ದಂಡಕ್ಕೆ ಹೆದರಿ ಹೆಲ್ಮೆಟ್‌ ಧರಿಸುತ್ತಿದ್ದಾರೆ ಸವಾರರು

ಬೆಂಗಳೂರು : ಸುರಕ್ಷತೆ ದೃಷ್ಟಿಯಿಂದ ಹೆಲ್ಮೆಟ್‌ ಕಡ್ಡಾಯಗೊಳಿಸಿದ್ದರೂ ಕೆಲವರು ಅದನ್ನು ಉಲ್ಲಂಘಿಸಿ ದ್ವಿಚಕ್ರ ವಾಹನಗಳಲ್ಲಿ ಸಂಚರಿಸುತ್ತಿದ್ದರು. ಈಗ ದಂಡದ ಮೊತ್ತ ಹೆಚ್ಚಳ ಮಾಡಿದ ಬಳಿಕ ಎಲ್ಲರೂ ಹೆಲ್ಮೆಟ್‌ ಧರಿಸಿ ಬೈಕ್‌ ಸವಾರಿ ಮಾಡುತ್ತಿರುವ ಚಿತ್ರಣ ನಗರದಲ್ಲಿ ಕಂಡು ಬರುತ್ತಿದೆ.

ಕಳೆದ ನಾಲ್ಕು ದಿನಗಳಿಂದ ಬೈಕ್‌ ಸವಾರರಲ್ಲಿ ಈ ಬದಲಾವಣೆ ಕಾಣುತ್ತಿದೆ. ಬೈಕ್‌ ಸವಾರರು ಹಾಗೂ ಹಿಂಬದಿ ಸವಾರರಿಗೆ ಹೆಲ್ಮೆಟ್‌ ಕಡ್ಡಾಯಗೊಳಿಸಲಾಗಿದೆ. ಟ್ರಾಫಿಕ್‌ ಪೊಲೀಸರು ಕಾಣಿಸಿಕೊಳ್ಳುತ್ತಿಲ್ಲ ಎಂದು ಇದುವರೆಗೆ ಕೆಲವರು ಹೆಲ್ಮೆಟ್‌ ಧರಿಸದೆ ಸಂಚರಿಸುತ್ತಿದ್ದರು. ಹೆಲ್ಮೆಟ್‌ ಹಾಕುವುದರಿಂದ ತಲೆಗೂದಲು ಹಾಳಾಗುತ್ತದೆ ಎಂದು ಮತ್ತೆ ಕೆಲವರು ಹೇಳಿದರೆ ಇನ್ನೂ ಕೆಲವರು ನಾನು ಟ್ರಾಫಿಕ್‌ ಪೊಲೀಸರ ಕಣ್ತಪ್ಪಿಸಿ ಹೋಗುತ್ತೇನೆ ಎಂದು ಹೇಳಿಕೊಳ್ಳುತ್ತಿದ್ದರು. ಈಗ ನಿಯಮ ಕಠಿಣಗೊಳಿಸಿದ ಬಳಿಕ ಭಾರಿ ಮೊತ್ತದ ದಂಡಕ್ಕೆ ಹೆದರಿ ಸಂಚಾರ ನಿಯಮ ಪಾಲನೆ ಮಾಡುವವರ ಸಂಖ್ಯೆ ಶೇ.95ಕ್ಕೆ ಏರಿಕೆಯಾಗಿದೆ.

ದಂಡದ ಮೊತ್ತಕ್ಕೆ ಸವಾರರು ಹೆದರಿರುವುದು ನಮ್ಮ ಅನುಭವಕ್ಕೆ ಬರುತ್ತಿದ್ದು ಸಂಚಾರ ನಿಯಮ ಉಲ್ಲಂಘನೆಯ ಪ್ರಕರಣಗಳು ಕಡಿಮೆ ಆಗುವ ವಿಶ್ವಾಸವಿದೆ ಎಂದು ಸಂಚಾರ ವಿಭಾಗದ ಅಧಿಕಾರಿಗಳು ಹೇಳುತ್ತಿದ್ದ್ದಾರೆ. ವಾಹನದ ಬೆಲೆಗಿಂತ ಹೆಚ್ಚಿನ ಮೊತ್ತದ ದಂಡ ವಿಧಿಸಿರುವ ಪ್ರಕರಣಗಳು ಹೆಚ್ಚಾಗುತ್ತಿದ್ದಂತೆ ವಾಹನ ಸವಾರರು ಮೈಚಳಿ ಬಿಟ್ಟು ದಾಖಲೆಗಳನ್ನು ಸಂಗ್ರಹಿಸುತ್ತಿದ್ದಾರೆ.

