ಬೆಂಗಳೂರಿನಲ್ಲಿ ಸ್ಫೋಟಕದ ವದಂತಿ ತಂದ ಆತಂಕ

ಬೆಂಗಳೂರು: ನಗರ ನಿಲ್ದಾಣದಲ್ಲಿ ನಿಲುಗಡೆಯಾಗಿದ್ದ ಬೆಂಗಳೂರು ಪಾಟ್ನಾ ನಡುವಿನ ಎಕ್ಸ್ಪ್ರೆಸ್ ರೈಲಿನ ಪಕ್ಕದಲ್ಲಿ ಗ್ರೆನೇಡ್ ಮಾದರಿಯ ವಸ್ತು ಸಿಕ್ಕಿದೆ.

ಬೆಳಗ್ಗೆ 9 ಗಂಟೆ ಸುಮಾರಿಗೆ ಸಾರ್ವಜನಿಕರು ನೀಡಿದ ಮಾಹಿತಿ ಆಧರಿಸಿ ಸ್ಥಳಕ್ಕೆ ತೆರಳಿದ ರೈಲ್ವೆ ಭದ್ರತಾ ಪಡೆ ಮತ್ತು ರಾಜ್ಯ ರೈಲ್ವೆ ಪೊಲೀಸರು ಗ್ರೇನೆಡ್ ಮಾದರಿ ವಸ್ತುವನ್ನು ತೆಗೆದುಕೊಂಡಿದ್ದಾರೆ.

ಮುಂಜಾಗ್ರತಾ ಕ್ರಮವಾಗಿ ರೈಲಿನಲ್ಲಿ ಶ್ವಾನದಳ ಮತ್ತು ಬಾಂಬ್ ನಿಷ್ಕ್ರಿಯ ದಳ ಸಿಬ್ಬಂದಿ ಶೋಧ ನಡೆಸಿದರು.

ಬಾಂಬ್ ಸ್ಕ್ವಾಡ್ ಸಿಬ್ಬಂದಿ ಪ್ರಕಾರ ಇದೊಂದು ಡಮ್ಮಿ ಗ್ರೆನೇಡ್.

ಪ್ಲಾಟ್ ಫಾರಂ 1ರಿಂದ 9 ನೇ ಪ್ಲಾಟ್ ಫಾರಂ ಗೆ ತೆರಳುವ ಸೈಡ್‌ವೇ ಬಳಿ ಡಮ್ಮಿ ಗ್ರೆನೇಡ್ ಪತ್ತೆಯಾಗಿದೆ ರಾಜ್ಯ ರೈಲ್ವೆ ಪೊಲೀಸ್‌ನ ಹಿರಿಯ ಅಧಿಕಾರಿ ತಿಳಿಸಿದ್ದಾರೆ.

ಕೆಲ ಕಾಲ ಪ್ಲಾಟ್‌ಫಾರ್ಮ್ ನಂಬರ್ 1 ಮತ್ತು 2ನ್ನು ಹೊರತುಪಡಿಸಿದರೆ, ಉಳಿದೆಡೆಗಳಿಂದ ರೈಲು ಸಂಚಾರ ಸಹಜ ಸ್ಥಿತಿಯತ್ತು. ಮತ್ತೀಗ ಈ ಎರಡು ಪ್ಲಾಟ್‌ಫಾರ್ಮ್‌ಗಳಿಂದ ರೈಲು ಸಂಚಾರ ಆರಂಭವಾಗಿದೆ. ರೈಲ್ವೆ ಮೀಸಲು ಪೊಲೀಸ್ ಪಡೆಗೆ ಅಲರ್ಟ್ ಆಗಿರುವಂತೆ ಸೂಚನೆ ನೀಡಲಾಗಿದೆ.

ಪ್ರವೇಶದ್ವಾರ, ಪ್ಲಾಟ್‌ಫಾರ್ಮ್, ರೈಲು ಬೋಗಿ ಮತ್ತು ಪಾರ್ಸೆಲ್ ಆಫೀಸ್‌ನಲ್ಲಿ ತೀವ್ರವಾದ ಪರೀಕ್ಷೆಗಳನ್ನು ನಡೆಸಲಾಗುತ್ತಿದೆ.