ಕರ್ಫ್ಯೂ ಉಲ್ಲಂಘನೆ: 1680 ವಾಹನಗಳ ವಶ, ಸವಾರರಿಗೆ ನಡಿಗೆಯ ಶಿಕ್ಷೆ!

ಬೆಂಗಳೂರು: ನಗರದಲ್ಲಿ ಕರ್ಫ್ಯೂ ಉಲ್ಲಂಘಿಸಿ ಅನವಶ್ಯಕವಾಗಿ ರಸ್ತೆಯಲ್ಲಿ ತಿರುಗಾಡುತ್ತಿದ್ದ 1680ಕ್ಕೂ ಬೈಕ್‌ಗಳನ್ನು ಪೊಲೀಸರು ಭಾನುವಾರ ವಶಕ್ಕೆ ಪಡೆದ್ದಾರೆ.

ಪೊಲೀಸರು ಪದೇ ಪದೆ ಎಚ್ಚರಿಕೆ ನೀಡುತ್ತಿದ್ದರೂ ಕ್ಯಾರೆ ಎನ್ನದೆ, ರಸ್ತೆಗಿಳಿದ 1680 ಮಂದಿಯಿಂದ ಬೈಕ್‌ಗಳನ್ನು ವಶಪಡಿಸಿಕೊಂಡ ಹಿನ್ನೆಲೆಯಲ್ಲಿಸವಾರರು ನಡೆದುಕೊಂಡೇ ಮನೆಗೆ ಮರಳಿದರು.

ತುರ್ತು ಕಾರಣ ಇಲ್ಲದಿದ್ದರೆ ರಸ್ತೆಗೆ ಇಳಿಯಬೇಡಿ ಎಂದು ಪೊಲೀಸರ ಮನವಿಗೂ ಸ್ಪಂದಿಸದೆ ಮನೆಯಿಂದ ಹೊರಗೆ ಬಂದವರಿಂದ ಅವರ ವಾಹನವನ್ನು ವಶಕ್ಕೆ ಪಡೆಯಲಾಗಿದೆ. ಉತ್ತರ ಡಿಸಿಪಿ ವಿಭಾಗದ 331 ವಾಹನಗಳೂ ಸೇರಿ ಒಟ್ಟು 1680ಕ್ಕೂ ಹೆಚ್ಚು ವಾಹನಗಳನ್ನು ತಡೆದು ನಿಲ್ಲಿಸಲಾಯಿತು. ಕಾರಣ ಕೇಳಿದಾಗ ಸಬೂಬು ಹೇಳಿದ್ದರಿಂದ ಸಂಜೆವರೆಗೂ ವಾಹನಗಳನ್ನು ವಶಕ್ಕೆ ಪಡೆದರು. ಸಂಜೆವರೆಗೂ ಒಂದೇ ಜಾಗದಲ್ಲಿ ಕಾಯುವ ಶಿಕ್ಷೆ ಅನುಭವಿಸಲಾರದೆ ನಡೆದುಕೊಂಡೇ ಮನೆಗೆ ವಾಪಾಸ್‌ ಹೋಗಬೇಕಾಯಿತು.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಹಿರಿಯ ಅಧಿಕಾರಿಗಳು, ಶುಕ್ರವಾರ, ಶನಿವಾರಕ್ಕೆ ಹೋಲಿಸಿದರೆ ಭಾನುವಾರ ಮನೆಯಿಂದ ಹೊರಗೆ ಬಂದವರ ಪ್ರಮಾಣ ಶೇ. 80ರಷ್ಟು ಕಡಿಮೆ ಆಗಿತ್ತು. ಭಾನುವಾರವಾದ್ದರಿಂದ ಹೆಚ್ಚು ಮಂದಿ ಹೊರಗೆ ಬರಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಅತಿ ಕಡಿಮೆ ಮಂದಿ ಹೊರಗೆ ಬಂದಿದ್ದಾರೆ. ಇದು ಆರೋಗ್ಯಕರ ಬೆಳವಣಿಗೆ,''ಎಂದು ತಿಳಿಸಿದರು.