ಬೆಂಗಳೂರಲ್ಲಿ ಮಾರ್ಷಲ್‌ಗಳ ಸೇವೆ ಸ್ಥಗಿತಕ್ಕೆ ಒತ್ತಾಯವೇಕೆ?: ಗಂಭೀರವಾಯಿತೇ ವೃದ್ಧನ ಮೇಲಿನ ದೌರ್ಜನ್ಯ ಪ್ರಕರಣ?

ಬೆಂಗಳೂರು: ಸಾರ್ವಜನಿಕರೊಂದಿಗೆ ಸೌಜನ್ಯದಿಂದ ವರ್ತಿಸದೆ ದರ್ಪ ಪ್ರದರ್ಶಿಸುತ್ತಿರುವ ಮಾರ್ಷಲ್‌ಗಳಿಂದಾಗಿ ಪಾಲಿಕೆಗೆ ಕೆಟ್ಟ ಹೆಸರು ಬರುತ್ತಿದೆ. ಹೀಗಾಗಿ, ಇವರ ಸೇವೆಯನ್ನು ಸ್ಥಗಿತಗೊಳಿಸಬೇಕು ಎಂದು ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ ಅಧಿಕಾರಿ ಮತ್ತು ನೌಕರರ ಕ್ಷೇಮಾಭಿವೃದ್ಧಿ ಸಂಘವು ಒತ್ತಾಯಿಸಿದೆ.

''ಬಿಬಿಎಂಪಿಯಲ್ಲಿ ನಿಯಮಬಾಹಿರವಾಗಿ 500ಕ್ಕೂ ಹೆಚ್ಚು ಮಾರ್ಷಲ್‌ಗಳು ಕಾರ್ಯ ನಿರ್ವಹಿಸುತ್ತಿದ್ದು, ಕೋಟ್ಯಂತರ ರೂ. ನಷ್ಟವಾಗುತ್ತಿದೆ. ಮಾರ್ಷಲ್‌ಗಳ ಮುಖ್ಯಸ್ಥರಿಗೆ ಕೇಂದ್ರ ಕಚೇರಿಯಲ್ಲಿ ಕಚೇರಿ ವ್ಯವಸ್ಥೆ ಮಾಡಿಕೊಟ್ಟಿರುವುದು ಕಾನೂನುಬಾಹಿರವಾಗಿದೆ,'' ಎಂದು ಸಂಘದ ಅಧ್ಯಕ್ಷ ಎ.ಅಮೃತ್‌ರಾಜ್‌ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ವೃದ್ಧ ವ್ಯಾಪಾರಿ ಮೇಲೆ ದೌರ್ಜನ್ಯ?

''ಜಯನಗರ ವಾಣಿಜ್ಯ ಸಂಕೀರ್ಣದಲ್ಲಿ ಬ್ಯಾಗ್‌ ಮಾರಾಟ ಮಾಡುತ್ತಿದ್ದ ಬಡ ವಯೋವೃದ್ಧ ವ್ಯಾಪಾರಿಯ ಮೇಲೆ ಮಾರ್ಷಲ್‌ಗಳು ದೌರ್ಜನ್ಯವೆಸಗಿದ್ದು, ಈ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಇದಲ್ಲದೆ, ಈ ಹಿಂದೆ ಯಲಹಂಕ ವಲಯದ ಮಾರ್ಷಲ್‌ಗಳು ಪಾಲಿಕೆಯ ಗಸ್ತು ವಾಹನದಲ್ಲಿ ಮದ್ಯ ಕೊಂಡೊಯ್ದಿದ್ದರು. ಆದ ಕಾರಣ, ಈ ಕೂಡಲೇ ಪಾಲಿಕೆಯಿಂದ ನಿಯೋಜಿಸಿಕೊಂಡಿರುವ ಮಾರ್ಷಲ್‌ಗಳ ಸೇವೆಯನ್ನು ಸ್ಥಗಿತಗೊಳಿಸಬೇಕು,'' ಎಂದು ಮುಖ್ಯ ಆಯುಕ್ತರನ್ನು ಆಗ್ರಹಿಸಿದ್ದಾರೆ.

''ಜೀವನೋಪಾಯಕ್ಕಾಗಿ ಇಳಿ ವಯಸ್ಸಿನಲ್ಲೂ ಬ್ಯಾಗ್‌ಗಳನ್ನು ಮಾರಾಟ ಮಾಡುತ್ತಿದ್ದ ವಯೋವೃದ್ಧರೊಂದಿಗೆ ಮಾನವೀಯತೆ ಮರೆತು, ದೌರ್ಜನ್ಯವೆಸಗಿದ ಮಾರ್ಷಲ್‌ಗಳ ಅಗತ್ಯ ಪಾಲಿಕೆಗೆ ಇದೆಯೇ? ವ್ಯಾಪಾರಿಯು ಕಣ್ಣೀರು ಹಾಕಿದರೂ ಬ್ಯಾಗ್‌ಗಳನ್ನು ಕಿತ್ತುಕೊಂಡು ದರ್ಪ ಪ್ರದರ್ಶಿಸಿದ ಮಾರ್ಷಲ್‌ಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು,'' ಎಂದು ಬಿಜೆಪಿಯ ಬೆಂಗಳೂರು ದಕ್ಷಿಣ ಜಿಲ್ಲಾಘಟಕದ ಮಾಜಿ ಅಧ್ಯಕ್ಷ ಎನ್‌.ಆರ್‌.ರಮೇಶ್‌ ಒತ್ತಾಯಿಸಿದ್ದಾರೆ.