ನೌಕರಿಗಾಗಿ 2 ಕೋಟಿ ಕಳೆದುಕೊಂಡಿದ್ದಾರೆ ಬೆಂಗಳೂರಿಗರು

ಬೆಂಗಳೂರು: ದೊಡ್ಡ ಸಂಬಳದ ನೌಕರಿ ಕೊಡಿಸುವುದಾಗಿ ಅಂತರ್ಜಾಲದಲ್ಲಿ ಹಾಕಿರುವ ಪೋಸ್ಟ್‌ಗಳಿಗೆ ಮಾರಿಹೋಗಿ ಹಣ ಕಳೆದುಕೊಂಡಿರುವವರಲ್ಲಿ ಬೆಂಗಳೂರಿಗರೇ ಮೊದಲಿಗರು.

ವಿಪ್ರೋ, ಐಬಿಎಮ್‌, ಇನ್ಫೋಸಿಸ್‌ ಸೇರಿದಂತೆ ಹಲವಾರು ಪ್ರತಿಷ್ಠಿತ ಕಂಪನಿಗಳಲ್ಲಿ ಕೆಲಸ ಕೊಡಿಸುವ ಆಮಿಷಕ್ಕೆ ಮರಳಾಗುವ ಪ್ರಕರಣಗಳು ಬೆಂಗಳೂರಲ್ಲೇ ಹೆಚ್ಚು. ಜೂನ್‌ ತಿಂಗಳಲ್ಲೇ ಆರು ವಂಚನೆ ಪ್ರಕರಣಗಳು ಸೈಬರ್‌ ಕ್ರೈಂ ಪೊಲೀಸರಲ್ಲಿ ದಾಖಲಾಗಿವೆ.

ಮಾಹಿತಿಗಳ ಪ್ರಕಾರ ಮಾರ್ಚ್‌ 25ರಿಂದ ಈವರೆಗೆ ಒಟ್ಟಾರೆ 25 ವಂಚನೆ ಪ್ರಕರಣ ದಾಖಲಾಗಿದ್ದು, ಇವುಗಳಲ್ಲಿ ಯುವಕನೊಬ್ಬನಿಗೆ ಅಮೆರಿಕದ ಟೆಸ್ಲಾ ಕಂಪನಿಯಲ್ಲಿ ಕೆಲಸ ನೀಡುವುದಾಗಿ ಹೇಳಿ 24 ಲಕ್ಷ ಹಣ ದೋಚಿದ ಪ್ರಕರಣ ಈವರೆಗಿನ ಅತಿ ದೊಡ್ಡ ವಂಚನೆ ಪ್ರಕಣಗಳಲ್ಲಿ ಒಂದಾಗಿದೆ.

ಕೆಲಸ ಕೊಡಿಸುವುದಾಗಿ ಆನ್‌ಲೈನ್‌ನಲ್ಲಿ ನಂಬಿಸುವ ನಕಲಿ ಕಂಪನಿಗಳು, ಉದ್ಯೋಗಾಕಾಂಕ್ಷಿಗಳಿಂದ ಹಣ ವಸೂಲಿ ಮಾಡುತ್ತಾರೆ. ಇನ್ನೂ ಕೆಲವರು ತಾವೇ ಕಂಪನಿ ಮಾನವಸಂಪನ್ಮೂಲ ಅಧಿಕಾರಿಗಳೆಂದು ಹೇಳಿಕೊಂಡು, ದೂರವಾಣಿಯಲ್ಲೇ ಸಂದರ್ಶನ ನಡೆಸಿ ನೋಂದಣಿ ಶುಲ್ಕ ವಸೂಲಿ ಮಾಡಿ ಮೋಸ ಮಾಡುತ್ತಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಜಾಬ್‌ ಕನ್ಸಲ್ಟೆನ್ಸಿ ಹೆಸರಿನಡಿ ಮೋಸ ಮಾಡುವ ಕುರಿತು ಕಳೆದ ಹಲವಾರು ದಿನಗಳಿಂದ ವರದಿಗಳು ಬರುತ್ತಲೇ ಇವೆ.