ಕರ್ನಾಟಕ, ಗೋವಾದ ಏಳು ಸಾವಿರ ಬ್ಯಾಂಕ್‌ ಅಕೌಂಟ್‌ಗಳ ಮೇಲೆ ಐಟಿ ಕಣ್ಣು

ಬೆಂಗಳೂರು: ದೇಶದಲ್ಲಿ ನೋಟು ನಿಷೇಧದ ಬಳಿಕ ಕಾಳ ಧನಿಕರ ಬೆನ್ನು ಬಿದ್ದಿರುವ ತೆರಿಗೆ ಇಲಾಖೆ ಕರ್ನಾಟಕ ಹಾಗೂ ಗೋವಾದ ಎರಡೂ ರಾಜ್ಯಗಳ ಏಳು ಸಾವಿರ ಬ್ಯಾಂಕ್‌ ಖಾತೆಗಳ ಮೇಲೆ ನಿಗಾ ಇರಿಸಿದೆ.

ನೋಟು ನಿಷೇಧದ ಬಳಿಕ ಈ ಖಾತೆಗಳಲ್ಲಿ ಸುಮಾರು 17 ಸಾವಿರ ಕೋಟಿಗೂ ಹಣ ಹೂಡಿಕೆಯಾಗಿದ್ದು, ಈ ಎಲ್ಲಾ ಖಾತೆಗಳ ಕುರಿತು ಸಂಪೂರ್ಣ ಮಾಹಿತಿಯನ್ನು ಐಟಿ ಇಲಾಖೆ ಸಂಗ್ರಹಣೆ ಮಾಡುತ್ತಿದೆ.

'ನಾವು ಸುಮಾರು ಏಳು ಸಾವಿರ ಬ್ಯಾಂಕ್‌ ಖಾತೆಗಳನ್ನು ಗುರುತಿಸಿದ್ದು, ಇವುಗಳ ಈ ವರೆಗೆ 80 ಲಕ್ಷಕ್ಕೂ ಅಧಿಕ ಠೇವಣಿ ಮಾಡಲಾಗಿದೆ. ಈ ಎಲ್ಲಾ ಖಾತೆಗಳ ಕುರಿತು ಬ್ಯಾಂಕ್‌ಗಳಲ್ಲಿ ಮಾಹಿತಿಯನ್ನು ಒದಗಿಸುವಂತೆ ಕೇಳಿಕೊಂಡಿದ್ದೇವೆ' ಎಂದು ಬೆಂಗಳೂರಿನ ತೆರಿಗೆ ಇಲಾಖೆಯ ಮುಖ್ಯ ನಿರ್ದೇಶಕ ಆರ್‌. ರವೀಂದ್ರನ್‌ ಹೇಳಿದ್ದಾರೆ.

ಇದೇ ತಿಂಗಳ ಅಂತ್ಯದೊಳಗೆ ಖಾತೆಗಳಿಗೆ ಸಂಬಂಧಿಸಿದಂತೆ ಎಲ್ಲಾ ಮಾಹಿತಿಗಳನ್ನು ಒದಗಿಸುವಂತೆ ಹೇಳಿದ್ದೇವೆ. ಒಟ್ಟು ಅಧಿಕ ಠೇವಣಿಯ ಜಮೆಯಾದ ಆಧಾರದ ಮೇಲೆ ಈವರೆಗೆ ಒಟ್ಟು 471 ಸಹಕಾರಿ ಹಾಗೂ ವಾಣಿಜ್ಯ ಬ್ಯಾಂಕ್‌ಗಳನ್ನು ಗುರುತಿಸಲಾಗಿದ್ದು, ಈ ಎಲ್ಲಾ ಬ್ಯಾಂಕ್‌ಗಳಿಗೆ ನೋಟೀಸ್‌ ನೀಡಿದ್ದೇವೆ ಎಂದು ರವೀಂದ್ರನ್‌ ಹೇಳಿದ್ದಾರೆ.