ಸಂಜಯ್‌ದತ್‌ ಫೋಟೊದಿಂದ ಸಿಕ್ಕಿ ಬಿದ್ದ ಆಟೊ ಚಾಲಕ

ನಿವೃತ್ತ ಹೆಡ್‌ ಕಾನ್ಸ್‌ಟೇಬಲ್‌ಗೆ ಡಿಕ್ಕಿ ಹೊಡೆದು ನಿಲ್ಲಿಸದೆ ಪರಾರಿಯಾಗಿದ್ದ ಆಟೋರಿಕ್ಷಾದ ಹಿಂಬದಿಯಲ್ಲಿದ್ದ ನಟ ಸಂಜಯ್‌ ದತ್‌ ಫೋಟೋ ಆಧರಿಸಿ ಆರೋಪಿ ಚಾಲಕನನ್ನು ಮಡಿವಾಳ ಸಂಚಾರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಆಟೋ ಡಿಕ್ಕಿ ಹೊಡೆದು ಕೆಎಸ್‌ಆರ್‌ಪಿ ನಿವೃತ್ತ ಕಾನ್ಸ್‌ಟೇಬಲ್‌ ರಾಮರಾವ್‌ (66) ಮೃತಪಟ್ಟಿದ್ದರು. ಚಾಲಕ ಶೋಯಬ್‌ ಖಾನ್‌(19) ಎಂಬಾತನನ್ನು ಬಂಧಿಸಲಾಗಿದೆ. ಜೂನ್‌ 17ರಂದು ಮಧ್ಯಾಹ್ನ 1 ಗಂಟೆ ಸುಮಾರಿಗೆ ಮಡಿವಾಳ ಮಾರುಕಟ್ಟೆ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದ ರಾಮರಾವ್‌ ಅವರಿಗೆ ಆಟೋ ಡಿಕ್ಕಿಯಾಗಿತ್ತು. ಚಾಲಕ ಆಟೊ ಸಹಿತ ಪರಾರಿಯಾಗಿದ್ದ. ಘಟನಾ ಸ್ಥಳದಿಂದ ಸುಮಾರು 500 ಮೀಟರ್‌ ದೂರದಲ್ಲಿರುವ ಸಿಸಿಟಿವಿ ವಿಡಿಯೋ ಪರಿಶೀಲಿಸಿದಾಗ ಶಂಕಿತ ಆಟೋದ ನೋಂದಣಿ ಸಂಖ್ಯೆ ಅಸ್ಪಷ್ಟವಾಗಿತ್ತು. ಆದರೆ, ಹಿಂಬದಿಯಲ್ಲಿ ಸಂಜಯ್‌ ದತ್‌ ಫೋಟೋ ಇರುವುದು ಕಾಣಿಸಿತ್ತು.

ಸುಳಿವು ಆಧರಿಸಿ ಸುಮಾರು 30 ಆಟೋಗಳನ್ನು ಗುರುತಿಸಿ ಚಾಲಕರನ್ನು ವಿಚಾರಣೆ ನಡೆಸಲಾಗಿತ್ತು. ಆದರೆ, ಡಿಕ್ಕಿ ಮಾಡಿದ ಆಟೋ ಚಾಲಕ ಪತ್ತೆಯಾಗಲಿಲ್ಲ. ಹೀಗಾಗಿ, ಆಟೋ ಸಂಚರಿಸಿರಬಹುದಾದ ಬೇರೆ ಬೇರೆ ರಸ್ತೆಗಳಲ್ಲಿ ಸಂಜಯ್‌ ದತ್‌ ಫೋಟೋ ಇರುವ ಆಟೋಗಳನ್ನು ಹುಡುಕುತ್ತಿದ್ದಾಗ ಸಿದ್ದಾಪುರದ ಮನೆಯ ಮುಂಭಾಗದಲ್ಲಿ ಆಟೋ ಕಾಣಿಸಿದೆ. ನಂತರ ಚಾಲಕ ಶೋಯಬ್‌ ಖಾನ್‌ನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ, ಹಿಟ್‌ ಆ್ಯಂಡ್‌ ರನ್‌ ಆರೋಪಿ ಎಂದು ಖಚಿತವಾಯಿತು ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದರು.