ಆ್ಯಪ್ನಗರ

ವಿಕ ಇಂಪ್ಯಾಕ್ಟ್: ಬೆಂಗಳೂರಿನ ನಾಯಂಡಹಳ್ಳಿ ಜಂಕ್ಷನ್‌ ಅವ್ಯವಸ್ಥೆಗೆ ಶೀಘ್ರ ಮುಕ್ತಿ

ಬೆಂಗಳೂರಿನ ನಾಯಂಡಹಳ್ಳಿ ಜಂಕ್ಷನ್‌ ಒಂದು ಪ್ರಮುಖ ರಸ್ತೆಯಾಗಿದೆ. ನಿತ್ಯ ಸಹಸ್ರಾರು ಜನರು ಆ ರಸ್ತೆಯಲ್ಲಿ ಸಂಚರಿಸುತ್ತಾರೆ. ಆದರೆ, ಮಳೆಗಾಲದಲ್ಲಿ ಈ ರಸ್ತೆಯಲ್ಲಿ ಸಂಚರಿಸಲು ಹಿಡಿಶಾಪ ಹಾಕುವಂತಾಗಿತ್ತು. ಇದಕ್ಕೀಗ ಮುಕ್ತಿ ದೊರೆತಿದೆ.

Vijaya Karnataka 16 Sep 2019, 7:20 am
ಬೆಂಗಳೂರು: ಮಳೆ ಬಂದಾಗಲೆಲ್ಲಾ ಮುಳುಗೇಳುತ್ತಿದ್ದ ನಾಯಂಡಹಳ್ಳಿ ಜಂಕ್ಷನ್‌ಗೆ ಕೊನೆಗೂ ಮುಕ್ತಿ ದೊರೆಯುತ್ತಿದೆ. ಬಿಬಿಎಂಪಿಯು ಕೈಗೊಂಡಿದ್ದ ಕಾಲುವೆ ಪುನರ್‌ನಿರ್ಮಾಣ ಕಾಮಗಾರಿ ಪೂರ್ಣಗೊಂಡಿದ್ದು, ವಾಹನ ಸವಾರರು ಪ್ರವಾಹ ಭೀತಿಯಿಲ್ಲದೇ ಸಂಚರಿಸುವ ಕಾಲ ಸಮೀಪಿಸಿದೆ.
Vijaya Karnataka Web nayandahalli junction


ನಗರದಲ್ಲಿ ಜೋರು ಮಳೆ ಸುರಿದಾಗಲೆಲ್ಲ ಮೈಸೂರು ರಸ್ತೆಯ ನಾಯಂಡಹಳ್ಳಿ ಜಂಕ್ಷನ್‌ನಲ್ಲಿ ಪ್ರವಾಹ ಉಂಟಾಗಿ ಕಾರುಗಳು ಮುಳುಗುತ್ತಿದ್ದವು. ಕಳೆದ ವರ್ಷದ ಮಳೆಗಾಲದಲ್ಲಿ ಈ ಜಂಕ್ಷನ್‌ನಲ್ಲಿ ಕಾಲುವೆಗೆ ಕಾರು ಬಿದ್ದು ಮುಳುಗಿತ್ತು. ಪ್ರತಿ ಮಳೆಗಾಲದಲ್ಲಿಯೂ ಈ ಜಂಕ್ಷನ್‌ ನೀರು ತುಂಬಿಕೊಂಡು ಕೆರೆಯಾಗುತ್ತಿತ್ತು.ಈ ರಸ್ತೆಯಲ್ಲಿ ಸಂಚರಿಸಲು ವಾಹನ ಸವಾರರು ಹೆದರುತ್ತಿದ್ದರು. ಈ ಕುರಿತು ‘ವಿಜಯ ಕರ್ನಾಟಕ’ವು ವಿಶೇಷ ಸರಣಿ ವರದಿಗಳನ್ನು ಪ್ರಕಟಿಸಿ ಬಿಬಿಎಂಪಿ ಗಮನಸೆಳೆದಿತ್ತು.

ನಾಯಂಡಹಳ್ಳಿ ಜಂಕ್ಷನ್‌ನಲ್ಲಿ ಕಾಲುವೆಯ ಒಂದು ಬದಿಯ ತಡೆಗೋಡೆ ಕಾಮಗಾರಿ ಪೂರ್ಣಗೊಂಡಿದೆ. ಇfನನೊಂದು ಬದಿಯ ಕಾಮಗಾರಿ ನಡೆಯಬೇಕಿದೆ


ವಿಕ ಕಚೇರಿಯಲ್ಲಿ ನಡೆದ ಪೋನ್‌ ಇನ್‌ ಕಾರ್ಯಕ್ರಮಕ್ಕೆ ಬಂದಿದ್ದ ಮೇಯರ್‌ ಗಂಗಾಂಬಿಕೆ ಮಲ್ಲಿಕಾರ್ಜುನ್‌ ಅವರ ಗಮನಕ್ಕೆ ಈ ವಿಷಯ ತರಲಾಗಿತ್ತು. ಮರು ದಿನವೇ ಮೇಯರ್‌ ಸ್ಥಳಕ್ಕೆ ಭೇಟಿ ನೀಡಿ, ಕಾಮಗಾರಿ ಕೈಗೊಳ್ಳುವಂತೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ತಾಕೀತು ಮಾಡಿದ್ದರು. ಆದರೂ, ಕಾಮಗಾರಿ ಶುರು ಮಾಡಲು ವಿಳಂಬ ಧೋರಣೆ ಅನುಸರಿಸಲಾಗುತ್ತಿತ್ತು. ಈ ಬಗ್ಗೆ ಮತ್ತೆ ವರದಿ ಪ್ರಕಟಿಸಿ ಮೇಯರ್‌ ಅವರ ಗಮನಕ್ಕೆ ತರಲಾಯಿತು. ಮತ್ತೆ ಸ್ಥಳ ಪರಿಶೀಲನೆ ನಡೆಸಿ ಕಾಮಗಾರಿ ನಡೆಸದಿರುವುದಕ್ಕೆ ಮೇಯರ್‌ ಗಂಗಾಂಬಿಕೆ ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡಿದ್ದರು. ಕಳೆದ ನಾಲ್ಕು ತಿಂಗಳ ಹಿಂದೆ ಈ ಕೆಲಸ ಆರಂಭಗೊಂಡಿತ್ತು.

