ಬಿಎಂಟಿಸಿ ಬಳಸೋಕೆ ಸಿದ್ಧ..! ಆದ್ರೆ.. ಮೊದಲು ದರ ಕಡಿಮೆ ಮಾಡಿ..!

ಬಸ್ ಪ್ರಯಾಣಿಕರವೇದಿಕೆಯ ಸದಸ್ಯರು ಬಸ್‌ ನಿಲ್ದಾಣ, ಕಾರ್ಮಿಕರ ಕೆಲಸದ ಸ್ಥಳ ಮತ್ತು ಮನೆಗಳ ಬಳಿ ನಡೆಸಿದ ಸಮೀಕ್ಷೆಯಲ್ಲಿ 95 ಮಂದಿ ಪ್ರತಿಕ್ರಿಯಿಸಿದ್ದಾರೆ. ಇದರಲ್ಲಿ ಶೇ.56ರಷ್ಟು ಮಂದಿ ಪ್ರಯಾಣಕ್ಕೆ ಬಸ್‌ ಬಳಸುವವರು ಮತ್ತು ಶೇ.44ರಷ್ಟು ಮಂದಿ ದ್ವಿಚಕ್ರ ವಾಹನ, ಆಟೋ, ಮೆಟ್ರೊದಲ್ಲಿ ಸಂಚರಿಸುತ್ತಿದ್ದಾರೆ. ಪ್ರಯಾಣ ದರ ಕಡಿಮೆ ಮಾಡಿದರೆ, ಪ್ರಯಾಣಕ್ಕೆ ಬಸ್‌ಗಳನ್ನೇ ಅವಲಂಬಿಸುವುದಾಗಿ ಶೇ.41ರಷ್ಟು ಮಂದಿ ಹೇಳಿದ್ದಾರೆ.

ಬಿಎಂಟಿಸಿ ಬಸ್‌ಗಳಲ್ಲಿ ಸಂಚರಿಸುವವರು ತಮ್ಮ ಮಾಸಿಕ ಆದಾಯದಲ್ಲಿ ಶೇ.21ರಷ್ಟನ್ನು ಪ್ರಯಾಣಕ್ಕಾಗಿ ಖರ್ಚು ಮಾಡುತ್ತಿದ್ದಾರೆ. ಇತರೆ ವಾಹನ ಬಳಸುವವರು ಕೇವಲ ಶೇ.9.5ರಷ್ಟನ್ನು ಮಾತ್ರ ವೆಚ್ಚ ಮಾಡುತ್ತಿದ್ದಾರೆ. ಅಧಿಕ ಪ್ರಯಾಣ ದರ, ಬಸ್‌ಗಳ ಕೊರತೆ, ಸಕಾಲಕ್ಕೆ ಸಿಗದ ಬಸ್‌ ಸೇವೆ ಮತ್ತು ಸಂಚಾರ ದಟ್ಟಣೆಯಿಂದ ಗಮ್ಯ ಸ್ಥಳ ತಲುಪುವುದು ತಡವಾಗುತ್ತಿದೆ ಎಂಬುದರ ಕುರಿತು ಹಲವರು ಬೆಳಕು ಚೆಲ್ಲಿದ್ದಾರೆ.

ಶೇ.17.3ರಷ್ಟು ಮಂದಿ ಬಸ್‌ ಪ್ರಯಾಣದಿಂದ ತುಂಬಾ ಅನುಕೂಲವಿದೆ ಎಂದಿದ್ದಾರೆ. ಸುರಕ್ಷತೆ ಮತ್ತು ದೂರದ ಪ್ರಯಾಣಕ್ಕೆ ಬಸ್‌ಗಳೇ ಸೂಕ್ತ ಎಂದು ಶೇ.5.8ರಷ್ಟು ಮಂದಿ ತಮ್ಮ ಅಭಿಪ್ರಾಯ ತಿಳಿಸಿದ್ದಾರೆ. ಬಸ್‌ ಪ್ರಯಾಣ ದರವು ದ್ವಿಚಕ್ರ ವಾಹನದಲ್ಲಿ ಸಂಚಾರಕ್ಕೆ ತಗಲುವ ವೆಚ್ಚಕ್ಕಿಂತ ಜಾಸ್ತಿ ಇದೆ. ಹೀಗಾಗಿ, ಬಹುತೇಕರು ಪ್ರಯಾಣಕ್ಕೆ ದ್ವಿಚಕ್ರ ವಾಹನಗಳನ್ನೇ ಅವಲಂಬಿಸುತ್ತಿದ್ದಾರೆ ಎಂಬುದು ಸಮೀಕ್ಷೆಯಿಂದ ತಿಳಿದುಬಂದಿದೆ.

‘ಬಸ್‌ ಪ್ರಯಾಣ ದರ ಇಳಿಕೆ ಮಾಡಿದರೆ, ದ್ವಿಚಕ್ರ ವಾಹನ ಬಳಸುವವರ ಸಂಖ್ಯೆ ಕಡಿಮೆಯಾಗಲಿದೆ. ಬಹುತೇಕರು ಪ್ರಯಾಣಕ್ಕೆ ಬಸ್‌ಗಳನ್ನೇ ಅವಲಂಬಿಸಲಿದ್ದಾರೆ. ಹಾಗೆಯೇ, ಈ ವರ್ಷ ಹೆಚ್ಚುವರಿಯಾಗಿ 3 ಸಾವಿರ ಬಸ್‌ಗಳ ಖರೀದಿಗೆ ಸರಕಾರ ಆರ್ಥಿಕ ನೆರವು ನೀಡಬೇಕು. ಪ್ರಯಾಣ ದರ ಕಡಿಮೆ ಮಾಡಲು ಸಂಸ್ಥೆಯಲ್ಲಿ ಶುಲ್ಕ ಸ್ಥಿರೀಕರಣ ನಿಧಿಯನ್ನು ಸ್ಥಾಪಿಸಬೇಕು. ವಾಹನ ದಟ್ಟಣೆ ಜಾಸ್ತಿ ಇರುವ ರಸ್ತೆಗಳಲ್ಲಿ ಬಸ್‌ ಆದ್ಯತಾ ಪಥಗಳನ್ನು ನಿರ್ಮಿಸಬೇಕು’ ಎಂದು ವೇದಿಕೆಯ ಸದಸ್ಯ ವಿನಯ್‌ ಶ್ರೀನಿವಾಸ್‌ ಒತ್ತಾಯಿಸಿದ್ದಾರೆ.