ಸಿಗ್ನಲ್ ಜಂಪಾದ್ರೆ ಕ್ಯಾಮೆರಾದಲ್ಲಿ ಸೆರೆಯಾಗ್ತೀರಿ ಜೋಕೆ! ಉಲ್ಲಂಘನೆ ಸಾಕ್ಷಿ ಕೇಳಿದಾತನಿಗೆ ಫೋಟೊ ಕಳುಹಿಸಿದ ಪೊಲೀಸ್ರು!

ಸ್ಕೂಟರ್‌ ಸವಾರ ಅಭಿಷೇಕ್‌ ವಿರುದ್ಧ ಸಂಚಾರ ನಿಯಮ ಉಲ್ಲಂಘನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಎರಡು ಕೇಸ್‌ ದಾಖಲಾಗಿತ್ತು. ಅವುಗಳನ್ನು ಹೇಗೆ ಚೆಕ್‌ ಮಾಡಬೇಕು, ಸಾಕ್ಷಿ ತೋರಿಸಿ ಟ್ವಿಟ್ಟರ್‌ನಲ್ಲಿ ಕೇಳಿದ್ದರು. ಆಗ, ವಾಹನದ ನೋಂದಣಿ ಸಂಖ್ಯೆ ಒದಗಿಸುವಂತೆ ಸಂಚಾರ ಪೊಲೀಸರು ಕೇಳಿದ್ದರು. ನೋಂದಣಿ ಸಂಖ್ಯೆ ನೀಡಿದ ನಂತರ ಫೋಟೋ ಸಮೇತ ಸಾಕ್ಷಿಯನ್ನು ಒದಗಿಸಿದ್ದಾರೆ. ಶಂಕರಮಠ ಸಿಗ್ನಲ್‌ನಲ್ಲಿ ಝೀಬ್ರಾ ಕ್ರಾಸಿಂಗ್‌ ಮೇಲೆ ಸ್ಕೂಟರ್‌ ನಿಂತಿರುವ ಫೋಟೋ ಹಾಕಲಾಗಿದೆ. ಅದರ ಜೊತೆಗೆ ಜೂಮ್‌ ಮಾಡಿ ಸ್ಕೂಟರ್‌ನ ನೋಂದಣಿ ಸಂಖ್ಯೆಯನ್ನು ಕೂಡ ಸ್ಪಷ್ಟವಾಗಿ ಕಾಣಿಸುವಂತೆ ಅಪ್‌ಲೋಡ್‌ ಮಾಡುವ ಮೂಲಕ ಸಾಕ್ಷಿ ಒದಗಿಸಲಾಗಿದೆ. ಜ.30ರಂದು ಬೆಳಗ್ಗೆ 10 ಗಂಟೆ 16 ನಿಮಿಷಕ್ಕೆ ಸಿಗ್ನಲ್‌ನಲ್ಲಿ ಸಂಚಾರ ನಿಯಮ ಉಲ್ಲಂಘನೆಯ ಫೋಟೋ ಸೆರೆ ಹಿಡಿಯಲಾಗಿದೆ.

ಹೆಚ್ಚಿನ ಕಡೆಗಳಲ್ಲಿ ಸಿಗ್ನಲ್‌ ಲೈಟ್‌ ಕಂಬಗಳಿಗೆ ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದು, ಝೀಬ್ರಾ ಕ್ರಾಸಿಂಗ್‌ ಮೇಲೆ ವಾಹನ ನಿಲುಗಡೆ, ಸಿಗ್ನಲ್‌ ಜಂಪ್‌, ಹೆಲ್ಮೆಟ್‌ ಧರಿಸದೆ ಇರುವುದು ಸೇರಿದಂತೆ ಸಂಚಾರ ನಿಯಮ ಉಲ್ಲಂಘನೆಯನ್ನು ಇವು ಸೆರೆ ಹಿಡಿಯುತ್ತವೆ. ಅಂತಹ ವಾಹನಗಳಿಗೆ ಸಂಚಾರ ಪೊಲೀಸ್‌ ಕೇಂದ್ರ ಕಚೇರಿಯ ಮೂಲಕ ಸ್ವಯಂಪ್ರೇರಿತವಾಗಿ ಚಲನ್‌ಗಳು ಜನರೇಟ್‌ ಆಗುತ್ತವೆ. ಉಲ್ಲಂಘನೆಯ ವಿವರ ಆನ್‌ಲೈನ್‌ನಲ್ಲಿ ಲಭ್ಯವಿದೆ. ಜೊತೆಗೆ ಕಾಗದ ರೂಪದಲ್ಲಿ ಮನೆಗೂ ನೋಟಿಸ್‌ ತಲುಪುತ್ತದೆ.

ನಗರದ ವಿವಿಧ ಜಂಕ್ಷನ್‌ಗಳು ಮತ್ತು ಸಿಗ್ನಲ್‌ಗಳಲ್ಲಿಒಟ್ಟು 1,100 ಸಿಸಿ ಕ್ಯಾಮೆರಾಗಳನ್ನು ಸಂಚಾರ ಪೊಲೀಸರು ಅಳವಡಿಸಿದ್ದಾರೆ. ಅವುಗಳಲ್ಲಿ ಜೂಮ್‌, ಟಿಲ್ಟ್‌, ಪ್ಯಾನ್‌ ಸಾಮರ್ಥ್ಯದ ಕ್ಯಾಮೆರಾಗಳು ಸೇರಿವೆ. ಅದರ ಜೊತೆಗೆ ಅಟೋಮ್ಯಾಟಿಕ್‌ ನಂಬರ್‌ ಪ್ಲೇಟ್‌ ಸಂಖ್ಯೆಯನ್ನು ಸೆರೆ ಹಿಡಿಯುವ ಕ್ಯಾಮೆರಾಗಳು ಕೂಡ ಇವೆ. ಇವು ರಾತ್ರಿ ವೇಳೆ ಬೆಳಕು ಅಸ್ಪಷ್ಟವಾಗಿರುವ ಸಂದರ್ಭದಲ್ಲೂ ನೋಂದಣಿ ಸಂಖ್ಯೆಯನ್ನು ಸೆರೆ ಹಿಡಿಯುವ ಸಾಮರ್ಥ್ಯವನ್ನು ಹೊಂದಿವೆ.