ಅಪಾಯಕಾರಿ ಜಂಕ್ಷನ್‌ ಕುರಿತು ‘ವಿಕ’ ತಂಡ ಬಿಬಿಎಂಪಿ ಅಧಿಕಾರಿಗಳು ಹಾಗೂ ಗುತ್ತಿಗೆದಾರರ ಬೆನ್ನತ್ತಿತ್ತು. ಕಾಮಗಾರಿಯ ಪ್ರತಿ ಹಂತದಲ್ಲಿಯೂ ವರದಿ ಪ್ರಕಟಿಸಿ ಬೇಗ ಕೆಲಸ
ಮುಗಿಸಲು ಒತ್ತಡ ಹಾಕಿತ್ತು. ಮೇಯರ್‌ ಗಂಗಾಂಬಿಕೆ ಅವರು ಸಹ ಕೆಲಸ ಚುರುಕುಗೊಳಿಸಲು ನೆರವಾದರು. ಈಗ ಪುನರ್‌ ನಿರ್ಮಾಣ ಕಾಮಗಾರಿಯು ಅಂತಿಮ ಹಂತಕ್ಕೆ ತಲುಪಿದೆ. ವೃಷಭಾವತಿ ವ್ಯಾಲಿಗೆ ಸಂಪರ್ಕ ಕಲ್ಪಿಸುವ ವಿಜಯನಗರ ಕಡೆಯಿಂದ ಹರಿದು ಬರುವ ಕಾಲುವೆಯ ದುರಸ್ತಿ ಕಾರ್ಯ ಮುಗಿದಿದೆ. ಅಲ್ಲದೇ ವೃಷಭಾವತಿ ಕಡೆಗೆ
ತಡೆಗೋಡೆಯನ್ನೂ ನಿರ್ಮಿಸಲಾಗಿದೆ. ಬಲ ಬದಿಯ ಕಾಲುವೆಗೆ ತಡೆಗೋಡೆ ನಿರ್ಮಿಸುವುದಷ್ಟೇ ಬಾಕಿ ಇದೆ.

ಕಳೆದ ವರ್ಷದ ಮಳೆಗಾಲದಲ್ಲಿ ನಾಯಂಡಹಳ್ಳಿ ಜಂಕ್ಷನ್‌ನಲ್ಲಿ ಮುಳುಗಿದ್ದ ಕಾರು

ವಿಜಯನಗರ ಕಡೆಯಿಂದ ಸಾಗಿ ಬರುವ ಕಾಲುವೆಯು ಶಿಥಿಲಗೊಂಡಿದ್ದರಿಂದ ಮಳೆ ನೀರು ಹಿಮ್ಮುಖವಾಗಿ ಹರಿದು ಪ್ರವಾಹ ಉಂಟಾಗುತ್ತಿತ್ತು. ಇದರಿಂದ ಪ್ರತಿ ವರ್ಷವೂ ಕಾರುಗಳು ಮುಳುಗುತ್ತಿದ್ದವು. ಇದರಿಂದ ವಾಹನ ಸವಾರರು ಜೀವ ಕೈಯಲ್ಲಿ ಹಿಡಿದುಕೊಂಡು ಓಡಾಡಬೇಕಿತ್ತು. ಸದ್ಯ ಕಾಲುವೆಗೆ ಪ್ರೀಕಾಸ್ಟ್‌ ಎಲಿಮೆಂಟ್‌ಗಳನ್ನು ಅಳವಡಿಸಿ, ದುರಸ್ತಿಗೊಳಿಸಲಾಗಿದೆ. ವೃಷಭಾವತಿ ಕಾಲುವೆ ಪಕ್ಕದಲ್ಲಿನ ಖಾಲಿ ಜಾಗದಲ್ಲಿ ಕಟ್ಟಡದ ಅವಶೇಷಗಳನ್ನು ಸುರಿಯಲಾಗುತ್ತಿತ್ತು. ಸದ್ಯ ಅದೆಲ್ಲವನ್ನು ತೆರವುಗೊಳಿಸಿ, ತಡೆಗೋಡೆ ನಿರ್ಮಿಸಲಾಗಿದೆ. ಇದರಿಂದ ಮಳೆಗಾಲದಲ್ಲಿ ಸಂಭಾವ್ಯ ಅನಾಹುತ ತಡೆಗೆ ಕ್ರಮ ವಹಿಸಲಾಗಿದೆ.

ನಾಯಂಡಹಳ್ಳಿ ಜಂಕ್ಷನ್‌ನಲ್ಲಿ ರಾಜಕಾಲುವೆಗೆ ನಿರ್ಮಿಸಿರುವ ತಡೆಗೋಡೆ ಕಾಮಗಾರಿ ಮುಂದಿನ 15 ದಿನಗಳಲ್ಲಿ ಪೂರ್ಣಗೊಳ್ಳಲಿದೆ
- ಗಂಗಾಂಬಿಕೆ ಮಲ್ಲಿಕಾರ್ಜುನ್‌, ಮೇಯರ್

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