ಬನ್ನೇರುಘಟ್ಟ: ಬಿಎಂಟಿಸಿ ಡಿಪೋ ಮುಂದೆ ಪಾಲಿಕೆ ಅಧಿಕಾರಿಗಳ ಧರಣಿ

ಬನ್ನೇರುಘಟ್ಟ: 12 ಲಕ್ಷ ರೂ. ತೆರಿಗೆ ಬಾಕಿ ಇರಿಸಿಕೊಂಡಿರುವ ಹಿನ್ನೆಲೆಯಲ್ಲಿ ಬಿಎಂಟಿಸಿ ಡಿಪೋ-34ರ ಎದುರು ಪಾಲಿಕೆ ಅಧಿಕಾರಿಗಳು ನಾಮ ಫಲಕಗಳನ್ನು ಹಿಡಿದು ಧರಣಿ ನಡೆಸಿದರು.

ಗೊಟ್ಟಿಗೆರೆ ವಾರ್ಡ್‌ನ ಬಿ.ಕೆ ಸರ್ಕಲ್‌ ಬಳಿ ಇರುವ ಬಿಎಂಟಿಸಿ ಡಿಪೋ ಜಾಗಕ್ಕೆ ಸಂಬಂಧಿಸಿದಂತೆ 4 ವರ್ಷಗಳಿಂದ ತೆರಿಗೆ ಕಟ್ಟಿಲ್ಲ. ಇದರಿಂದಾಗಿ ತೆರಿಗೆ ಬಾಕಿ 12 ಲಕ್ಷ ರೂ. ಗೆ ಬೆಳೆದಿದೆ. ಈ ಹಿನ್ನೆಲೆಯಲ್ಲಿಅಧಿಕಾರಿಗಳು ಡಿಪೋ ಗೇಟ್‌ ಬಳಿ 'ತೆರಿಗೆ ಕಟ್ಟಿ ನಗರಾಭಿವೃದ್ಧಿಗೆ ಸಹಕರಿಸಿ', 'ಕಡ್ಡಾಯವಾಗಿ ತೆರಿಗೆ ಪಾವತಿಸಿ' ಎಂದು ನಾಮ ಫಲಕಗಳನ್ನು ಹಿಡಿದು ಶಾಂತಿಯುತ ಪ್ರತಿಭಟನೆ ನಡೆಸಿದರು ಹಾಗೂ ಗೋಡೆ ಮೇಲೆ ನೋಟಿಸ್‌ ಅಂಟಿಸಿದರು.

ಈ ಬಗ್ಗೆ ಪ್ರತಿಕ್ರಿಯಿಸಿದ ಬಿಬಿಎಂಪಿ ಅಂಜನಾಪುರ ಉಪವಿಭಾಗ ಸಹಾಯಕ ಕಂದಾಯ ಅಧಿಕಾರಿ ರಮೇಶ್‌, ''ತೆರಿಗೆ ಪಾವತಿಸಿ ಎಂದು ಶಾಂತಿಯುತ ಧರಣಿ ಮಾಡುತ್ತಿದ್ದೇವೆ. ಬಿಎಂಟಿಸಿಯು ಪಾಲಿಕೆಗೆ ಒಟ್ಟು 34 ಕೋಟಿ ರೂ. ತೆರಿಗೆ ಹಣ ಬಾಕಿ ಉಳಿಸಿಕೊಂಡಿದೆ,'' ಎಂದು ತಿಳಿಸಿದರು.

ಬಿಎಂಟಿಸಿ ಡಿಪೋ 34ರ ವ್ಯವಸ್ಥಾಪಕ ರಾಘವೇಂದ್ರ ಮಾತನಾಡಿ, ''ತೆರಿಗೆ ಕಟ್ಟಿ ಎಂದು ಬಿಬಿಎಂಪಿಯವರು ಧರಣಿ ಕೂತಿದ್ದರು. ನಾವು ಮೇಲಧಿಕಾರಿಗಳ ಗಮನಕ್ಕೆ ತಂದಿದ್ದೇವೆ. ಸೋಮವಾರ ಕಟ್ಟುವುದಾಗಿ ತಿಳಿಸಿದ್ದಾರೆ. ಅಲ್ಲಿಯ ತನಕ ಪಾಲಿಕೆಯವರು ಸಮಯ ನೀಡಿದ್ದಾರೆ,'' ಎಂದರು.