ಮೆಟ್ರೊ ಟಿಕೆಟ್‌ಗಾಗಿ ಮೊಬೈಲ್‌ ಸ್ವೈಪ್‌ ಸಾಕು

ಬೆಂಗಳೂರು: ನಮ್ಮ ಮೆಟ್ರೊ ಎರಡನೇ ಹಂತ ಕಾರ್ಯಾರಂಭಿಸುವ ವೇಳೆಗೆ ನಾಗರಿಕರ ಪ್ರಯಾಣವನ್ನು ಇನ್ನಷ್ಟು ಸುಗಮಗೊಳಿಸಲು ಬಿಎಂಆರ್‌ಸಿಎಲ್‌ ನೂತನ ಕ್ರಮಗಳನ್ನು ಕೈಗೊಳ್ಳಲಿದೆ.

ಪ್ರಯಾಣಿಕರು ಮೆಟ್ರೊ ಟಿಕೆಟ್‌ ಪಡೆದುಕೊಳ್ಳಲು ಇನ್ನು ಟೋಕನ್‌ ಪಡೆಯಬೇಕಿಲ್ಲ, ಸ್ಮಾರ್ಟ್‌ ಕಾರ್ಡ್‌ ಕೂಡ ಬೇಕಾಗಿಲ್ಲ. ನಿಮ್ಮ ಸ್ಮಾರ್ಟ್‌ಪೋನ್‌ ಸ್ವೈಪ್‌ ಮಾಡಿದರೆ ಸಾಕಾಗುತ್ತದೆ. ಇದಕ್ಕೆಂದೇ ಬಿಎಂಆರ್‌ಸಿಎಲ್‌ ಹೊಸ ಆ್ಯಪ್‌ ಅಭಿವೃದ್ಧಿಪಡಿಸಲು ಕ್ರಮ ಕೈಗೊಂಡಿದೆ.

ಸ್ವಯಂಚಾಲಿತವಾಗಿ ಟಿಕೆಟ್‌ ದರ ಸಂಗ್ರಹಿಸುವ ಇಂಥದ್ದೊಂದು ವ್ಯವಸ್ಥೆ ಜಾರಿಗೊಳಿಸಲು ಬಿಎಂಆರ್‌ಸಿಎಲ್‌ ಟೆಂಡರ್‌ ಆಹ್ವಾನಿಸಿದೆ.

ಮೊಬೈಲ್‌ ಆ್ಯಪ್‌ ಟಿಕೆಟ್‌ ವ್ಯವಸ್ಥೆ ಜಾರಿಗೊಂಡರೂ ಪೂರಕವಾಗಿ ಸ್ಮಾರ್ಟ್‌ಕಾರ್ಟ್‌ ಬಳಕೆ, ಟೋಕನ್‌ ಇರಲಿದೆ. ಮೆಟ್ರೊ ಮತ್ತು ಬಿಎಂಟಿಸಿ ಬಸ್‌ ಟಿಕೆಟ್‌ ಒಳಗೊಳ್ಳುವ ಸಾಮಾನ್ಯ ಸ್ಮಾರ್ಟ್‌ ಕಾರ್ಡ್‌ ರೂಪಿಸುವ ಯೋಜನೆಯೂ ಬಿಎಂಆರ್‌ಸಿಎಲ್‌ಗಿದೆ.

ಮೊದಲ ಹಂತದ ಮೆಟ್ರೊದಲ್ಲಿ ನಾಲ್ಕು ಲಕ್ಷ ಪ್ರಯಾಣಿಕರು ಪ್ರಯಾಣಿಸುತ್ತಿದ್ದು, ಎರಡನೇ ಹಂತ ಪೂರ್ಣಗೊಂಡಲ್ಲಿ 15 ಪ್ರಯಾಣಿಕರು ಪ್ರಯಾಣಿಸಲಿದ್ದಾರೆ. ಸದ್ಯ ಹೆಚ್ಚಿನ ಪ್ರಯಾಣಿಕರು ಟೋಕನ್ ಪಡೆಯುತ್ತಿದ್ದು, ಹಂತ ಹಂತವಾಗಿ ಇದು ಸ್ಮಾರ್ಟ್‌ ಕಾರ್ಡ್‌ಗೆ ಶಿಫ್ಟ್‌ ಆಗಿದ್ದು, ಸ್ಮಾರ್ಟ್‌ ಕಾರ್ಡ್‌ ದರದಲ್ಲಿ ಕೊಂಚ ರಿಯಾಯಿತಿ ಕೂಡ ನೀಡಿರುವುದಾಗಿ ಬಿಎಂಆರ್‌ಸಿಎಲ್‌ ಹೇಳಿದೆ.