'ನಾನೊಬ್ಬ ರೇಪಿಸ್ಟ್, ನೀನೆ ನನ್ನ ಮುಂದಿನ ಬಲಿ: ಆಟೋ ಚಾಲಕನ ಧಮ್ಕಿ

ಬೆಂಗಳೂರು: ರಾಜಧಾನಿ ಬೆಂಗಳೂರು ಮಹಿಳೆಯರಿಗೆ ಸೇಫ್ ಅಲ್ಲ ಎನ್ನುವುದು ಮತ್ತೊಮ್ಮೆ ಸಾಬೀತಾಗಿದೆ. 'ನಾನೊಬ್ಬ ಸರಣಿ ಅತ್ಯಾಚಾರಿ. ನೀನೆ ನನ್ನ ಮುಂದಿನ ಬಲಿ' ಎಂದು ಆಟೋ ಚಾಲಕನೊಬ್ಬ ಮಹಿಳಾ ಪ್ರಯಾಣಿಕರಿಗೆ ಧಮ್ಕಿ ಹಾಕಿದ ಹೇಯ ಕೃತ್ಯ ವರದಿಯಾಗಿದೆ.

ಯುಬಿ ಸಿಟಿಯಲ್ಲಿ ಕೆಲಸ ಮಾಡುತ್ತಿರುವ 25 ವರ್ಷದ ಯುವತಿ ಸೋಮವಾರ ಸಂಜೆ ಕೆಲಸ ಮುಗಿಸಿ ಕೋರಮಂಗಲದಲ್ಲಿರುವ ತನ್ನ ನಿವಾಸಕ್ಕೆ ತೆರಳಲು ಆಟೋ ಹತ್ತಿದ್ದರು. ಈ ವೇಳೆ ಚಾಲಕ ನಿರ್ಜನ ಪ್ರದೇಶದತ್ತ ಆಟೋ ತಿರುಗಿಸಿ, 'ನಾನೊಬ್ಬ ಸರಣಿ ಅತ್ಯಾಚಾರಿ. ನೀನೆ ನನ್ನ ಮುಂದಿನ ಗುರಿ' ಎಂದು ಯುವತಿಯನ್ನು ಬೆದರಿಸಿದ್ದಾನೆ. ಬಳಿಕ ಆಕೆಯ ಪರ್ಸ್ ಕಿತ್ತುಕೊಂಡು ಆಟೋದಿಂದ ಹೊರಗೆ ತಳ್ಳಿ ಪರಾರಿಯಾಗಿದ್ದಾನೆ ಎಂಬ ಆರೋಪಿಸಲಾಗಿದೆ.

ಆಟೋ ಹತ್ತಿದ ಸಮಯದಲ್ಲಿ ಮೀಟರ್ ಕೆಲಸ ಮಾಡುತ್ತಿಲ್ಲ ಎಂದು ಯುವತಿ ದೂರಿದ್ದಳು. ಈ ವೇಳೆ ಕೇವಲ 100 ರೂ.ಗಳಲ್ಲಿ ಮನೆಗೆ ತಲುಪಿಸುವುದಾಗಿ ಚಾಲಕ ಭರವಸೆ ನೀಡಿದ್ದ. ಆದರೆ, ಪ್ರಯಾಣದ ಅಂತ್ಯದಲ್ಲಿ ಆಟೋಗೆ ಗ್ಯಾಸ್ ತುಂಬಿಸುವ ನೆಪ ಹೇಳಿ ಚಾಲಕ 200 ರೂ.ಗಳಿಗೆ ಬೇಡಿಕೆ ಇಟ್ಟಿದ್ದು, ಯುವತಿ ಹಣ ನೀಡಲು ನಿರಾಕರಿಸಿದ್ದೆ ಘಟನೆಗೆ ಕಾರಣ ಎಂದು ತನಿಖೆಯ ಭಾಗವಾಗಿ ಪೊಲೀಸ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಸಂತ್ರಸ್ತ ಯುವತಿ ಚಾಲಕನ ವಿವರಗಳನ್ನು ಪರಿಶೀಲಿಸಲು ಪ್ರಯತ್ನಿಸಿದ್ದರು. ಆದರೆ, ಚಾಲಕನ ಪರವಾನಿಗೆ ಪತ್ತೆ ಮಾಡಲು ವಿಫಲವಾದ ಹಿನ್ನೆಲೆಯಲ್ಲಿ ತನ್ನ ಮೊಬೈಲ್‌ ಫೋನ್‌ನಲ್ಲಿ ಆತನ ಫೋಟೋ ಕ್ಲಿಕಿಸಿಕೊಂಡು ಠಾಣೆಗೆ ದೂರು ನೀಡಿದ್ದಾರೆ.