ಬೆಂಗಳೂರಿನಲ್ಲಿ ಕುಡಿದು ಡ್ರೈವ್ ಮಾಡಿದ್ರೆ ಹುಷಾರ್, ಪೊಲೀಸರ ತಪಾಸಣೆ ಒಂದೆರಡು ದಿನಗಳಲ್ಲಿ ಪುನಾರಂಭ

ಬೆಂಗಳೂರು: ಮದ್ಯಪಾನ ಮಾಡಿ ವಾಹನ ಚಲಾಯಿಸುವವರನ್ನು ತಡೆದು ತಪಾಸಣೆ ನಡೆಸುವ ಕಾರ್ಯಾಚರಣೆಯನ್ನು ನಗರ ಸಂಚಾರ ಪೊಲೀಸರು ಒಂದೆರಡು ದಿನಗಳಲ್ಲಿ ಪುನಾರಾರಂಭಿಸುತ್ತಿದ್ದಾರೆ.ಕೋವಿಡ್‌-19 ಕಾರಣ 2020ರ ಮಾರ್ಚ್‌ನಿಂದ ತಪಾಸಣೆ ಸ್ಥಗಿತಗೊಳಿಸಲಾಗಿತ್ತು. ಆದರೆ, ಇತ್ತೀಚೆಗೆ ಮದ್ಯಪಾನ ಮಾಡಿ ವಾಹನ ಚಾಲನೆ ಮಾಡುತ್ತಿರುವುದು, ಅಪಘಾತಗಳು, ಸಾವು-ನೋವು ಕಂಡು ಬರುತ್ತಿರುವ ಹಿನ್ನೆಲೆಯಲ್ಲಿ ಕೋವಿಡ್‌ ಸುರಕ್ಷತಾ ಕ್ರಮಗಳನ್ನು ಪಾಲಿಸಿಕೊಂಡು ತಪಾಸಣೆ ಆರಂಭಿಸಲಾಗುತ್ತಿದೆ ಎಂದು ಸಂಚಾರ ವಿಭಾಗದ ಜಂಟಿ ಆಯುಕ್ತ ರವಿಕಾಂತೇಗೌಡ ತಿಳಿಸಿದ್ದಾರೆ.

ಸ್ಯಾನಿಟೈಸ್‌ ಮಾಡಿರುವ ಆಲ್ಕೋಮೀಟರ್‌ಗಳನ್ನು ಪ್ರತ್ಯೇಕ ಜಿಪ್‌ಲಾಕ್‌ ಕವರ್‌ನಲ್ಲಿಟ್ಟು, ಒಬ್ಬರನ್ನು ತಪಾಸಣೆ ನಡೆಸಿದ ಬಳಿಕ ಮತ್ತೆ ಅದೇ ಕವರ್‌ನಲ್ಲಿ ಪ್ರತ್ಯೇಕವಾಗಿ ಇರಿಸಲಾಗುತ್ತದೆ.

ಕೊರೊನಾ ಎಫೆಕ್ಟ್: ಡ್ರಂಕ್‌ ಅಂಡ್‌ ಡ್ರೈವ್‌ ಪರೀಕ್ಷೆ ವೇಳೆ ಪೊಲೀಸರಿಗೆ ಪಿಪಿಇ ಕಿಟ್‌..!

ತಪಾಸಣೆ ವೇಳೆ ಒಂದು ಉಪಕರಣವನ್ನು ಒಬ್ಬರಿಗೆ ಒಂದು ಬಾರಿ ಮಾತ್ರ ಉಪಯೋಗಿಸಲಾಗುತ್ತದೆ. ತಪಾಸಣೆ ವೇಳೆ ಪ್ರತಿಯೊಬ್ಬ ಸವಾರ, ಚಾಲಕನಿಗೆ ಪ್ರತ್ಯೇಕ ಸ್ಟ್ರಾ ಬಳಸಲಾಗುತ್ತದೆ. ಸಿಬ್ಬಂದಿ ಗ್ಲೌಸ್‌, ಮಾಸ್ಕ್‌ ಮತ್ತು ಫೇಸ್‌ಶೀಲ್ಡ್‌ ಬಳಕೆ ಕಡ್ಡಾಯ. ಪ್ರತಿ ಬಾರಿ ತಪಾಸಣೆ ಬಳಿಕ ಸಿಬ್ಬಂದಿ ಹ್ಯಾಂಡ್‌ ಸ್ಯಾನಿಟೈಜ್‌ ಮಾಡುವುದು ಕಡ್ಡಾಯ. ಒಮ್ಮೆ ಬಳಸಿದ ಉಪಕರಣವನ್ನು ಸ್ಯಾನಿಟೈಸ್‌ ಮಾಡಿದ 3 ದಿನಗಳವರೆಗೆ ಬಳಕೆ ಮಾಡಬಾರದು ಎಂಬ ನಿರ್ದೇಶನ ನೀಡಲಾಗಿದೆ. ತಪಾಸಣೆ ವೇಳೆ ಚಾಲಕ, ಸವಾರರ ಮುಂದೆ ಸ್ಯಾನಿಟೈಸರ್‌ ಸ್ಪ್ರೇ ಮಾಡಿ ಶುಚಿತ್ವ ಕಾಪಾಡಿಕೊಳ್ಳಲಾಗುವುದು. ಈ ಕುರಿತು ತಿಳಿವಳಿಕೆ ನೀಡಲಾಗುತ್ತದೆ ಎಂದು ವಿವರಿಸಿದರು.

ಬೆಂಗಳೂರು: ಎರಡು ವರ್ಷದಲ್ಲಿ 5899 ಡಿಎಲ್‌ ಅಮಾನತು

ಅಪಘಾತ ನಿಯಂತ್ರಣ, ರಸ್ತೆ ಸುರಕ್ಷತೆಗಾಗಿ 'ಡ್ರಂಕ್‌ ಆ್ಯಂಡ್‌ ಡ್ರೈವ್‌' ಪತ್ತೆಗೆ ತಪಾಸಣೆ ಅನಿವಾರ್ಯ. ಸಾರ್ವಜನಿಕರು ಸಹಕರಿಸಬೇಕು.
- ರವಿಕಾಂತೇಗೌಡ, ಜಂಟಿ ಆಯುಕ್ತ, ಬೆಂಗಳೂರು ಪೊಲೀಸ್‌ ಸಂಚಾರ ವಿಭಾಗ