ಪೌರಕಾರ್ಮಿಕರಿಗಾಗಿ ಮಾಸ್ಕ್‌ ಹೊಲಿಯುತ್ತಿರುವ ಬೆಂಗಳೂರಿನ ಶಾಲಾ ಮಕ್ಕಳು

ಬೆಂಗಳೂರು: ಕೊರೊನಾ ವಿರುದ್ಧದ ಹೋರಾಟದಲ್ಲಿ ಇಡೀ ದೇಶವೇ ತೊಡಗಿಕೊಂಡಿವೆ. ಬಹುಪಾಲು ಜನರು ಮನೆಯೊಳಗೇ ಉಳಿಯುವ ಮೂಲಕ ಸಮರಕ್ಕೆ ದೊಡ್ಡ ಸಹಾಯ ಮಾಡುತ್ತಿದ್ದಾರೆ. ವೈದ್ಯಕೀಯ ಸಿಬ್ಬಂದಿ, ಪೊಲೀಸರು, ಪೌರ ಕಾರ್ಮಿಕರು ವೀರ ಸೇನಾನಿಗಳಂತೆ ಬಡಿದಾಡುತ್ತಿದ್ದಾರೆ. ಈ ನಡುವೆ, ಹಲವಾರು ಮಂದಿ ತಮ್ಮ ವಿಶಿಷ್ಟ ಕೆಲಸಗಳ ಮೂಲಕ ಜನರ ನೆರವಿಗೆ ನಿಂತಿದ್ದಾರೆ.

ಈ ನಿಟ್ಟಿನಲ್ಲಿ ಬೆಂಗಳೂರಿನ ಇಬ್ಬರು ಸೋದರಿಯರ ವಿಶಿಷ್ಟ ಸೇವೆ ಎಲ್ಲರ ಗಮನ ಸೆಳೆದಿದೆ. ಈ ಬಾಲಕಿಯರು ಪೌರ ಕಾರ್ಮಿಕರಿಗಾಗಿ ಮಾಸ್ಕ್‌ ತಯಾರಿಸಿ ಕೊಟ್ಟು ಗಮನ ಸೆಳೆದಿದ್ದಾರೆ.

ಸದಾಶಿವ ನಗರದ ನವ್ಯ ಮರುಳಿ (12 ವರ್ಷ) ಹಾಗೂ ನಿರ್ವ ಮುರಳಿ (10) ಯಲಹಂಕ ಸಮೀಪ ಇರುವ ವಿದ್ಯಾಶಿಲ್ಪ ಅಕಾಡೆಮಿ ಶಾಲೆಯ ವಿದ್ಯಾರ್ಥಿಗಳು. ಏಳನೇ ತರಗತಿ ವಿದ್ಯಾರ್ಥಿನಿ ನವ್ಯ ಕಳೆದ ಫೆಬ್ರವರಿಯಲ್ಲಿ ಜನ್ಮ ದಿನ ಆಚರಿಸಿಕೊಂಡಾಗ ತಂದೆ ಮಗಳಿಗೆ ಹುಟ್ಟುಹಬ್ಬದ ಕೊಡುಗೆಯಾಗಿ ಹೊಲಿಗೆ ಯಂತ್ರವೊಂದನ್ನು ನೀಡಿದ್ದರು. ಅದನ್ನು ಸದುಪಯೋಗ ಪಡಿಸಿಕೊಂಡಿರುವ ಈಕೆ ತನ್ನ ಸೋದರಿ ಜತೆ ಸೇರಿ ಮಾಸ್ಕ್‌ ತಯಾರಿಕೆಯಲ್ಲಿ ತೊಡಗಿದ್ದಾಳೆ.

ಮೋದಿ ವಿಡಿಯೋ ಸಂದೇಶ: ಏ.5 ಭಾನುವಾರ ರಾತ್ರಿ 9 ಗಂಟೆಗೆ 9 ನಿಮಿಷ ದೀಪ ಬೆಳಗಿಸಲು ಕರೆ!

''ರಸ್ತೆಯಲ್ಲಿಪೌರ ಕಾರ್ಮಿಕರು ಮುಖಕ್ಕೆ ಮಾಸ್ಕ್‌ ಇಲ್ಲದಿರುವುದನ್ನು ನೋಡಿದೆ. ಸೀರೆಯ ಅಂಚು ಹಾಗೂ ಬಟ್ಟೆಯಿಂದ ಮುಖ ಮುಚ್ಚಿಕೊಳ್ಳುವುದು ಅಷ್ಟು ಸರಿ ಕಾಣದು. ಕೊರೊನಾ ಸೋಂಕು ಅವರಿಗೆ ತಗುಲಬಾರದೆಂಬ ಕಳಕಳಿಯಿಂದ ತಂದೆ ಕೊಡಿಸಿದ್ದ ಹೊಲಿಗೆ ಯಂತ್ರದ ಸಹಾಯದಿಂದ ಹತ್ತು ದಿನಗಳಲ್ಲಿ 150 ಮಾಸ್ಕ್‌ ತಯಾರಿಸಿದ್ದೇವೆ,'' ಎನ್ನುವುದು ನವ್ಯ ಹೆಮ್ಮೆಯ ಮಾತು.

''ನಿತ್ಯ 20 ಮಾಸ್ಕ್‌ ತಯಾರಿಸುತ್ತಿದ್ದೇವೆ. ಬೆಳಗಿನ ತಿಂಡಿ ಮುಗಿಸಿ ಮಾಸ್ಕ್‌ ತಯಾರಿಕೆಯಲ್ಲಿ ತೊಡಗುತ್ತೇವೆ. ಮಧ್ಯೆ ಊಟ ಹಾಗೂ ಕೆಲ ಸಮಯ ವಿಶ್ರಾಂತಿ ಕೂಡ ಪಡೆಯುತ್ತೇವೆ. ನಮ್ಮ ಶ್ರಮದಿಂದ ನಗರ ಶುಚಿಗೊಳಿಸುವವರಿಗೆ ಒಂದಿಷ್ಟು ಸಹಾಯ ಮಾಡಿದ ಸಾರ್ಥಕತೆ ಇದೆ'' ಎನ್ನುತ್ತಾಳೆ ನಿರ್ವ ಮುರಳಿ.

ಪ್ರಧಾನಿ ಮೋದಿ ವಿಡಿಯೋ ಸಂದೇಶದಲ್ಲಿ ಏನಿದೆ? ಇಲ್ಲಿದೆ ಪೂರ್ಣ ವಿವರ