ಬಿಬಿಎಂಪಿ ಶಾಲೆಯ ವಿದ್ಯಾರ್ಥಿಗಳಿಗೆ ಡಿಜಿಟಲ್ ಟಿವಿ ಪಾಠ

(This story Originally Published in Times Of India on 9 Nov 2o18)

Vijaya Karnataka Web

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯ ಶಾಲೆ ಮತ್ತು ಕಾಲೇಜಿನ ವಿದ್ಯಾರ್ಥಿಗಳಿಗೆ ಶೀಘ್ರದಲ್ಲೇ ಡಿಜಿಟಲ್ ಟಿವಿ ಚಾನೆಲ್ ಮೂಲಕ ಪಾಠ-ಪ್ರವಚನ ನಡೆಸಲು ನೂತನ ಚಾನೆಲ್ ಒಂದನ್ನು ಸಿದ್ದಪಡಿಸಲಾಗುತ್ತಿದೆ. ವಿದ್ಯಾರ್ಥಿಗಳು ಸ್ಮಾರ್ಟ್‌ಫೋನ್, ಲ್ಯಾಪ್‌ಟಾಪ್, ಕಂಪ್ಯೂಟರ್ ಮತ್ತು ಟ್ಯಾಬ್ಲೆಟ್ ಮೂಲಕ ಡಿಜಿಟಲ್ ಟಿವಿ ಚಾನೆಲ್ ವೀಕ್ಷಿಸಬಹುದಾಗಿದೆ.

ಮೈಕ್ರೋಸಾಫ್ಟ್, ಟೆಕ್ ಅವಂತ್-ಗಾರ್ಡೆ ಮತ್ತು ದೂರದರ್ಶನ ಜಂಟಿಯಾಗಿ ಬಿಬಿಎಂಪಿ ಜತೆ ರೋಶನಿ ಎಂಬ ಯೋಜನೆ ಸಿದ್ದಪಡಿಸಿದ್ದಿ, ಅದರ ಮೂಲಕ ವಿಶೇಷ ಶೈಕ್ಷಣಿಕ ಚಾನೆಲ್ ಹೊರತರಲಾಗುತ್ತದೆ. ನ. 14ರಂದು ಸಿಎಂ ಕುಮಾರಸ್ವಾಮಿ ಈ ಚಾನೆಲ್‌ಗೆ ಚಾಲನೆ ನೀಡಲಿದ್ದಾರೆ. ಇಂಗ್ಲಿಷ್, ವಿಜ್ಞಾನ ಮತ್ತು ಗಣಿತ ಪಾಠಗಳನ್ನು ಮೊದಲಿಗೆ ಚಾನೆಲ್ ಮೂಲಕ ಕಲಿಸಲಾಗುತ್ತದೆ.

ಈಗಾಗಲೇ ಹಲವು ಖಾಸಗಿ ಶಾಲೆಗಳಲ್ಲಿ ಈ ಮಾದರಿಯ ವ್ಯವಸ್ಥೆಯಿದೆ. ಆದರೆ ಸರಕಾರಿ ಶಾಲೆಗಳಲ್ಲಿ ಇಂತಹ ವ್ಯವಸ್ಥೆಯಿಲ್ಲ. ಹೀಗಾಗಿ ನೂತನ ವ್ಯವಸ್ಥೆ ಬಿಬಿಎಂಪಿ ಶಾಲೆಗಳ ವಿದ್ಯಾರ್ಥಿಗಳಿಗೆ ಅನುಕೂಲವಾಗಲಿದೆ.

ದೂರದರ್ಶನ ಈ ಚಾನೆಲ್‌ಗಾಗಿ ಡಿಜಿಟಲ್ ವ್ಯವಸ್ಥೆ ರೂಪಿಸಿದ್ದು, ನಗರದ 50ರಿಂದ 70 ಕಿಮೀ ವ್ಯಾಪ್ತಿಗೆ ಚಾನೆಲ್ ಲಭ್ಯವಾಗುತ್ತದೆ.

ನ. 9ರಿಂದ ಚಾನೆಲ್ ಪ್ರಾಯೋಗಿಕವಾಗಿ ಬಳಕೆಗೆ ಲಭ್ಯವಾಗಲಿದೆ. ಯೋಜನೆಯಡಿ ಬಿಬಿಎಂಪಿ ವ್ಯಾಪ್ತಿಯ 156 ಶಾಲೆ ಮತ್ತು ಕಾಲೇಜುಗಳ ವಿದ್ಯಾರ್ಥಿಗಳಿಗೆ ಮತ್ತು ಶಿಕ್ಷಕರಿಗೆ ಮೈಕ್ರೋಸಾಫ್ಟ್ ಉಚಿತ ಟ್ಯಾಬ್ಲೆಟ್ ವಿತರಿಸಲಿದೆ.

ಪ್ರತಿ ಪಠ್ಯದ ಬಗ್ಗೆ ನುರಿತ ಶಿಕ್ಷಕರು ಪಾಠ ಮತ್ತು ತರಗತಿ ನಡೆಸಲಿದ್ದು, ಅದನ್ನು ಟಿವಿಯಲ್ಲಿ ಪ್ರಸಾರ ಮಾಡಲಾಗುತ್ತದೆ. ಟಿವಿಯಲ್ಲಿ ಪ್ರಸಾರವಾದ ಬಳಿಕ ಅವುಗಳನ್ನು ಯೂಟ್ಯೂಬ್‌ಗೆ ಹಾಕಲಾಗುತ್ತದೆ. ಯೋಜನೆಗಾಗಿ ಮೈಕ್ರೋಸಾಫ್ಟ್ 45 ಕೋಟಿ ರೂ. ಮೌಲ್ಯದ ಸಾಫ್ಟ್‌ವೇರ್ ಮತ್ತು ಟ್ಯಾಬ್ಲೆಟ್‌ ಉಚಿತವಾಗಿ ವಿತರಿಸಿದೆ.