ಬೆಂಗಳೂರು: ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಯು (ಬಿಎಂಟಿಸಿ) ವೋಲ್ವೊ ಮತ್ತು ವಾಯುವಜ್ರ ಬಸ್‌ಗಳ ಪ್ರಯಾಣ ದರವನ್ನು ಇಳಿಕೆ ಮಾಡಿ, ಪ್ರಯಾಣಿಕರಿಗೆ ಹೊಸ ವರ್ಷದ ಉಡುಗೊರೆ ನೀಡಿದೆ. ಪರಿಷ್ಕೃತ ದರವು ಜ. 1ರಿಂದ ಜಾರಿಗೆ ಬರಲಿದೆ.
ಹೊಸ ವರ್ಷದ ಹಿನ್ನೆಲೆಯಲ್ಲಿ ಜನವರಿ ತಿಂಗಳಿಗೆ ಮಾತ್ರ ಅನ್ವಯವಾಗುವಂತೆ ಪ್ರಾಯೋಗಿಕವಾಗಿ ಪ್ರಯಾಣ ದರ ಕಡಿಮೆ ಮಾಡಲಾಗಿದೆ. ಪ್ರಯಾಣಿಕರಿಂದ ಉತ್ತಮ ಸ್ಪಂದನೆ ದೊರೆತರಷ್ಟೇ ಈ ದರಗಳನ್ನು ಮುಂದುವರಿಸಲಾಗುವುದು ಎಂದು ಸಂಸ್ಥೆಯು ಪ್ರಕಟಣೆಯಲ್ಲಿ ತಿಳಿಸಿದೆ.
ಹವಾನಿಯಂತ್ರಿತ ವೋಲ್ವೊ (ವಜ್ರ) ಬಸ್‌ ಸೇವೆಯ ಪ್ರಯಾಣ ದರದಲ್ಲಿ ಶೆ.ೕ 37ರಷ್ಟು ಕಡಿಮೆ ಮಾಡಲಾಗಿದೆ. ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಕಾರ್ಯಾಚರಣೆಗೊಳ್ಳುವ ವಾಯುವಜ್ರ ಬಸ್‌ಗಳ ಟಿಕೆಟ್‌ ದರ 15 ರೂ. ನಿಂದ 45 ರೂ.ವರೆಗೆ ಇಳಿಕೆಯಾಗಲಿದೆ. ಜಿಎಸ್‌ಟಿ (ಶೇ 5ರಷ್ಟು) ಮತ್ತು ಟೋಲ್‌ ದರ ಪ್ರತಿ ಪ್ರಯಾಣಿಕರಿಗೆ 12 ರೂ. ಹೊರತುಪಡಿಸಿ, ಪ್ರಯಾಣ ದರ ಕಡಿಮೆ ಮಾಡಲಾಗಿದೆ.
ಹುಣಸಮಾರನಹಳ್ಳಿಯಿಂದ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಪ್ರಯಾಣಿಸುವ ಪ್ರಯಾಣಿಕರಿಗೆ 100 ರೂ. ಟಿಕೆಟ್‌ ದರ ನಿಗದಿಪಡಿಸಲಾಗಿದೆ. ಮೂರು ಅಥವಾ ಹೆಚ್ಚು ಮಂದಿ ಗುಂಪಿನಲ್ಲಿ ವಾಯುವಜ್ರ ಬಸ್‌ಗಳಲ್ಲಿ ಪ್ರಯಾಣಿಸಿದರೆ, ಶೇ 15ರಷ್ಟು ರಿಯಾಯಿತಿ ನೀಡಲು ನಿರ್ಧರಿಸಲಾಗಿದೆ. ಗುಂಪು ರಿಯಾಯಿತಿ ಸೌಲಭ್ಯವು ಶೀಘ್ರದಲ್ಲೇ ಜಾರಿಗೆ ಬರಲಿದೆ.
ಮೊದಲ ಹಂತದಲ್ಲಿ ವಾಯುವಜ್ರ ಸೇವೆಗಳಲ್ಲಿ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಪಿಒಎಸ್‌ ಮೂಲಕ ಟಿಕೆಟ್‌ ಖರೀದಿಸಿದವರಿಗೆ ರಿಯಾಯಿತಿ ನೀಡಲಾಗುತ್ತದೆ. ಮುಂಬರುವ ದಿನಗಳಲ್ಲಿ ಎಲ್ಲ ವಾಯುವಜ್ರ ಸೇವೆಗಳಲ್ಲಿ ರಿಯಾಯಿತಿ ಸವಲತ್ತನ್ನು ವಿಸ್ತರಿಸಲು ತೀರ್ಮಾನಿಸಲಾಗಿದೆ.
ವಾಯುವಜ್ರ ಪ್ರಯಾಣ ದರಗಳು:
ಸ್ಥಳ ಹಾಲಿ ದರ (ರೂ.ಗಳಲ್ಲಿ) ಪರಿಷ್ಕೃತ ದರ
ಮೇಖ್ರಿ ವೃತ್ತ- ಕೆಐಎಎಲ್‌ 190 175
ಹೆಬ್ಬಾಳ- ಕೆಐಎಎಲ್‌ 170 150
ಎಸ್ಟೀಂ ಮಾಲ್‌- ಕೆಐಎಎಲ್‌ 170 140
ಕೋಗಿಲು ಕ್ರಾಸ್‌- ಕೆಐಎಎಲ್‌ 170 125