ತಲೆ ನೋವು ನಿವಾರಣೆಗೆ ಏಕಕಾಲಕ್ಕೆ 15 ಮಾತ್ರೆ ಸೇವಿಸಿ ಬೆಂಗಳೂರು ಮಹಿಳೆ ಸಾವು!

ಬೆಂಗಳೂರು: ತಲೆ ನೋವು ನಿವಾರಣೆಗಾಗಿ ಏಕಕಾಲಕ್ಕೆ 15 ಮಾತ್ರೆಗಳನ್ನು ಸೇವಿಸಿ ಮಹಿಳೆ ಸಾವನ್ನಪ್ಪಿರುವ ಘಟನೆ ರಾಜಧಾನಿ ಬೆಂಗಳೂರಿನಲ್ಲಿ ನಡೆದಿದೆ.

ಅನುಸೂಯಮ್ಮ (45) ಮೃತ ದುರ್ದೈವಿ. ಕಾರ್ಮಿಕರಾದ ಮುನೇಶಪ್ಪ ಎಂಬವರ ಪತ್ನಿ ಅನುಸೂಯಮ್ಮ ಅವರು ಕಳೆದ 15 ವರ್ಷಗಳಿಂದ ತಲೆ ನೋವಿನಿಂದ ಬಳಲುತ್ತಿದ್ದು, ಚಿಕಿತ್ಸೆ ಪಡೆಯುತ್ತಿದ್ದರು.

ಶನಿವಾರ ರಾತ್ರಿ ವಿಪರೀತ ತಲೆ ನೋವು ಕಾಣಿಸಿಕೊಂಡ ಪರಿಣಾಮ ಅವರು ಏಕಾಏಕಿ 15 ಮಾತ್ರೆಗಳನ್ನು ಸೇವಿಸಿ ಪ್ರಜ್ಞೆ ಕಳೆದುಕೊಂಡಿದ್ದರು. ಕೂಡಲೇ ಅವರನ್ನು ನಗರದ ವಿಕ್ಟೋರಿಯಾ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ, ಚಿಕಿತ್ಸೆ ಫಲಕಾರಿಯಾಗದೆ ಅವರು ಕೊನೆಯುಸಿರೆಳಿದಿದ್ದಾರೆ.

ಪತಿಯ ದೂರಿನ ಆಧಾರದ ಮೇಲೆ ಆನೇಕಲ್ ಪೊಲೀಸರು ಅಸ್ವಾಭಾವಿಕ ಸಾವೆಂದು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.