ನಮ್ಮ ಮೆಟ್ರೋದಲ್ಲಿ ಮಾಂಸ ಒಯ್ಯುವಂತಿಲ್ಲ ಎಂದ ಬಿಎಂಆರ್‌ಸಿಎಲ್‌!

ಬೆಂಗಳೂರು: ನಮ್ಮ ಮೆಟ್ರೋದಲ್ಲಿ ಯಾವುದೇ ತೆರೆನಾದ ಮಾಂಸ ಒಯ್ಯುವಂತಿಲ್ಲ ಎಂದು ಬಿಎಂಆರ್‌ಸಿಎಲ್ ಸ್ಪಷ್ಟಪಡಿಸಿದೆ. ಮೆಟ್ರೋ ರೈಲಿನಲ್ಲಿ ಮೀನು, ಮಾಂಸ ಕೊಂಡೊಯ್ಯಲು ಅವಕಾಶ ನೀಡದಿರುವ ಕುರಿತು ಪ್ರಯಾಣಿಕರು ಬಿಎಂಆರ್‌ಸಿಎಲ್‌ಗೆ ದೂರಿದ್ದರು. ಈ ಬಗ್ಗೆ ಸ್ಪಷ್ಟನೆ ನೀಡಿ ಬಿಎಂಆರ್‌ಸಿಎಲ್ ಟ್ವೀಟ್ ಮಾಡಿದೆ.

ಇತ್ತೀಚೆಗೆ ಪವನ್ ಕುಮಾರ್ ಎಂಬ ಪ್ರಯಾಣಿಕರೊಬ್ಬರು ಮೀನನ್ನು ಬ್ಯಾಗ್‌ನಲ್ಲಿ ಕೊಂಡೊಯ್ದಿದ್ದರು. ಆದರೆ, ಇದನ್ನು ಒಳಗೆ ಬಿಡುವುದಿಲ್ಲ ಎಂದು ಭದ್ರತಾ ಸಿಬ್ಬಂದಿ ತಡೆಯೊಡ್ಡಿದ್ದರು. ನಂತರ ಏನೂ ಮಾಡಲಾಗದೆ ಪ್ರಯಾಣಿಕ ವಾಪಸ್‌ ತೆರಳಿದ್ದರು. ಈ ಕುರಿತು ಪ್ರಯಾಣಿಕ ಬಿಎಂಆರ್‌ಸಿಎಲ್‌ನ ಟ್ವಿಟರ್‌ ಖಾತೆಯಲ್ಲಿ ದೂರು ಸಲ್ಲಿಸಿದ್ದಾರೆ.



ಇದಕ್ಕೆ ಉತ್ತರ ನೀಡಿರುವ ಬಿಎಂಆರ್‌ಸಿಎಲ್‌ ''ಎಲ್ಲ ಬಗೆಯ ಮಾಂಸವನ್ನು ಮೆಟ್ರೋದಲ್ಲಿ ಒಯ್ಯುವುದನ್ನು ನಿಷೇಧಿಸಲಾಗಿದೆ. ಆದರೆ ಸರಿಯಾಗಿ ಪ್ಯಾಕಿಂಗ್‌ ಮಾಡಿದ್ದರೆ ಅಥವಾ ದುರ್ವಾಸನೆ ಬಾರದಿದ್ದರೆ ತಡೆ ಒಡ್ಡುವುದಿಲ್ಲ,'' ಎಂದು ನಿಗಮ ಸ್ಪಷ್ಟಪಡಿಸಿದೆ.


ಆದರೆ, ತಾವು ಬ್ಯಾಗ್‌ನಲ್ಲಿ ಮುಚ್ಚಿದ ರೀತಿಯಲ್ಲಿ ಮೀನನ್ನು ತಂದಿದ್ದೆ ಎಂದು ಪ್ರಯಾಣಿಕ ತಿಳಿಸಿದ್ದಾರೆ. ಜೊತೆಗೆ ನಿಮ್ಮ ಸಿಬ್ಬಂದಿಗೆ ಈ ಬಗ್ಗೆ ತಿಳಿ ಹೇಳಿ ಎಂದದ್ದಾರೆ. 2018ರಲ್ಲಿ ಈ ಬಗ್ಗೆ ಬಿಎಂಆರ್ ಸಿಎಲ್ ತಿಳಿಸಿತ್ತು. ಚೆನ್ನಾಗಿ ಪ್ಯಾಕ್ ಮಾಡಿರುವ ವಸ್ತುಗಳಿಗೆ ಕೊಂಡೊಯ್ಯಲು ಅವಕಾಶ ಇದೆ ಎಂದಿತ್ತು. ಅದಾಗ್ಯೂ ಸಿಗರೇಟು, ಮದ್ಯದ ಬಾಟಲಿಗಳು(ಸೀಲ್ಡ್ ಆಗಿದ್ದರೆ ಸರಿಯಾದ ಕಾರಣ ನೀಡಿದ ಬಳಿಕ ಅವಕಾಶ ನೀಡಲಾಗುತ್ತದೆ), ಬಂದೂಕು, ಚೂರಿಯಂತಹ ತೀಕ್ಷ್ಣ ವಸ್ತುಗಳು , ತಿಂಡಿ-ತಿನಿಸುಗಳು, ಪ್ರಾಣಿ-ಪಕ್ಷಿಗಳು, ರಾಸಾಯನಿಕ ವಸ್ತುಗಳಿಗೆ ತೆಗೆದುಕೊಂಡು ಹೋಗಲು ಅವಕಾಶವಿಲ್ಲ.