ಸದ್ಯ ಪೀಕ್ ಅವರ್ನಲ್ಲಿ 4 ನಿಮಿಷಕ್ಕೆ 1 ರೈಲು..
ಸದ್ಯ ಈಗಿರುವ ಮಾರ್ಗಗಳಲ್ಲಿ ಪೀಕ್ ಅವರ್ಗಳಲ್ಲಿ ಪ್ರತಿ ನಾಲ್ಕು ನಿಮಿಷಕ್ಕೆ ಒಂದು ರೈಲು ಮತ್ತು ಸಾಮಾನ್ಯ ಸಮಯಗಳಲ್ಲಿ ಪ್ರತಿ ಹತ್ತು ನಿಮಿಷಕ್ಕೆ ಒಂದು ರೈಲು ಸಂಚರಿಸುತ್ತಿವೆ. ಪ್ರಸ್ತುತ ಡಿಸ್ಟೆನ್ಸ್ ಟೂ ಗೋ(ಡಿಟಿಜಿ) ಸಿಗ್ನಲಿಂಗ್ ವ್ಯವಸ್ಥೆಯನ್ನು ಬಳಸಲಾಗುತ್ತಿದ್ದು, ಇದರಲ್ಲಿ ಎರಡು ರೈಲುಗಳ ನಡುವಿನ ಕನಿಷ್ಠ ಸಮಯ ಎರಡೂವರೆ ನಿಮಿಷಗಳು ಇದೆ.
ಹೊಸ ಮಾರ್ಗದಲ್ಲಿ ಆರಂಭದಿಂದಲೇ 2 ನಿಮಿಷಕ್ಕೆ 1 ರೈಲು
‘ಆರಂಭದಿಂದಲೇ ಎಲೆಕ್ಟ್ರಾನಿಕ್ ಸಿಟಿ, ಐಐಎಂಬಿ ಮತ್ತು ಹೊರ ವರ್ತುಲ ರಸ್ತೆ-ವಿಮಾನ ನಿಲ್ದಾಣ ಮಾರ್ಗದಲ್ಲಿ ಸಿಬಿಟಿಸಿ ವ್ಯವಸ್ಥೆಯನ್ನು ಅನುಷ್ಠಾನಗೊಳಿಸಲಾಗುತ್ತಿದೆ. ಪ್ರಸ್ತುತ ಇರುವ ಸಿಗ್ನಲಿಂಗ್ ವ್ಯವಸ್ಥೆಯಲ್ಲಿ ಪ್ರತಿ ಮೂರು ನಿಮಿಷಕ್ಕೆ ರೈಲು ಸಂಚಾರ ಸಾಧ್ಯವಿದೆ. ಸಿಬಿಟಿಸಿ ವ್ಯವಸ್ಥೆಯಿಂದ ಪ್ರತಿ ಎರಡು ನಿಮಿಷಕ್ಕೆ ರೈಲು ಸಂಚರಿಸಲಿವೆ. ಆದರೆ ಇದನ್ನು ಒಂದೂವರೆ ನಿಮಿಷಕ್ಕೆ ಇಳಿಸಬೇಕಾದರೆ ಇತರ ಸುಧಾರಣೆಗಳನ್ನು ತರಬೇಕಿದೆ. ಎರಡು ರೈಲುಗಳ ನಡುವಿನ ಸಂಚಾರ ಸಮಯವು ಕೇವಲ ಸಿಗ್ನಲಿಂಗ್ ವ್ಯವಸ್ಥೆ ಮೇಲೆ ಮಾತ್ರ ಅವಲಂಬಿತವಾಗಿರುವುದಿಲ್ಲ. ನಿರ್ಮಾಣ ವಿನ್ಯಾಸ, ಸುರಂಗ ಮಾರ್ಗದ ಉದ್ದ ಮತ್ತು ಇತರ ವಿಷಯಗಳ ಮೇಲೂ ಕೂಡ ಇದು ಅವಲಂಬಿತವಾಗಿರುತ್ತದೆ’ ಎಂದು ಬಿಎಂಆರ್ಸಿಎಲ್ ವ್ಯವಸ್ಥಾಪಕ ನಿರ್ದೇಶಕ ಅಜಯ್ ಸೇಠ್ ತಿಳಿಸಿದರು.
ನೇರಳೆ, ಹಸಿರು ಮಾರ್ಗಗಳ ನವೀಕರಣಕ್ಕೂ ಪ್ಲಾನ್
‘ಈಗಿರುವ ನೇರಳೆ ಮತ್ತು ಹಸಿರು ಮಾರ್ಗಗಳ ಸಿಗ್ನಲಿಂಗ್ ವ್ಯವಸ್ಥೆಯನ್ನು ನವೀಕರಿಸಲು ಬಿಎಂಆರ್ಸಿಎಲ್ ಯೋಜಿಸುತ್ತಿದೆ. ಮುಂದಿನ 10 ವರ್ಷಗಳ ನಂತರ ಈಗಿರುವ ಮಾರ್ಗಗಳನ್ನು ನವೀಕರಿಸಲಾಗುತ್ತದೆ. ಒಂದು ಮಾರ್ಗದಲ್ಲಿ ಪ್ರತಿ ಗಂಟೆಗೆ ಸರಾಸರಿ 40,000 ಪ್ರಯಾಣಿಕರು ಪ್ರಯಾಣಿಸಿದರೆ, ಅಷ್ಟು ದಟ್ಟಣೆ ಉಂಟಾದಾಗ ಈಗಿರುವ ವ್ಯವಸ್ಥೆಯನ್ನು ನವೀಕರಿಸಲಾಗುತ್ತದೆ. ಸದ್ಯ ಒಂದು ಮಾರ್ಗದಲ್ಲಿ ಪ್ರತಿ ಗಂಟೆಗೆ ಸರಾಸರಿ 22,500 ಪ್ರಯಾಣಿಕರು ಸಂಚರಿಸುತ್ತಿದ್ದಾರೆ’ ಎಂದು ಸೇಠ್ ಹೇಳಿದರು.
