ಬೆಂಗಳೂರಿನಲ್ಲಿದೆ 174 ನೆರೆ ಪೀಡಿತ ಕೇಂದ್ರಗಳು

ಬೆಂಗಳೂರು: ಬಿಸಿಲ ಬೇಗೆಗದ ಬೇಸತ್ತಿರುವ ನಗರದ ಜನರು ಮುಂಗಾರು ಮಳೆ ಶೀಘ್ರದಲ್ಲಿ ಬರಲಿ ಎಂದು ಪ್ರಾರ್ಥಿಸುತ್ತಿರುವುದು ಮಾಮೂಲು, ಕರ್ನಾಟಕ ರಾಜ್ಯ ನೈಸರ್ಗಿಕ ವಿಪತ್ತು ನಿರ್ವಹಣಾ ಕೇಂದ್ರದ ನಗರದಾದ್ಯಂತ 174 ನೆರೆಪೀಡಿತ ಕೇಂದ್ರಗಳನ್ನು ಗುರುತಿಸಿದೆ. ವಿಪರ್ಯಾಸವೆಂದರೆ ಕೇವಲ 10 ಮಿಲಿ ಮೀಟರ್ ಮಳೆಗೆ ಈ ಎಲ್ಲಾ ಪ್ರದೇಶಗಳು ಕೊಚ್ಚಿಹೋಗಬಹುದು.

ಒಳ ಚರಂಡಿ ವ್ಯವಸ್ಥೆಯ ಕೊರತೆ ಮತ್ತು ಮಳೆ ನೀರ ನಿರ್ವಹಣೆಯಲ್ಲಿನ ಲೋಪಗಳಿಂದಾಗಿ ನಗರದ 174 ಪ್ರದೇಶಗಳಲ್ಲಿ ಮುಂಬರುವ ಮಳೆಯಿಂದಾಗಿ ಹಾನಿ ಸಂಭವಿಸಬಹುದು. ಈ ಕುರಿತು ಟೈಮ್ಸ್‌ ಆಫ್‌ ಇಂಡಿಯಾಗೆ ಹೇಳಿಕೆ ನೀಡಿರುವ ಕೆಎಸ್ಎನ್ ಡಿಎಂಸಿಯ ಹೈಡ್ರಾಲಜಿ ವಿಭಾಗದ ಯೋಜನಾ ವಿಜ್ಞಾನಿ ಶುಭಾ ಅವಿನಾಶ್ ಬಿಬಿಎಂಪಿ ವ್ಯಾಪ್ತಿಯಲ್ಲಿರುವ 10 ಪ್ರದೇಶಗಳು ಕನಿಷ್ಟ 10ಎಂಎಂ ಮಳೆಗೇ ಪ್ರವಾಹ ಪರಿಸ್ಥಿತಿ ಎದುರಿಸಬಹುದು ಎಂದಿದ್ದಾರೆ.

ನಾವು ಗುರುತಿಸಿದ ಪ್ರದೇಶದಲ್ಲಿ ಬೆಂಗಳೂರು ನಗರದ ದಕ್ಷಿಣ ಹಾಗೂ ಬೊಮ್ಮನಹಳ್ಳಿ ಸುತ್ತಮುತ್ತಲಿನ ಪ್ರದೇಶಗಳೇ ಹೆಚ್ಚು ಪ್ರವಾಹಕ್ಕೀಡಾಗಬಹುದು. ಈ ಕುರಿತು ಬಿಬಿಎಂಪಿಗೆ ಮಾಹಿತಿಯನ್ನೂ ಸಹ ರವಾನಿಸಿದ್ದೇವೆ ಎಂದು ಶುಭಾ ಅವಿನಾಶ್ ಹೇಳಿದ್ದಾರೆ.

ಬೆಂಗಳೂರಿನ ದಕ್ಷಿಣ ಭಾಗದಲ್ಲಿ ಕಳೆದ ವರ್ಷ ಜುಲೈನಲ್ಲಿ ಸಂಭವಿಸಿದ ಭೀಕರ ಮಳೆಗೆ ಪ್ರವಾಹ ಸಂಭವಿಸಿತ್ತು. ಅಲ್ಲಿನ ನಿವಾಸಿಗಳ ರಕ್ಷಣೆಗೆ ಕೇಂದ್ರದಿಂದಲೇ ವಿಪತ್ತು ನಿರ್ವಹಣಾ ತಂಡವನ್ನು ಕರೆತರಬೇಕಾಗಿ ಬಂದಿತ್ತು. ಹೀಗಾಗಿ ರಾಜ್ಯ ಸರಕಾರ, ನೀರಿನ ಮೋರಿಗಳಲ್ಲಿ ತುಂಬಿದ್ದ ಕಸ ಹಾಗೂ ತ್ಯಾಜ್ಯಗಳ ನಿರ್ವಹಣೆ ಕುರಿತು ದೊಡ್ಡ ಮಟ್ಟದ ಯೋಜನೆಯನ್ನೇ ಕೈಗೊಂಡಿತ್ತು.

ಈ ಕುರಿತು ಮಾತನಾಡಿರುವ ಕೆಎಸ್ಎನ್ ಡಿಎಂಸಿಯ ನಿರ್ದೇಶಕ ಶ್ರೀನಿವಾಸ ರೆಡ್ಡಿ'1940ರಲ್ಲಿ ಬೆಂಗಳೂರಿನಲ್ಲಿ 990 ಮಿಲಿ ಮೀಟರ್ ವಾರ್ಷಿಕ ಮಳೆ ಸಂಭವಿಸುತ್ತಿತ್ತು. ಆದರೆ ಇದೀಗ ಬೆಂಗಳೂರಿನಲ್ಲಿ ಶೇಕಡಾ 30ರಷ್ಟು ಮಳೆ ನೀರು ಮಾತ್ರ ಕೆರೆಗೆ ಸೇರುತ್ತಿದೆ. ಉಳಿದ ನೀರು ಭೂಮಿಗೆ ಇಂಗಿ ಹೋಗುತ್ತಿತ್ತು. ಇಂದು ಶೇಕಡಾ 10ಕ್ಕಿಂತ ಕಡಿಮೆ ಮಳೆ ನೀರು ಕೆರೆಗೆ ಹರಿದು ಹೋಗುತ್ತದೆ. ಸಿಮೆಂಟ್ ನ ಕಾರಣದಿಂದ ಹೀಗಾಗುತ್ತಿದ್ದು ನೀರನ್ನು ಹೀರಿಕೊಳ್ಳಲು ಜಾಗವಿಲ್ಲದಾಗಿದೆ ಎಂದಿದ್ದಾರೆ.