'ನಮ್ಮ ಮೆಟ್ರೋ' ಅವಧಿ ವಿಸ್ತರಣೆ: ಜ.1ರಿಂದ ರಾತ್ರಿ 12 ರವರೆಗೂ ರೈಲುಸೇವೆ ಲಭ್ಯ

ಬೆಂಗಳೂರು: ನಗರದ ಮೆಟ್ರೋ ರೈಲು ಪ್ರಯಾಣಿಕರ ಬಹುದಿನಗಳ ಬೇಡಿಕೆಯನ್ನು 'ಬೆಂಗಳೂರು ಮೆಟ್ರೋ ರೈಲ್‌ ಕಾರ್ಪೋರೇಷನ್‌ ಲಿ.' (ಬಿಎಂಆರ್‌ಸಿಎಲ್) ಈಡೇರಿಸಿದೆ. ಮೆಟ್ರೋ ರೈಲು ಸೇವೆಯನ್ನು ಮಧ್ಯರಾತ್ರಿವರೆಗೂ (ರಾತ್ರಿ 12 ಗಂಟೆ) ವಿಸ್ತರಿಸಲಾಗುವುದು. ಪ್ರಯಾಣಿಕರ ಬಹುದಿನಗಳ ಬೇಡಿಕೆಯನ್ನು ಆಧರಿಸಿ ಮೆಟ್ರೋ ಸಾರಿಗೆ ಸೇವೆಯನ್ನು ವಿಸ್ತರಿಸಲಾಗಿದೆ ಎಂದು ಬಿಎಂಆರ್‌ಸಿಎಲ್‌ ವ್ಯವಸ್ಥಾಪಕ ನಿರ್ದೇಶಕ ಅಜಯ್‌ ಸೇಠ್‌ ತಿಳಿಸಿದ್ದಾರೆ. ಪ್ರಸ್ತುತ ರಾತ್ರಿ 11 ಗಂಟೆವರೆಗೆ ಮಾತ್ರ ಮೆಟ್ರೋ ಸಾರಿಗೆ ಸೇವೆ ಲಭ್ಯವಿದೆ.

ಬೆಂಗಳೂರಿನ ಕೇಂದ್ರ ಭಾಗವಾದ 'ನಾಡಪ್ರಭು ಕೆಂಪೇಗೌಡ ನಿಲ್ದಾಣದಿಂದ ಎಲ್ಲ ನಾಲ್ಕು ದಿಕ್ಕುಗಳಿಗೂ(ಯಲಚೇನಹಳ್ಳಿ, ನಾಗಸಂದ್ರ, ಬಯ್ಯಪ್ಪನಹಳ್ಳಿ, ಮೈಸೂರು ರಸ್ತೆ) ರಾತ್ರಿ 12 ಗಂಟೆಗೆ ಆ ದಿನದ ಕೊನೇ ಮೆಟ್ರೋ ರೈಲಿಉ ಹೊರಡಲಿದೆ. ಜನವರಿ 1 ರಿಂದಲೇ ಪರಿಷ್ಕೃತ ವೇಳೆ ಜಾರಿಯಾಗಲಿದೆ ಎಂದು ಹೇಳಿದರು.

ಪ್ರಸ್ತುತ ಬೆಳಗ್ಗೆ 5 ಗಂಟೆ ದಿನದ ಮೊದಲ ಮೆಟ್ರೋ ರೈಲು ಆರಂಭವಾಗುತ್ತದೆ. ಬೆಳಗ್ಗೆ 5ರಿಂದ 8 ಗಂಟೆವರೆಗೆ ಹಾಗೂ ರಾತ್ರಿ 9ರಿಂದ 12 ಗಂಟೆವರೆಗೂ ಪ್ರತಿ 15 ನಿಮಿಷಕ್ಕೆ ಒಂದರಂತೆ ಮೆಟ್ರೋ ರೈಲುಗಳಿವೆ. ಉಳಿದ ಅವಧಿಯಲ್ಲಿ ಪ್ರತಿ 10 ನಿಮಿಷಕ್ಕೆ ಒಂದರಂತೆ ಮೆಟ್ರೋ ರೈಲುಗಳಿವೆ. 2020ರ ಡಿಸೆಂಬರ್‌ನಿಂದ ಗ್ರೀನ್‌ಲೈನ್‌ ಮಾರ್ಗದಲ್ಲೂ 6 ಕೋಚ್‌ ಟ್ರೈನುಗಳ ಸಂಖ್ಯೆ ಹೆಚ್ಚಿಸಲಾಗುವುದು ಎಂದು ಬಿಎಂಆರ್‌ಸಿಎಲ್‌ ಅಧಿಕಾರಿಗಳು ತಿಳಿಸಿದ್ದಾರೆ.