ಪ್ಲಾಟ್ಫಾರ್ಮ್ ಉದ್ದವೂ ನವೀಕರಣವಾಗಲಿದೆ
ಅವಶ್ಯಕತೆಯ ಅನುಸಾರ ರೈಲುಗಳ ಸಂಚಾರ ಅವಲಂಬಿತವಾಗಿರುತ್ತದೆ. ಆರು ಕೋಚ್ ರೈಲುಗಳಿಗೆ ಮಾತ್ರ ಅನುಕೂಲವಾಗುವಂತೆ 2ನೇ ಹಂತದ ಪ್ಲಾಟ್ಫಾರ್ಮ್ ಉದ್ದವನ್ನು ವಿನ್ಯಾಸಗೊಳಿಸಲಾಗುವುದು. ಪ್ಲಾಟ್ಫಾರ್ಮ್ ಮತ್ತು ಸಿಸ್ಟಮ್ ರೂಮ್ಗಳ ಗರಿಷ್ಠ ಉದ್ದ ಎತ್ತರಿಸಿದ ನಿಲ್ದಾಣಗಳಲ್ಲಿ 150 ಮೀಟರ್ ಮತ್ತು ಸುರಂಗ ಮಾರ್ಗದ ನಿಲ್ದಾಣಗಳಲ್ಲಿ 192 ಮೀಟರ್ ಇರುತ್ತವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
2021ಕ್ಕೆ ಸಿಬಿಟಿಸಿ ವ್ಯವಸ್ಥೆ
ಈಗಾಗಲೇ ಸಿಬಿಟಿಸಿ ವ್ಯವಸ್ಥೆಯನ್ನು ಕೊಚ್ಚಿ ಮತ್ತು ನಾಗಪುರದಲ್ಲಿ ಅನುಷ್ಠಾನಗಳಿಸಲಾಗಿದೆ. 2021ರ ನವೆಂಬರ್ ವೇಳೆಗೆ ಆರ್ವಿ ರಸ್ತೆ-ಬೊಮ್ಮಸಂದ್ರ (ಎಲೆಕ್ಟ್ರಾನಿಕ್ ಸಿಟಿ) ಮಾರ್ಗ ಹಾಗೂ 2024ರ ವೇಳೆಗೆ ಗೊಟ್ಟಿಗೆರೆ-ನಾಗಾವರ(ಐಐಎಂಬಿ) ಮತ್ತು ಸಿಲ್ಕ್ ಬೋರ್ಡ್-ಕೆ.ಆರ್.ಪುರ-ಕೆಐಎ (ಹೊರ ವರ್ತುಲ ರಸ್ತೆ-ವಿಮಾನ ನಿಲ್ದಾಣ) ಮಾರ್ಗವು ಸಂಚಾರಕ್ಕೆ ಮುಕ್ತವಾಗಲಿದೆ.
ಸದ್ಯಕ್ಕಿಲ್ಲ ಚಾಲಕ ರಹಿತ ರೈಲು ಸಂಚಾರ
‘ಸಿಬಿಟಿಸಿ ವ್ಯವಸ್ಥೆಯಿಂದ ಚಾಲಕ ರಹಿತ ರೈಲು ಸಂಚಾರ ಸಾಧ್ಯವಿದೆ. ಆದರೆ ಚಾಲಕ ರಹಿತ ರೈಲುಗಳಲ್ಲಿ ಪ್ರಯಾಣಿಸಲು ಜನರು ಸಿದ್ಧರಿಲ್ಲ. ನಾವು ಈ ಕುರಿತು ಪ್ರಯಾಣಿಕರಲ್ಲಿ ವಿಶ್ವಾಸ ಮೂಡಿಸಬೇಕಿದೆ. ರೈಲು ಹಳಿ ಮತ್ತು ಇತರ ಕಡೆಗಳಲ್ಲಿ ಅಳವಡಿಸಿರುವ ಸೆನ್ಸಾರ್ಗಳ ಸಹಾಯದಿಂದ ರೈಲುಗಳ ನಡುವೆ ಸುರಕ್ಷಿತ ಅಂತರವನ್ನು ಕಾಯ್ದುಕೊಳ್ಳಲು ಸಿಬಿಟಿಸಿ ವ್ಯವಸ್ಥೆ ನೆರವಾಗುತ್ತದೆ’ ಎಂದು ಬಿಎಂಆರ್ಸಿಎಲ್ ಅಧಿಕಾರಿಯೊಬ್ಬರು ತಿಳಿಸಿದರು.