಂದ ಉತ್ಸವದ ನಿಮಿತ್ತ ತುಂಗಾ ಆರತಿ ಮಾಡಲಾಗಿದೆ. ಹಂಪಿ ಉತ್ಸವದ ನಿಮಿತ್ತ ಬಳ್ಳಾರಿಯಲ್ಲಿಯೇ ಮೊದಲ ಬಾರಿಗೆ ಪ್ಯಾರಾ ಪ್ಲೇನ್ ವ್ಯವಸ್ಥೆ ಮಾಡಿರುವುದು ಸೇರಿ ಉತ್ಸವದ ಪೂರ್ವದ ಕೆಲ ದಿನಗಳಿಂದಲೇ ಹಮ್ಮಿಕೊಂಡಿರುವ ಕಾರ್ಯಕ್ರಮವು, ಈ ವರ್ಷದ ಹಂಪಿ ಉತ್ಸವದ ಮಹತ್ವವನ್ನು ಹೆಚ್ಚಿಸಿತ್ತು.
ಬಾರ್ಕೋಡ್ ವ್ಯವಸ್ಥೆ : ಮೊದಲ ಬಾರಿ ಹಂಪಿ ಉತ್ಸವದಲ್ಲಿ ಗಣ್ಯರು ಮತ್ತು ಅತಿಗಣ್ಯರ ಪಾಸ್ಗೆ ಬಾರ್ಕೋಡ್ ವ್ಯವಸ್ಥೆ ಮಾಡಲಾಗಿತ್ತು. ವಿಜಯನಗರ ವಸಂತ ವೈಭವವು ಎಲ್ಲರನ್ನು ಸೆಳೆಯುವಂತೆ ಮಾಡಿತು. ಕಳೆದ ವರ್ಷ 3000 ಕಲಾವಿದರಿಗೆ ಉತ್ಸವ ವೇದಿಕೆ ಕಲ್ಪಿಸಿಕೊಟ್ಟಿದ್ದು, ಈ ಬಾರಿ 4,200 ಕಲಾವಿದರಿಗೆ ಅವಕಾಶ ನೀಡಿತು.
---
ಹಂಪಿ ಉತ್ಸವದ 30 ವರ್ಷಗಳ ಇತಿಹಾಸದಲ್ಲಿ ಈ ಬಾರಿ ಸುಮಾರು 4,000ಕ್ಕೂ ಹೆಚ್ಚು ಕಲಾವಿದರಿಗೆ ವೇದಿಕೆ ಕಲ್ಪಿಸಿಕೊಡಲಾಗಿದೆ. ಕಳೆದ ಉತ್ಸವದಲ್ಲಿ 267 ಸಾಂಸ್ಕೃತಿಕ ಕಾರ್ಯಕ್ರಮ ನಡೆದಿದ್ದವು. ಈ ಸಲ 405 ಕಲೆ, ಸಾಹಿತ್ಯಮತ್ತು ಸಂಸ್ಕೃತಿ ಬಿಂಬಿಸುವ ಕಾರ್ಯಕ್ರಮಗಳಿಗೆ ಅವಕಾಶ ದೊರೆತು, ಸ್ಥಳೀಯ ಕಲಾವಿದರಿಗೆ ಹೆಚ್ಚಿನ ಆದ್ಯತೆ ಸಿಕ್ಕಿತು.
-ನಾಗರಾಜ್, ಸಹಾಯಕ ನಿರ್ದೇಶಕರು, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಬಳ್ಳಾರಿ.