ವಾಹನಕ್ಕೆ ಸಂಬಂಧಪಟ್ಟ ದಾಖಲೆಗಳು, ವಿಮೆ, ಆರ್‌ಸಿ ಪುಸ್ತಕ ಸೇರಿದಂತೆ ಉಳಿದೆಲ್ಲಾ ದಾಖಲೆಗಳ ಜತೆಗೆ ವಾಹನದಲ್ಲಿ ಹೆಲ್ಮೆಟ್‌ ಕೂಡ ಕಡ್ಡಾಯವಾಗಿ ಇಟ್ಟುಕೊಳ್ಳುವವರು ಮೊದಲಿಗಿಂತ ಹೆಚ್ಚಾಗಿದ್ದಾರೆ. ನಿತ್ಯ ಸಿಗ್ನಲ್‌ ಜಂಪ್‌ ಮಾಡುವವರನ್ನು ಹಾಗೂ ಹೆಲ್ಮೆಟ್‌ ಇಲ್ಲದೆ ವಾಹನ ಓಡಿಸುವವರನ್ನು ಮಾಮೂಲಾಗಿ ಕಾಣುತ್ತಿದ್ದೆವು. ಕಣ್ಣಿಗೆ ಕಂಡ ಎಲ್ಲರನ್ನೂ ತಡೆದು ಕೇಸು ದಾಖಲಿಸುವುದು ಸಾಧ್ಯ ಆಗುತ್ತಿರಲಿಲ್ಲ. ಆದರೆ ಈಗ ಹೆಲ್ಮೆಟ್‌ ಇಲ್ಲದ ವಾಹನ ಸವಾರರ ಪ್ರಮಾಣ ಕಡಿಮೆ ಆಗಿದೆ. ಕಳೆದ ಎರಡು ಮೂರು ದಿನಗಳಲ್ಲಿ ಮುಖ್ಯ ರಸ್ತೆಗಳಲ್ಲಿ ಶೇ 90 ರಷ್ಟು ಮಂದಿ ಹೆಲ್ಮೆಟ್‌ ಧರಿಸಿರುವುದು ಕಾಣುತ್ತಿದೆ. ಒಳ ರಸ್ತೆಗಳಲ್ಲಿ , ವಸತಿ ಪ್ರದೇಶಗಳ ಒಳ ರಸ್ತೆಗಳಲ್ಲಿ ಇನ್ನೂ ವಿಪರೀತದ ದಂಡವನ್ನು ಹಾಕುತ್ತಿಲ್ಲ. ಮುಂದಿನ ದಿನಗಳಲ್ಲಿ ವಸತಿ ಪ್ರದೇಶಗಲ್ಲೂ ಹೊಸ ದಂಡ ಪದ್ಧತಿಯನ್ನು ಕಟ್ಟು ನಿಟ್ಟಾಗಿ ವಿಧಿಸಲಾಗುವುದು. ಆಗ ಸಂಪೂರ್ಣವಾಗಿ ಹೆಲ್ಮೆಟ್‌ ಧರಿಸಿಯೇ ಓಡಾಡುವ ಪರಿಸ್ಥಿತಿ ಬರುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

''ಸಿಗ್ನಲ್‌ ಜಂಪ್‌ ಪ್ರಕರಣಗಳಲ್ಲೂ ಇಳಿಮುಖ ಕಾಣುತ್ತಿದೆ. ಮೊದಲೆಲ್ಲಾ ನಾವು ಸ್ವಲ್ಪ ದೂರದಲ್ಲಿ ಇದ್ದೇವೆ ಎಂದು ಗೊತ್ತಿದ್ದರೂ ನಮ್ಮ ಎದುರಿಗೇ ವಿರುದ್ಧ ದಿಕ್ಕಿನಲ್ಲಿ ಸಿಗ್ನಲ್‌ ಜಂಪ್‌ ಮಾಡಿಕೊಂಡು ಬಿಂದಾಸ್‌ ಆಗಿ ಹೋಗುತ್ತಿದ್ದರು. ಈಗ ಈ ಪ್ರಮಾಣವೂ ಕಡಿಮೆ ಆದಂತೆ ಕಾಣುತ್ತಿದೆ. ಆದರೂ ಒಂದೆರಡು ತಿಂಗಳು ಕಳೆದ ಬಳಿಕ ಸ್ಪಷ್ಟ ಚಿತ್ರಣ ಸಿಗಲಿದೆ'' ಎಂದು ಸಂಚಾರ ಪೊಲೀಸರು ತಿಳಿಸಿದ್ದಾರೆ.

ಸಿಗ್ನಲ್‌ಗಳಲ್ಲಿ ಟ್ರಾಫಿಕ್‌ ಪೊಲೀಸರು ಇಲ್ಲದಿದ್ದರೂ ಸಿಸಿ ಕ್ಯಾಮೆರಾ ಅಳವಡಿಸಿರುವುದರಿಂದ ಸವಾರರು ಸಿಗ್ನಲ್‌ ಜಂಪ್‌ ಮಾಡಿದ ಚಿತ್ರ ಸಿಸಿಟಿವಿಯಲ್ಲಿ ದಾಖಲಾಗುತ್ತದೆ. ಈ ಸಂದೇಶ ಟ್ರಾಫಿಕ್‌ ನಿಯಂತ್ರಣ ಕೊಠಡಿಗೆ ರವಾನೆಯಾಗುತ್ತದೆ. ನಂತರ ವಾಹನದ ಮಾಲೀಕರ ಹೆಸರಿನ ಖಾತೆಗೆ ದಂಡ ಸೇರ್ಪಡೆಯಾಗುತ್ತದೆ. ಪೊಲೀಸರ ತಪಾಸಣೆ ವೇಳೆ ಪಿಡಿಎ ಸಾಧನದಲ್ಲಿ ಚೆಕ್‌ ಮಾಡಿದಾಗ ಹಳೆಯ ದಂಡಗಳ ಲೆಕ್ಕ ಸಿಗಲಿದೆ. ದಂಡದ ಹಣ ಅನಿವಾರ್ಯವಾಗಿ ಪಾವತಿಸಬೇಕಾಗುತ್ತದೆ. ಈಗ ದಂಡ ದುಬಾರಿಯಾಗಿರುವುದರಿಂದ ಸಿಗ್ನಲ್‌ ಜಂಪ್‌ ಮಾಡುವ ಮುನ್ನ ಯೋಚಿಸುವಂತೆ ಮಾಡಿದೆ. ಇದರ ಪರಿಣಾಮ ಟ್ರಾಫಿಕ್‌ ನಿಯಮ ಉಲ್ಲಂಘನೆ ಸಂಖ್ಯೆ ಇಳಿಮುಖವಾಗುತ್ತಿದೆ ಎಂದು ಸಂಚಾರ ಪೊಲೀಸರು ಹೇಳುತ್ತಾರೆ.