ಕೋವಿಡ್‌ ಕೇಂದ್ರವಾದವು ಬೆಂಗಳೂರಿನ 10 ಹೋಟೆಲ್‌ಗಳು: 900 ಹಾಸಿಗೆಗಳು ಲಭ್ಯ!

ಬೆಂಗಳೂರು: ಕೊರೊನಾ ಪಾಸಿಟಿವ್‌ ರೋಗಿಗಳಿಗೆ ಆಸ್ಪತ್ರೆಗಳಲ್ಲಿ ಬೆಡ್‌ನ ಕೊರತೆಯಿರುವುದರಿಂದ ನಗರದ 10 ಹೋಟೆಲ್‌ಗಳನ್ನು ಕೋವಿಡ್‌ ಚಿಕಿತ್ಸಾ ಕೇಂದ್ರಗಳಾಗಿ ಪರಿವರ್ತಿಸಲಾಗಿದೆ. ಒಟ್ಟು 900 ಹಾಸಿಗೆಗಳು ಲಭ್ಯವಿವೆ. ಲಕ್ಷಣರಹಿತ ಸೋಂಕಿತರು ಇಲ್ಲಿ ಉಳಿದುಕೊಳ್ಳಬಹುದಾಗಿದೆ.

''ಊಟ, ತಿಂಡಿ, ಜಾಗ ನಮ್ಮದು. ರೋಗಿಗಳ ಆರೈಕೆ, ಚಿಕಿತ್ಸೆ ಆಸ್ಪತ್ರೆಯವರದ್ದು. ಸರಕಾರ ನಿಗದಿಪಡಿಸಿದ ಹಣವನ್ನು ಹೋಟೆಲ್‌ಗಳಿಗೆ ಆಸ್ಪತ್ರೆಯವರೇ ನೀಡುತ್ತಾರೆ,'' ಎಂದು ಬೆಂಗಳೂರು ಹೋಟೆಲ್‌ ಮಾಲೀಕರ ಸಂಘದ ಅಧ್ಯಕ್ಷ ಪಿ.ಸಿ.ರಾವ್‌ ಮತ್ತು ರಾಜ್ಯ ಹೋಟೆಲ್‌ ಮಾಲೀಕರ ಸಂಘದ ಅಧ್ಯಕ್ಷ ಚಂದ್ರಶೇಖರ ಹೆಬ್ಬಾರ್‌ ತಿಳಿಸಿದ್ದಾರೆ.

''ಸರಕಾರದ ಜತೆ ಚರ್ಚಿಸಿ ಈ ನಿರ್ಧಾರ ಕೈಗೊಂಡಿದ್ದೇವೆ. ಹೋಟೆಲ್‌ ಕೋವಿಡ್‌ ಕೇಂದ್ರಗಳಲ್ಲಿ ರೋಗಿಗಳಿಗೆ ಟಿವಿ, ವೈಫೈ, ಉತ್ತಮ ಊಟ, ತಿಂಡಿಯ ವ್ಯವಸ್ಥೆಯಿರುತ್ತದೆ. ಮಧ್ಯದಲ್ಲಿ ಜ್ಯೂಸ್‌, ತಿಂಡಿ ಬೇಕಿದ್ದರೆ ಆರ್ಡರ್‌ ಮಾಡಿ ಪಡೆಯಬಹುದು. ಈ ಕೇಂದ್ರಗಳಲ್ಲಿ ಮನೆಯ ವಾತಾವರಣ ಇರುತ್ತದೆ,'' ಎಂದು ಪಿ.ಸಿ.ರಾವ್‌ ಮಾಹಿತಿ ನೀಡಿದರು.

ಕೊರೊನಾ ಬೆಡ್‌ಗಳನ್ನು ಮರುಬಳಕೆ ಮಾಡುವುದಿಲ್ಲ: ಬಿ.ಎಸ್‌.ಯಡಿಯೂರಪ್ಪ ಸ್ಪಷ್ಟನೆ

''ಹೋಟೆಲ್‌ಗಳನ್ನು ಕೋವಿಡ್‌ ಕೇಂದ್ರಗಳನ್ನಾಗಿಸಲು ನಾವು ಸಿದ್ಧ. ಆದರೆ, ಈ ವೇಳೆ ಕೇಂದ್ರದಲ್ಲಿ ಕಾರ್ಯನಿರ್ವಹಿಸುವ ನಮ್ಮ ಯಾವುದೇ ಸಿಬ್ಬಂದಿ ಕೊರೊನಾದಿಂದ ಸಾವನ್ನಪ್ಪಿದರೆ ಅಂತಹವರ ಕುಟುಂಬಗಳಿಗೆ 50 ಲಕ್ಷ ರೂ. ಪರಿಹಾರ ನೀಡಬೇಕು ಎಂದು ಮನವಿ ಮಾಡಿದ್ದೆವು. ಸರಕಾರ ಇದಕ್ಕೆ ಒಪ್ಪಿಗೆ ಸೂಚಿಸಿದೆ,'' ಎಂದರು.

ಬೆಂಗಳೂರಿನಿಂದ ಇತರೆ ಸ್ಥಳಗಳಿಗೆ ನಾಳೆಯಿಂದ ಕೆಎಸ್‌ಆರ್‌ಟಿಸಿ ಬಸ್‌ ಸಂಚಾರ ಆರಂಭ

ಕೋವಿಡ್‌ ಹಿನ್ನೆಲೆಯಲ್ಲಿ ಕಳೆದ ನಾಲ್ಕು ತಿಂಗಳಿಂದ ವ್ಯಾಪಾರ ವಹಿವಾಟು ಇಲ್ಲದೆ ತತ್ತರಿಸಿರುವ ಹೋಟೆಲ್‌ಗಳಿಗೆ ಇದು ವರದಾನವಾಗಿದೆ. ಹೋಟೆಲ್‌ ಮಾಲೀಕರ ಸಂಘಗಳ ಬೆಂಬಲದಿಂದ ಮೈಸೂರು, ಧಾರವಾಡದಲ್ಲೂತಲಾ ಒಂದೊಂದು ಹೋಟೆಲ್‌ಗಳು ಕೋವಿಡ್‌ ಕೇಂದ್ರಗಳಾಗಿವೆ.