ಡಿಆರ್‌ಡಿಒ ವಿಜ್ಞಾನಿ ಮನೆಯಲ್ಲಿ 6.2 ಲಕ್ಷ ರೂ. ಕಳವು

ಬೆಂಗಳೂರು: ಕಿಡ್ನಿ ಕಸಿ ಶಸ್ತ್ರಚಿಕಿತ್ಸೆಗಾಗಿ ಆಸ್ಪತ್ರೆಗೆ ಶುಲ್ಕ ಕಟ್ಟಲು ಡಿಆರ್‌ಡಿಒ ವಿಜ್ಞಾನಿಯೊಬ್ಬರು ಮನೆಯಲ್ಲಿ ತಂದಿಟ್ಟಿದ್ದ 10 ಲಕ್ಷ ರೂಪಾಯಿಯಲ್ಲಿ 6.20 ಲಕ್ಷ ರೂ. ಕಳ್ಳತನವಾಗಿದೆ.

ವಿಜ್ಞಾನಿ ನಾಗಮಹೇಶ್ವರ್‌ (40) ಅವರ ಮನೆಯಲ್ಲಿ ಮಾ.16ರಂದು ಕಳ್ಳತನವಾಗಿದ್ದು, ಮನೆ ಕೆಲಸದ ಮಹಿಳೆಯರ ಮೇಲೆ ಅನುಮಾನ ವ್ಯಕ್ತಪಡಿಸಿದ್ದಾರೆ.

ನಾಗಮಹೇಶ್ವರ್‌ ಅವರ ಎರಡೂ ಕಿಡ್ನಿಗಳು ಪೂರ್ಣಪ್ರಮಾಣದಲ್ಲಿ ಕೆಲಸ ಮಾಡದ ಕಾರಣ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.ಚಿಕಿತ್ಸಾ ವೆಚ್ಚಕ್ಕಾಗಿ ಅವರು ಬ್ಯಾಂಕ್‌ನಿಂದ 10 ಲಕ್ಷ ರೂಪಾಯಿ ಡ್ರಾ ಮಾಡಿ ತಂದು ಮನೆಯ ಬೀರುವಿನಲ್ಲಿಟ್ಟಿದ್ದರು. ಮಾ.16ರಂದು ಬೀರು ತೆಗೆದು ನೋಡಿದಾಗ 10 ಲಕ್ಷ ರೂ. ಪೈಕಿ 6.20 ಲಕ್ಷ ರೂ. ಕಾಣೆಯಾಗಿತ್ತು. ಈ ಕುರಿತು ಮನೆ ಕೆಲಸ ಮಾಡುವ ಧನಲಕ್ಷ್ಮಿ ಮತ್ತು ರಾಜಲಕ್ಷ್ಮಿ ಎಂಬುವರನ್ನು ವಿಚಾರಿಸಿದರೂ, ಅವರು ತಮಗೆ ಗೊತ್ತಿಲ್ಲ ಎಂದು ಹೇಳಿದ್ದರು.

ಕಳ್ಳತನ ಕುರಿತು ನಾಗಮಹೇಶ್ವರ್‌ ನೀಡಿದ ದೂರು ಆಧರಿಸಿ ಬೈಯ್ಯಪ್ಪನ ಠಾಣೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಆರೋಪದ ಕುರಿತು ಮಹಿಳೆಯನ್ನು ವಿಚಾರಣೆ ನಡೆಸಿದಾಗ ತಮಗೇನು ಗೊತ್ತಿಲ್ಲ ಎನ್ನುತ್ತಿದ್ದಾರೆ. ಆರೋಪಿಗಳ ಪತ್ತೆಗೆ ತನಿಖೆ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದರು.